حرامية الاطفال

walaa farouk · رقم المشاركة : ( 1 ) 20 - 01 - 2018, 01:53 PM

حياتهم كانت مليانة خناقات ..
وصوت عالى ومناوشات ..

خلاص بقى تعود ..

لحد ما جه يوم ..
اتغيرت الطريقة ..
اصل الشيطان مابيزهقش ..

اتخانقوا كالعادة ..
وناموا ..

صحى هو تانى يوم الصبح ..
لقى مراته بتقول له ..
بابا اتصل بيا و بيقول لى "ماتخافيش خير"
قال لها .. باباكى وبيقول خير ؟؟؟؟ ..
ربنا يستر ..

وواحد لابس وش الحكمة ..
داخل عشان يحل ..
ماتيجى تقعد معايا انت ومراتك ..
ونتكلم يمكن نلاقى حل ..

ساب بنته ..
واخد مراته وراحوا له ..

فى نص النقاش .. يقرر ..
معلش انتو جوازتكو مش نافعة ..
مراتك هتمشى وتسيبك ..

هتمشى ازاى ..
احنا هنروح سوا ..

وحاول ياخد مراته وينزلوا ..
لقى نفسه بيتمنع بالقوة ..

ورجع البيت لوحده ..
هو و بنته وحيطان البيت ..

وشوية تهديدات .. ونقاشات عقيمة ..
وفجأة .. محضر من قسم البوليس ..
وفيلم يتعمل عليه عشان يخاف ..

وهو مطلوب منه يسلمها بنتهم اللى ماكملتش سنة
قعد يتحايل على الظباط ..
طب بلاش اسلمها فى القسم
قال له للأسف ..
لازم هتسلمها وهتمضى على محضر كمان ..

ووطى على ودنه .. وشوشه ..
خلى بالك دا لمصلحتك ..

الناس اللى انت قدامهم دول ..
ماعندهمش رحمة ..
روح هات بنتك ..

وكأنه فيلم وسيناريو ..

الساعة 2:30 صباحاً ..
والأب داخل شايل بنته نايمة دافيانة فى حضنه ..
واداها لمراته ..
ودمعته متحجرة فى عينيه
اصله مش عارف هيشوفها تانى امتى

ونفس الايد اللى كانت شايلة روحه ..
هى نفس الايد اللى مسكت القلم ..
عشان تمضى على محضر تسليم روحه ..
وعدم تعرض لحد ما تكمل 11 سنين ..

وكلمة زىّ الصاروخ منها
"هتشوف انا هاعمل فيك ايه"
لكن الرد من جوزها كان اقوى
"انتى خلاص عملتى اكبر حاجة ممكن تحصل"

وخرجوا هم التلاتة من القسم فى الفجر
بس اتنين مشيوا فى اتجاه
وهو رجع لوحده
10 ايام مروا ..
وحس انه نفسه يشوف اول فرحته
راح وخبط على بابهم
وييجى الرد ..
معلش روح بيت ناس قرايبنا
وانا اجيبهالك هناك تشوفها

طبعاً احتياطات امن جوا الشقة ..
ولا كأنه مجرم سوابق ..
وناس قاعدة بتتفرج عليه ..
وهو قاعد لوحده بيلاعب بنته ..
وايد تتحرك وتقفل الترباس من جوة ..
قال ايه .. خايفين ياخد بنته ويجرى

يبص لمراته بابتسامة ميتة ..
ويقول لمراته .. باقولك ايه ..

انا مش هاشوف بنتى تانى بالطريقة دى
انا ليه اشوف بنتى فَرجة قدام الناس؟
وييجى ردها بقسوة
انت اللى عملت كدة فى نفسك
وتعدى شهور .. والنار تنطفى
والعصبية تهدا ..
وترجع البنت لحضن ابوها ..
وهى كمان ترجع ..
شوية تحس ان اللى عملته كان صعب ..
وشوية تقول له ..
انت مالك مكبر الموضوع كدة ليه ..
هو انت مابتنساش ..

وتعدّى كام سنة تانيين ..
ويتخانقوا .. وتزعل هى وتمشى
بس تمشى المرة دى من غير بنتها
وبعد فترة .. توحشها البنت
وتطلب تشوفها
وتختار هى بنفسها ..
انها تشوفها فى نفس البيت
وتروح تقعد على نفس الكرسى
اللى قعد عليه الاب من سنين
ويبقوا نفس الناس قاعدين ..
وبرضه بيتفرجوا
وتسأل هى نفس السؤال

انا ليه اشوف بنتى فَرجة قدام الناس؟
وفى عز انفعالها ..
انا هاخد بنتى مش هاسيبها له ..

