زوادة اليوم : اللّقاء بالرّب من خلال الآخر

[souad jaalouk]

زوادة اليوم: اللقاء بالرب من خلال الآخر

بعد ما ربيو وكبرو، تركو الولاد التلاته بيّن حتى ينطلقو للحياة، وكل واحد يتمّم رسالتو اللي اندعى لإلها.
مرقت حوالي العشر سنين ورجعو الشباب يشقّو ع البيّ. قعّدن الختيار حولو لأنّو إجرَيه ما بقا يحملوه، وصار كل واحد يخبّر ويحكي عن الخبره اللي عاشها بالعالم.
- أنا، قال الأول ـ بنفحة كبريا ـ كتبت كتُب عديدة، وبعتِ ملايين من النسخ.
- إنت عبّيت العالم من الورق، جاوبو البَيّ.
- أنا، قال التاني ـ بعزّة نفس ـ عملت محاضرات بآلاف الأماكن.
- إنت تلّيت الدني حكي، جاوبو البيّ.
تقدّم التالت وقال:
- أنا ما قدرت أعمل شي عظيم، لأنو بأول رحلتي، التقيت بشخص مضيّع طريقو، وبقيت معو كل هالفتره لحد ما اهتدى.
ابتسم البيّ وقال:
- إنت حقيقه عرفت تلتقي بألله.
الزوّاده بتقلّي وبتقلّك، أقرب طريق ت نوصّل لألله هيّ إنّو نعيش المحبه اللي بتقتضي إنّو نفتح عيون قلبنا ع حاجات الآخرين. وما منعرف، يمكن ربنا حابب يلتقي فيك من خلال خيّك الإنسان، ومش حرام تضيّع هالفرصه؟

[Mona Bntalmlk]

ربنا يبارك حياتك وخدمتك مشاركة مميزة

[Mary Naeem]

. وما منعرف، يمكن ربنا حابب يلتقي فيك من خلال خيّك الإنسان، ومش حرام تضيّع هالفرصه؟
ربنا يفرح قلبك

[walaa farouk]

ميرسى على زوادة اليوم