جلسة مع حبيبى يسوع

[walaa farouk]

ورينى عيونك ملياها ليه بالدموع يعنى انتى عجبك اكون عليكى موجوع .
مش واثقه فيا ولا خايفه وبتقولى تقلان عليا .
ماليا قلبك بالقلق وافكار فى دماغك بتضعفك وتجهدك .
والاستعجال خلا جواكى 100 سؤال من غير اجابات تقنعك .
شعرك طأطأ من الخوف وعنيكى دبلت ومبقتش تشوف وعصره قلبك كل يوم تملا الكفوف مر وهوان .
نسيتى انك عروسه جميله بتكحل بس من نظره عنيها .
ونسيتى انى ضعيف قدامك مشتاق لحسن ودلالك ودموعك عنى حوليها
وجعتلى قلبى من الحزن عليكى .
نسيتى انى صورتك وانتى لسه من الدنيا غايبه ولا نسيتى انى رسمتك
وفى ايدى ماسكك لحسن تتكعبلى وتقعى ف فخ وبير غويط زى العصفور بنجدك منه
ومن غدر الصياد اللى بيهلك .
نسيتى انى امبارح كنت معاكى ومهرك دفعته وفداكى وجوه ضلوعى حفرتلك بيتك وبقلبى كمان غطيتك .
نسيتى من كان يجرى ينجدك وف المخاطر كان يقف يسندك ويرفعك ويحول نحيبك لضحكات .
نسيتى ان عشقى ليكى خلانى اتنازل كتير عشان ارضيكى .
نسيتى لما قلبك خلى بيكى وكسره جرحك وكان خلاص هيموتك مين لم فتافيته وتانى صحى الامل فيكى .
نسيتى كم مره من غير مايطلعلك صوت كنت انا حاسس بيكى ومقهور عليكى .
اعد كمان ولا كفايه اقول كمان كام مره فضلت مستنيكى وعلى بابك بناجيكى
ورغم كسفتى مازهقتش وعشمت فى مره تفتحى واحاكيكى .
خاطرك اتكسر مره ولا اتنين انى سكت ومردتش عليكى
طب افتكرى كدا كام سنه اعد اكلم فيكى وانتى الشيطان كان مكلبش فيكى ولهيكى
وانتى منعانى احررك وافديكى .
سيبك من كل دا المهم تعرفى وتتأكدى انى انا بدووووب فيكى .
انا بعشقك وجايب العشا ومستنيكى - نسيت كل اللى كان وهمنع عنك الاحزان
وهفتح لك للافراح كل البيبان وهتنازل عن حقى بس مش هسيبك فريسه للشيطان .
قومى البسى واتزينى بالتيجان واستنيرى بوجهى وخدى من بهائى ومجدى وشمسى عليكى تبان .
عاوزك عروسه تزينى عُرسى واتباها بيكى وتبقى زى القمر تمام وارقص معاكى بفرح واكتبلك نصيبك فى ورثك واختمهولك كمان .
عاوز اكحل عيونى بضحتك واقفلهم عليكى لتطلعى وارجع ادور عليكى فى كل الوديان .
عاوز ايدى فى اديكى وزفتك تتحكى على كل لسان ويقولوا اجمل عروسه بتتزف
والحُسن اللى فيها مع عريسها بان يابختها بيه نورها بيه لما فتحت ليه لبسها اجمل تيجان