إعمل كراسة وبروز فيها أي حاجة حلوة بتحصلك،
حد قالك كلمة حلوة،
خروجة حلوة مع صحابك،
كتاب حلو قريته،
خلوة حلوة اخدتها فى دير بتحبه ،
فيلم إتفرجت عليه وحبيته،
كورس كان نفسك تاخده وأخدته،
حاجة كنت فاكر إنها بعيدة وقربتلها خطوة،
فنجان قهوة شربته في هدوء من غير دوشة..
الكراسة دي بتفرق أوي وقت ما بتقع، وقت ما بتحس إن فيه حيطة سد، وقت ما بتحس إنها آخر الدنيا وإنها مش هتعدي، لما بتفتحها بتفتكر إنه في حاجات حلوة حصلت،
وإن في حاجات حلوة كمان هتحصل..
لما بتفتحها هتفتكر إنه الحاجات دي حصلت ممكن ما بين أيام إنتَ كنت فاكر إنها النهاية، وأهي عدت وجابت بدايات لحاجات كتير حلوة..
لو في أيام بيبان إنها صعبة ومستحيلة ومفيهاش حاجة حلوة، أول ما اليوم يخلص سجله في الكراسة عشان تفتكر "أد إيه إنتَ قوي.. وممكن تتهز وممكن تزعل.. بس هتقدر تكمل"
