10 نقاط مهم تفكر فيهم وانت بتتعامل مع طفلك

[walaa farouk]

• مش معني انه طفل وسنه صغير تبص له انه مشافش حاجة في الدنيا
.. عايز افاجئك واقولك ان عنده صراعات زيك بالظبط .. ونفس اللي بتحس بيه هو بيحس بيه .

• الفرق بس في نوع الصراعات وشكلها .. يعني مثلا زي ما انت بتصارع
ما بين وظيفتين ومحتار تشتغل في انهي ام ١٠ الاف ولا ام ٨ الاف .
. هو بيصارع بنفس مشاعرك بس هو شكل صراعه الفترة دي ان عنده بلايستيشن 2
وهو هيموت و يجرب ال 3 وال 4 .. لازم تحترم صراعه ده وما تتفهش منه وتحترمه وتقدره .
زي ما صراعه تافه جدا بالنسبة لك .. صراعك في الغالب تافه برضو لشخص اكبر منك ب ٣٠ سنة .

• الاستجابة لكل الطلبات بتخلق طفل سطحي ..
والرفض لكل الامنيات بتخلق طفل صغير النفس .. الحكمة مطلوبة !

• انت مش مطالب تجيب له كل اللي يطلبه .. لكن مطالب انك تقدر مشاعر احتياجه .

• لازم تفهمه من صغره ان ربنا كأب بيتعامل معانا بنفس الطريقة
مش بينفذلنا اي حاجة نطلبها لانه بيشوف انها مش في صالحنا
لكن بيقدر جدا مشاعر احتياجنا وبيتعامل مع مشاعرنا عن طريق انه بيحاول يفهمنا ويقنعنا بالصح .
مش علشان ماتجيبلهوش اللي هو عايزه لكن علشان تتكون عنده صورة صحيحة عن ربنا ومايعثرش فيه لما يكبر .

• اعظم هدية ممكن تقدمها لطفل انك تكتشفه تكتشف موهبته ونقطة قوته واكتر شئ بيميزه .
لما سألوا محمد صلاح في اكبر مؤتمر صحفي في العالم وقالوله مين اكتر شخص له جميل عليك ..
قال ابويا لانه اكتشف في موهبة الكورة من طفولتي
وفضل يدعمني حتي لما يأست وقررت اسيب الكورة لاني مش بكسب فلوس هو صمم اني اكمل .

• الترانيم والاغاني والموسيقي الحزينة والمشاهد الدموية
ومشاهد العنف حتي لو كرتون كل دي امور ممنوعة وخطيرة جدا ..
حتي لو مفيدة وشيقة بالنسبالك .

• افتكر انك رغم ان سنك كبير وعديت علي تجارب كتير استمديت منها ثقة بنفسك
الا انك مازلت محتاج لكل كلمة تشجيع .. فما بالك العجينة اللي لسه يتبدأ حياة
محتاج قد ايه تشجيع وقد ايه ثقة .. شجعه علي اصغر تفاصيل بيعملها .

• المقارنة بتكسر.. انت شاب طول بعرض ولو بنت قارنتك بشخص تاني هتتكسر
وانتي بنت قمة الجمال ولو ولد قارنك ببنت تاني هتتكسري
فما بالكم العجينة الطرية تاثير المقارنة عليهم ايه .. اياك والمقارنة
لو حبيت تقارنه قارنه بنفسه .. قوله بس انت عندك افضل من كدة ..
ولما اتحطيت في الظرف ده في المرة الفلانية قدرت تعمل نتيجة اعظم من كدة ..
المقارنة دي هتنبهه وفي نفس الوقت هتحفزه .

• لو زرعت في عقله مفاهيم ومبادئ صحيحة عن الحياة هيكون اغني بكتير
من لو زرعت في جيبه فلوس يجيب اللي كل اللي عايزه .
. ولو ساعدته يكتشف نفسه ويعرف مميزاته انت بتامنله مستقبله اكتر بكتير من الشقة والمشروع .

[Mary Naeem]

رووووووووووعة حببتي
ربنا يفرح قلبك

[walaa farouk]

ميرسي على مرورك الغالي