28 حاجة إتعلمتها

[Rena Jesus]

28 حاجة إتعلمتها :-

1- الحياة كئيبة في أغلب الوقت، واللحظات السعيدة قليلة .. إتعود علي كدة.

2- الفلوس مش بتجيب السعادة، بس بتجيب الأمان، والأمان بيجيب السعادة.

3- أشتغل واتعب من وانت صغير علشان فرصتك بعد ما تتخرج تكون أحسن .

4- إوعي تكمل في الشغل اللي إشتغلته بعد ما إتخرجت علي طول،
دة الشغل اللي كتبه ليك المجتمع الفاشل اللي إنت عايش فيه.

5- متكملش شغل في مكان واحد أكتر من 3 سنين.

6- إختار حاجة من الإتنين ..

يا تنجح في حياتك الإجتماعية يا تنجح في حياتك العملية،

أو تكون ذكى إجتماعياً وتوصل للمعادلة الصعبة دى.

7- متسمحش لحد يقلل منك أو من موهبتك، ولو نجح إنه يخليك تشك في نفسك يبقي إنت اللي غلطان مش هو.

8- محدش مهتم بظروفك ولا شكلك ولا حالتك النفسية زي ما إنت متخيل.

9- صحابك موجودين لما تبقي موجود، لما تختفي هما كمان هيختفوا، محدش هيسأل عليك.

10- الفاشل النشيط أنجح من الموهوب الكسول.

11- لو لسة عايش مع أهلك، وصحابك هما نفسهم من أيام المدرسة... عمرك ما هتتطور.

12- متبقاش متواضع وإعرف قيمتك كويس قدام الناس .. بس متبقاش مغرور، في فرق.

13- إنت مش مُجبر علي إن كل الناس تحبك، ومش مُجبر برضه إنك تحب كل الناس .. إتعود علي الكُره عادي.

14- لو عاوز تتطور وتنجح .. متحبش، ولو حبيت متصاحبش، ولو صاحبت متتجوزش .. وكدة كدة الموضوع ملوش أي لازمة ومش جميل زي ما إنت متخيل.

15- إتعود علي إنك تبقي لوحدك كتير، لإن كل سنة دواير الناس بتقل من حواليك.

16- كُل اللي إنت عاوزه، وإلبس اللي إنت عاوزه، ويتحرق رأي الناس.

17- الرجالة بتعيط عادي، عيط كتير مش عيب.

18- لو في حاجة مضايقاك ومقلتهاش في وقتها، متحاولش تقولها تاني لإنه وقتها راح خلاص.

19- متقبلش تعمل شغل ببلاش، ومتتكسفش تطلب فلوس كتير علي شغلك.

20- لو عاوز تلعب رياضة إلعب، لو مش عاوز متلعبش .. عاوز تخس خس، مش عاوز متخسش .. جسمك إنت حر فيه، يتحرق رأي الناس كمان مرة.

21- دور علي اللي يبسطك وإعمله، متعملش اللي يبسط الناس.

22- قول لأ عادي ، لإن الناس هتقولك لأ برضه عادي.

23- الحياة مش عادلة، متستغربش لما حد ينجح وهو ميستاهلش.

24- متتعصبش إلا في الوقت المناسب، ولو إتعصبت خرج كل اللي عاوز تقوله مرة واحدة.

25- متخسرش حد عشان رأي سياسي أو ديني، ومتتمسكش قوي بالرأي دة، لإنك هتغيره بعد كام سنة عادي جداً.

26- محدش مسؤول عنك، ولا مسؤول عن اللي إنت فيه .. شيل طينك لإن محدش هيشيله.

27- مفيش حد شبهك أو زيك .. بس في مليون واحد ممكن ييجي مكانك عادي، وكلنا هنموت عادي.

28- الغربة عمرها ما كانت غربة وطن ،بقدر ما كانت غربة أشخاص وحنين لذكريات ..!!