وييجى الرد من الناس اللى قاعدين
انتى اللى عملتى كدة فى نفسك ..

وكأن المخرج قرر يرجع فلاش باك ..
لنفس الجملة دى من سنين ..

ويكملوا الناس كلامهم ..
هو هياخد بنته وينزل ..

ونفس الايد اللى قفلت الترباس من سنين ..
تتمد تانى وتفتحه ..
والباب اللى كان مقفول ..
عشان ماياخدش بنته وينزل
يتفتح له ..
وقرار الحرية المتأجل ..

اتفضل خد بنتك وروّح ..
واحنا هنتصرف معاها ..

وهو نازل على كل درجة سلم ..
مافيش فى لسانه غير كلمة واحدة
اللى عند ربنا ما بيروحش

وشوية وترجع البيت ..
انا اسفة ..
ماكنتش اعرف ..
ان اللى عملته فيك كان صعب قوى كدة ..
لما عشته .. حسيت بيه ..
ويضحك الاب بينه وبين نفسه وهو حاضن بنته ..
وهو خارج شايلها من عند الطبيب النفسى
اللى بيعالجها من تأثير اللى حصل فيها
وقال لها .. ولا يهمك .............

الحكاية لسة ماخلصتش ..
بس اللى حصل بعد كدة
مايختلفش كتير عن اللى حصل قبل كدة

م الاخر كدة ..
لو ولادكم سلاح ..
هتحاربو بيه بعض
يبقى انتو ماتستاهلوش يبقى عندكم النعمة دى ..

ولو ولادكم جايزة ..
هتدوها لبعض لو عملتوا الى عليكم
يبقى انتو ماتستاهلوش يبقى عندكم النعمة دى ..

ولو ولادكم عصاية ..
هتضربوا بها بعض لو عملتوا حاجة غلط
يبقى انتوا ماتستاهلوش

ولو ولادكم الجزرة ..
اللى هتربطوها قدام الحمار عشان يمشى عِدِل
يبقى انتوا ماتستاهلوش

لكل اب وام ..
الغباء اتحكم فى تفكيرهم ..
والسلطة والكبرياء عموا عينيهم ..
عن انهم يشوفوا الحقيقة ..

عايز تعرف انت ايه بالنسبة لابنك ..
تعالى لابنك كدة وهو عمره سنة ..
اديله طبق فيه بنزين ..
واديله عود كبريت مولع .. وانت بتضحك ..
هيبص فى عينيك ويضحك هو كمان
وهياخد منك الكبريت المولع بمنتهى الثقة ..
اللى هيفهم المثل ..
هيعرف المعنى اللى وراه

لو ثقة ولادكم فيكم .. ثقة عمياء
خليكو انتو مفتحين ..
وعلى أد الثقة دى ..

انتو بتسرقوهم ..
بس عارفين انتو بتسرقوهم من مين؟ ..

بتسرقوهم من ربنا ..
عشان هم بتوعه ..
انتو مالكوش اى فضل فيهم ..

اذا كان اللى بيسرق من بنى آدم ..
بتطبق عليه عقوبة ..

مابالكم باللى بيسرق من ربنا ..
يا ويله ..

لو قلبكم بيتوجع لما بتسمعوا ان طفل اتخطف ..
طب مانتو بتخطفوهم من بعض ..

لو مش عارفين قيمة اللى بتعملوه ..
فيه غيركم نفسه فى ضُفر طفل م اللى بتقصّوه ..

الكلام اللى فوق ده مش تأليف ..

الكلام ده حقيقى جدااا ...

أمير تادرس

Mary Naeem · 20 - 01 - 2018, 02:02 PM

لو مش عارفين قيمة اللى بتعملوه ..
فيه غيركم نفسه فى ضُفر طفل م اللى بتقصّوه ..

الكلام اللى فوق ده مش تأليف ..

الكلام ده حقيقى جدااا ...

ربنا يبارك حياتك

walaa farouk · 20 - 01 - 2018, 08:10 PM

ميرسى على مرورك الغالى حرامية الاطفال