الصداقة المشبعة

[walaa farouk]

الصداقة المُشبِعَة



حين أتامل الصداقات اليوم سواء الصداقة بين الجنسين او الاصدقاء بين الجنس الواحد
أجد إختيارين لا ثالث لهم .. فإما سطحية جدا ليس لها اي عمق
، وإما لها عمق ولكن عمق كاذب ومشوه مبني اما علي المصالح
او الشهوة او الامتلاك (في حال الجنسين) او الاهتمام المزيف للوصول لغرضٍ ما .

لذلك هذه الصداقات ليس لها بعد علي مستوي دائرة الاصدقاء فقط .
. بل تصل الي ابعاد اعمق فينطبع ذلك علي المستوي الشخصي
والمستوي الروحي وحتي مستوي الاسرة والزيجة .

لذلك أحلم بصداقة من نوع خاص
الصداقة بحسب قلب الله

أحلم بصداقة
تكون جلساتنا فيها مثمرة وتضيف لنا شئ وبعد حين لمن حولنا (وهذا يحدث تلقائيا) .
. بدلاً من الجلوس علي قهوة بالساعات نعمل اللي الكل بيعمله اللي هو نندب حظنا
ونتكلم علي حال البلد والكورة وساعات الفن والاخبار اللي علي الساحة ..
وهذا للاسف لا يضيف اي شئ ايجابي .. انت بتمشي وانت فاكر انك عبرت عن اللي جواك فارتاحت .
. لكن التعبير الحقيقي عن نفسنا اننا نقعد نتكلم في تحدي بنصارع فيه جوانا
وعلي الاقل لو مالقيناش ليه حل في القعدة فاحنا خرجناه للنور وده نص النجاح .
. نتكلم عن المطبات اللي جوانا وبرانا وازاي واجهناها وازاي نقدر نواجهها ..
واللي فينا مش عارف يشتغل ايه نساعده يكتشف نفسه ونساعده اننا نشاورله علي الحاجات
اللي هايكون مميز فيها جدا وهاينجح فيها ..

بحلم بصداقة
ممتلئة بالهزار والمرح لكن مع الاحتفاظ بحدود الاحترام لكيان كل شخص ..
ممتلئة بالاقتراب لكن ليس بها اي روح امتلاك او شهوة او مصلحة.

بحلم بصداقة
يكون فيها حضور ربنا من نقاوتها (نقاوة قلوب اصحابها)
فكل اللي يدخل جوة دايرتها يشعر ان نفسه بتسترد وبيقرب من ربنا
وبيتصالح مع ربنا ومع نفسه (حتي لو بدون صلاة فعلية)

بحلم بصداقة
نقعد من وقت للتاني نساعد بعض في كتابة ال cv ..
ونضيف لبعض حاجات مش واخدين بالنا منها سواء مهارات داخلية او فرص خارجية
.. واقول لصديقي ضيف ان نبرة صوتك مميزة والقائك ممتاز
ويضيف للفرص المستهدفة راديو و نشوفه بعد ٣ سنين مذيع راديو مبدع .
. او صديق يكون فاهمني يقدر يخرج من جوايا اجابة لسؤال مهم اعرف اتكلم فيه
ويطلع كاميرته ويصورني وينزله ويفيد كتير من الناس ..

بحلم بصداقة
نقعد ما نتكسفش اننا نبكي مع بعض علي امور سايبة جوانا جرح ..
ومانتكسفش اننا نحكي عن عيوبنا واحنا واثقين ان صورتنا في عين اللي قدامنا
مش هاتنزل سنتيمتر واحد لكن بالعكس لو احنا صادقين صورتنا ها تعلي
وهانبقي عايزين نتمسك ببعض اكتر ونعالج عيوب بعض لاننا هانشوف في كل شخص عيب عند التاني ميزة .
. فاللي عنده عيب هايشوف التاني بيكمله فيه ..
واللي عنده ميزة عمره ما هايتكبر لان عنده عيب هو عند التاني ميزة .

بحلم بصداقة
مانكونش عندنا مانع لو شخص فينا في ازمة مادية مانبخلش اننا نطلع مرتباتنا خلال الشهر ونديهاله (وشفت ده بالفعل) واللي ناقصه حاجة زي حل لمشكلة ، احتياج لمساندة معنوية
، احتياج لشغلانة ، اي نوع من الاحتياج المادي يفضل ده موضع انشغالنا
ومانسكتش غير لما نقدم له حل ومخرج ..

بحلم بصداقة
نكون بنقود بعض للنجاح .. ونكون طايرين من الفرح واحنا شايفين شخص وسطينا بينجح ..
وندعمه ونقف وراه لحد ما نشوفه بقي اعلي واعلي .. مش نتريق عليه ونسخر منه
او نحس بنفسنة ونخاف من جوانا يعلي فيتكبر علينا ونحس قدامه اننا صغيريين (ده شعور بسبب ان مفيش محبة حقيقية جوانا ) لو فيه محبة حقيقية هايكون فيه اتضاع ان نجاحه هو نجاحنا وانه لما يعلي هايعلينا معاه .. فكلنا هاننجح .

بحلم بصداقة
نحس حقيقي بمعني كلمة وحدة .. ونحول الشعور بالوحدة (الانعزال)
لشعور بالوحدة (اتحاد) لان الشعور ده اغني من اي احساس
واغني من اي فلوس وبيعالج حاجات كتير جوة الانسان بدون ما يشعر ..

يمكن تشوفني اني عاوز اكون عميق وكدة وضد الضحك والتهييس .
. لكن اللي يعرفني كويس عارف اني بحب الضحك والهزار والرخامة لكن ده مش معناه اننا هانقضيها نكد لكن ده هايدينا فرح حقيقي بيه هانقدر نضحك بجد من قلوبنا ..

و دي القعدات ودول الاصدقاء
اللي بيسموها وقتهم بفلوس .. مش شرط يعملوا فيه بيزنس لكن يعني يغنيهم
.. ويخليك زي ما بتكون مبسوط وجيب بنطلونك فيه فلوس تكون مبسوط ان جيب قلبك مليان شبع وراحة وأمان ..

ماكدبش عليكم انا عندي من الاصدقاء دول لكن قليليين جدا .
. وانا طمعان ان تكون دايرة كبيرة من اصدقاء بالنوع ده .
. ولو قدرنا فعلا ان يكون عندنا دواير صداقات بالشكل ده هايكون عندنا زوجات ناجحة جدا
.. لان السبب ان معظم ان الزيجات فاشلة ومتدمرة الوقت ده ان الاصل بتاع الزواج اللي هو الصداقة الحقيقية
والعلاقة الناجحة المشبعة مع الاخر مش موجودة .. لكن لو الدايرة الكبيرة مظبوطة هاتخرج دواير من الزيجات ناجحة جدا .. لان كتير من المفاهيم هاتكون اتغيرت واتعالجت

[Mary Naeem]

صح يا قمر
ربنا يباركك حببتي

[walaa farouk]

ميرسى على مرورك الغالى