أنت يا رب مش بتبعد

Rena Jesus · رقم المشاركة : ( 1 ) 12 - 06 - 2018, 07:53 AM

بنبقي قريبين من ربنا فترات،
بتحس فيها انك قوي، مقبول، ليك قيمة، في ناس حواليك، قادر تحاول..

فتفرح، و تفتكر انك بقيت جامد و عارف تتخطي اي شئ بتتعرضله بنجاح،

فتبتدئ تبعد و تكسل و تخش اي حاجة بدراعك و ساعتها بترجع قوتك(ضعفك) الحقيقية تبان بعد ما كانت مستخبية ورا سوبر مان..

تيجي تدور علي ناس متلاقيش، قوة مفيش، صبر فاض بيه،
قدرة خلصت من زمان فتلف و ترجع تاني و تعرف ان وجوده جمبك هو اللي كان مهون كل حاجة مش شطارة و لا تأقلم مننا و لا ذكاء اجتماعي و نفسي زي ما بندعي..

أنت يا رب مش بتبعد،

احنا اللي بنجري بالأميال بعيد عنك و بعدين مش بنلاقي اي شبع و لا راحة و احنا بعيد فبنرجع..
خليك رحوم و حنان و فاتح حضنك دايما..

اوعي تسيبنا انت كمان أو تفقد فينا الأمل و سامحنا و اهدينا..
و أسند ضعفنا بقوتك و حاوط حزننا بسلامك و شدد علي ايدينا بأمانك.