مقاييس الأمانة

[walaa farouk]

مقاييس الأمانة......عظة قداسة البابا تواضروس الثاني باجتماع الأربعاء الأسبوعي



والتي ألقاها بكنيسة السيدة العذراء مريم والقديس مارمرقس، سن الفيل بلبنان

بسم الآب والابن والروح القدس الإله الواحد آمين. تحل علينا نعمته وبركته من الآن وإلى الأبد آمين

" أقرأ لكم بنعمة المسيح (رؤ ٢ : ١٠) لاَ تَخَفِ الْبَتَّةَ مِمَّا أَنْتَ عَتِيدٌ أَنْ تَتَأَلَّمَ بِهِ،

هُوَذَا إِبْلِيسُ مُزْمِعٌ أَنْ يُلْقِيَ بَعْضًا مِنْكُمْ فِي السِّجْنِ لِكَيْ تُجَرَّبُوا،

وَيَكُونَ لَكُمْ ضِيْقٌ عَشَرَةَ أَيَّامٍ، كُنْ أَمِينًا إِلَى الْمَوْتِ فَسَأُعْطِيكَ إِكْلِيلَ الْحَيَاةِ "

والأية اللى هنتكلم عنها اليوم هي:
"كُنْ أَمِينًا إِلَى الْمَوْتِ فَسَأُعْطِيكَ إِكْلِيلَ الْحَيَاةِ "

الأمانة لها عدة مقاييس علشان أعرف أقيم نفسي ونبدأبالمقياس الأول: الوقت

بتستغل يومك إزاي ؟ هل بتقرأ في الكتاب المقدس وبتصلى ولا بتستغل وقتك في أفكار شريرة

أو في أعمال غلط ؟ بتعمل إيه بالأربعة وعشرين ساعة،

والسؤال الأول لنا كمقياس أمانه يجمعنا جميعًا أمام الله هو ماذا تفعل بوقتك

هل وقتك له ثمن ولا الأيام زي بعضها، أو عندك الوقت له قيمة، والوقت أغلى شيء عند الإنسان

. ده أنت من خلال الوقت يمكن أن تصنع كل شيء

ولما تذاكر تنجح وعندما تعمل جيدًا تبني نفسك وأسرتك ومجتمعك ووقتك

والسؤال هنا فيما تقضى وقتك ؟
إن أغلى هدية يمكن أن تقدمها لآخر هي "الوقت" لأن أغلى شيء هو الوقت

لما بتتقابل مع صاحبك أو تجلس مع زوجتك أو مع بنتك أو مع ابنك أو عندما تجلس أنت كخادم مع من تخدمه.
لماذا الوقت هو أغلى شيء ؟
لأنه لا يمكن أن يتعوض بمعنى أمس كان الثلاثاء ١٩ يونيو

فهو لا يأتي مثله يعنى الوقت لا يمكن أن يسترجع إذا مضى وكل شيء تغير.


لكن لو انا قدمت لك هدية قلم مثلًا ممكن اجيبلك غيره.

وللسبب ده يقولون الإنسان يحتاج إلى ثلاثة حرف T:

time الكلمة الأولى

بمعنى الوقت وزى ما احنا جينا وقعدنا وبنسلم على بعض وبنفرح لأن بنعطي وقت لبعض وده اغلى شيء.

talk الكلمة الثانية
ومعناها الحديث أو الكلام اللى من خلاله بنقدر نوصل مشاعرنا لبعض.

touch الكلمة الثالثة
ومعناها لمس يعنى تلامس المحبة.
الكورال اللي كان معانا ولمسنا بترانيمه الجميلة ولما أسلم عليكم،

لمسات المحبة تشبع الإنسان علشان كده يا أحباء

المقياس الأول في الأمانة هو

مقياس الوقت كل واحد يسأل نفسه بتستغل وقتك إزاي

وهل بين المشاهدة والصداقة والقراءة وقتك متوزع كويس ؟.

