زوّادة اليوم: وصايا الرب

[souad jaalouk]

زوّادة اليوم: وصايا الرب
بيخبرو عن صبيّة عندها نبتة فيكُس جينسينغ او الشجرة القزم. علّمها الشب بالمشتل كيف تهتم فيها و قلها انّو هالنبتة ما بتحب كتير الشمس و انّو ما لازم تمسّحلها اوراقها حتّى لو توسّخو و انّو لازم تسقيها شوي مرتين بالجمعة لأنها ما بتحب المَي كتير. التزمت هالصبيّة بالتعليمات اوّل فترة. بعدين مرق كم يوم كان شوب كتير فكّرت انّو نبتتها اكيد عطشانة كتير و صارت تسقيها كل يوم. بعد فترة صارو وراق الشجرة يوقعو! فكّرت الصبيّة انّو شجرتها مريضة و حكيت مع صاحب المشتل حتّى تسألو شو لازم تعمل. قلها انّو هالنوع من النبات بيخسر وراقو لسببين او قلّة السقاية او كترة السقاية! عرفت انّو المَي الزايدة هيّي اللي سبّبت هالشي! الزوّادة اليوم بتقلّك اوقات بتكون مفكّر حالك عم تعمل منيح و تهتم زيادة لأنّك بتحب الناس بس بتكون عم تخنقن و تحدّلن من حرّيتن و هالشي بيبعدن عنّك! اوقات بتكون بتعرف القوانين و الوصايا بس بتقول انّو اذا تصرّفت من راسي شوي ما رح اؤذي حدا و بتطلع عم تؤذي حالك قبل الكل! التزم بوصايا الرب وما رح تكون الّا ربحان...الله معكن