اقبل مشاعرك

[walaa farouk]

زعلان، متضايق، مخنوق ومش عارف السبب، غيران، بتكره، بتحب، ناقم، شاكر ........
. كل سلسلة المشاعر الإنسانية اللى بنعدى بيها ومش بنبقى فاهمينها فى بعض الأوقات
او مستنكرينها فى اوقات تانية، أو بنهرب منها، أو بنغرقها وسط حاجة /
حاجات تانية علشان نغلوش عليها.

بس كل ردود الأفعال دى مش بتحل حاجة فى مشاعرنا
ولا بتخلينا نعرف نتعامل معاها ازاى. ولا هى بتختفى فى الوقت نفسه بشكل تلقائى
نتيجة اللى بنعمله، لكنها بتكون عاملة زى عفريت العلبة اللى بيطلعلنا
فى اوقات غير متوقعه. فيه حاجة بتعمل تحفيز trigger للمشاعر دى
اللى فى الغالب بيكون وراها فكرة أو موقف عدينا به وبنينا عليه معتقدات محورية فى حياتنا.

المشاعر جزء اصيل من تكوينا، صعب نغفله او نهمله. لكن مهم نسمعه والأهم نعرف نتعامل معاه بشكل صحى وصحيح.
الأول متستنكرش على نفسك انك حسيت الإحساس ده،
حتى لو احساس مش حلو، يعنى لو غيرت من حد أو
لما سمعت خبر حلو عند حد فرحتله لكن فيه حاجة لمست جواك فى الم عندك،
فلقيت شعورين عكس بعض عاصرينك. سمعت بنجاح شخص
وزى ما فرحت زى ما فكرت فى حياتك هى فين من النجاح ده.

دور على اصل الشعور والفكرة أو الموقف اللى وراه اللى دفنته
ومتعاملتش معاه وقولت هيختفى لوحده! هو مختفاش،
هو بس اتدراى لوقت وجه محفز ليه راح مطلعه. فتعامل مع اصل وجذر المشكلة،
طلع ونضف الجرح حتى لو مؤلم شوية واقفل على نضافة. وجع ساعة ولا كل ساعة.

اسمع لمشاعرك لو اتكلمت من خلال جسمك. يعنى مشاعرك
ممكن تطلع فى شكل الم جسدى تحس انك مكسر ومش قادر تعمل حاجة
وكأن طاقتك كلها استهلكت فجأة. وكان فيشة الطاقة بتاعتك حد فصلها.
كل ده وراه شعور حاول تتعرف عليه وتسمعه.

اقبل اننا مركبين ومعقدين وحياتنا اوقات بتكون زى شبكة عنكبوتيه متشابكة ومتصله ببعض.
فك الشبكة دى مع كل موقف وشعور مُصاحب ليه.
اطلب السكينة والشجاعة والحكمة اللى تميز بيهم ايه من المواقف ينفع اغيرها،
وايه محتاج اقبله زى ما هو كده وميوقفش حياتى ولا يكون عفريت العلبة اللى بيطلع كل شوية!

مشاعرنا مش حاجة نهرب منها او نستنكرها او نُغرقها، لكن نديرها.

[Mary Naeem]

مشاعرنا مش حاجة نهرب منها او نستنكرها او نُغرقها، لكن نديرها.
ربنا يباركك

[اوفا]

ربنا يعوضك

[مورا مرمر]

موضوع اكثر من رائع
ربنا يفرح قلبك حبيبتى

[walaa farouk]

ميرسى على مروركم الغالى