مقياس الأمانة الثاني: الروح
والسؤال هل أنت أمين على روحك ؟ لأنك كائن روحاني لأن الله نفخ فيك روح الحياة

أنت صنعت وخلقت بروح الله ، هل أنت أمين على روحك ؟

كل البشر بيأكلوا علشان صحتهم تبقى كويسة ويهتموا بتغذيتهم ووزنهم

وده حاجة كويسة ده للجسد. ولكن روحك أهم وفيه آية (مت ٤ : ٤)

"لَيْسَ بِالْخُبْزِ وَحْدَهُ يَحْيَا الإِنْسَانُ، بَلْ بِكُلِّ كَلِمَةٍ تَخْرُجُ مِنْ فَمِ اللهِ".
يعنى الإنسان اللي عايش أمين على روحه هل هو واخد باله من نقاء قلبه ؟

والقلب لا يراه الا الله ومعرفش قلبك فيه ايه، لأن الله يعلم لذلك

. الله يريد أن يقابلك في قلب يليق بمن يستقبله. الله الزائر إلى قلبك يجب أن يكون قلبك نقيًا،

قلب نقي اخلق فيا يا الله.
أمانة القلب، ونقاوة القلب، هذه الأمانة وهذه النقاوة للانسان الذى يسعى دائمًا لنقاوة قلبه.
ولما نروح عند ربنا هناخد ويانا هدية وهي قلوبنا، ويفتح قلبك يجده مليان بالحب والنقاوة.
أمانة وقتك وقلبك تأتى من خلال حياة التوبة التي تعيش فيها باستمرار.

مقياس الأمانة الثالث:

أمانتك مع الآخرين، مع كل حبايبك وأصحابك ومجتمعك وكل البشرية،

هذه الأمانة يحكمها مقياس المحبة.
فيه واحد محبته للناس ضيقة وفيه واحد محبته لكل الناس متسعة.
كان فيه أم ربت بنتها إن كل حاجة تشوفها أو أي شخص تشوفه تقول له (يسوع بيحبك)

لو شافت شجرة تقول لها يا شجرة يسوع بيحبك، يا خالو يسوع بيحبك،

وتشوف المدرسة بتاعتها تقولها يسوع بيحبك، يافلانة يسوع بيحبك.
ربت الأم الابنة هكذا تقول يسوع بيحبك لغايه ما الام كانت مسافرة

في سيدى جابر شافت منظر صعب واحد متكلبش وسألت الطفلة أمها مين ده ؟

قالت لها ده مجرم والطفلة قربت له بكل براءة وقالت له "ياعم يامجرم يسوع بيحبك"

وهي سافرت والراجل رجع في زنزانته بيقول هو لسه في حد بيحبنى ده

كل الناس بتكرهنى وظلت هذه الكلمات معه حتى خرج وده كان دافع قوي إنه يتوب.

ولذلك يا أخوتى الأحباء محبتك للآخرين محبة حقيقية وليست شكلية أو ظاهرية

نحن لا نحب لا بالكلام ولا باللسان بل بالعمل والحق. حتى لو كان الآخر بيسبب لك أي شكل من الألم،

ولكن محبتك له جمر نار على رأسه.
بتحب الآخرين قد ايه فيه واحد ميبقاش طايق نفسه وفى واحد تحس إنه بيحبك وعايز يساعدك

. أي مسؤول في الدولة يطلق عليه الوزير فلان. وكلمة الوزير جاية من الفعل آزر

بمعنى ساعد هو الشخص المسؤول ان يساعدني. وزير الصحة يساعدني في صحتي

ووزير يعنى خادم ومساعد في مجال تخصصه والآخر لا يقدر أن يساعد إلا لو كان بيحبه.

إذن:
١.مقياس الأمانة في وقتك
٢. مقياس الأمانة في قلبك
٣. في علاقتك بالآخرين
والمحبة لا تسقط أبدًا، محبتك هتغلب وتجيبلك بركات وبركات.

مقياس الأمانة الرابع :

عملك ومسؤوليتك الاجتماعية ايه شكلها سواء كنت طالب أو عامل أو خادم في كنيستك

ومصلحتك مسؤوليتك تجاه المجتمع، الكنيسة

. العمل الصحيح يحتاج من الإنسان دائما شكل من أشكال الاجتهاد


لأن الرخاوة لا تمسك صيدًا. الصائد الكسلان عمره ما هيجيب سمك.

لازم يهتم ويكون إنسان مجتهد فيه إنسان بيعمل العمل بكسل وفيه واحد مجتهد في عمله.
كان فيه شاب متخرج في كلية الآداب واشتغل نقاش واحد من اهل البلد

قاله تعالى اعمل في بيتى وسأله عن الوقت المطلوب لإنهاء أعمال النقاشة قال له الشاب تاخد عشرين يوم.
وعمل الشاب بجد وفى اليوم الـ ١٨ اختلف مع صاحب البيت فطرده

، وأما الشاب الجميل خرج وهو زعلان لأنه لم يأخذ أجره، ولكن رجع لصاحب البيت

وقا له اتفقت اعمل شغل عشرين يوم أنا لازم أعمل اللي عليا

وافتكر صاحب البيت انه جاى يبوظ الشغل، فقعد معاه ليراقبه فوجد إنه اشتغل باجتهاد

لغاية ما سلم له العمل كامل. وبعد العشرين يوم دعاه صاحب البيت للمشاركة في تجارته

ومن خلال الأمانة أعطى للرجل درس.
اجتهادك في دراستك أو عملك مهما يكون صغير أو كبير اجتهادك في الخدمة وخدمة الكنيسة بقلبك وحماسك وهذا الاجتهاد هو مقياس الأمانة.

الله هيعوضك أضعاف أضعاف تعبك، ربنا هيرتبلك كل شيء للخير، الراجل اللي بيركب الحدوة في رجل الحصان فالمسمار يثبت الحدوة والحدوة تقوي الحصان ومن يركب الحصان فارس قوى ينقذ أمة.
لذلك فالمسمار ينقذ الحدوة والحدوة تنقذ الحصان والحصان ينقذ الفارس والفارس ينقذ أمة

. طيب لو اللي بيعمل المسمار مش بيشتغل بأمانة

فهذا يؤدي إلى أن الحصان يصبح تعبان والفارس يقع والأمة تضيع.

حتى دق المسمار حاجة بسيطة تنقذ حاجة كبيرة.

أربعة مقاييس للأمانة التي تقف من خلالها أمام الديان العادل

، مقياس وقتك واهتمامك ومقياس قلبك ونقاوتك وعلاقتك بالآخرين

ثم مقياس عملك ومسؤوليتك وعملك باجتهاد.

"كُنْ أَمِينًا إِلَى الْمَوْتِ فَسَأُعْطِيكَ إِكْلِيلَ الْحَيَاةِ." (رؤ ٢ : ١٠)
أمانتك هي شاغلك في كل يوم وكل عمل ولما تعيش هذه الأمانة،

أنت تفرح وتفرح المجتمع اللي حواليك

وتفرح قلب ربنا وتبقى مطمئن لأبديتك في السماء ربنا يحافظ عليكم ويبارك حياتكم

لإلهنا كل مجد وكرامة من الآن وإلى الأبد أمين.

[Mary Naeem]

أنت تفرح وتفرح المجتمع اللي حواليك

وتفرح قلب ربنا وتبقى مطمئن لأبديتك في السماء ربنا يحافظ عليكم ويبارك حياتكم

لإلهنا كل مجد وكرامة من الآن وإلى الأبد أمين.\\
ربنا يباركك

[walaa farouk]

ميرسى على مرورك الغالى

[بنتك يايسوع]

ميرسي كتير على مشاركتك الجميله
ربنا يباركك