لسه بيحبك زيهم

[walaa farouk]

شخصيات، فيه منهم اللي بنختار نفتخر بيهم، واللي مش بنحب نقرّب منهم

، بس رغم ده كله، يسوع اختار يتكتبوا في سلسة نسبه!

ماتتكسفش من غلطاتك، لسه بيحبك زيهم

يهوذا ابن يعقوب،





الجد الأكبر لسبط يهوذا، وليه مكانة عظيمة في سلسلة نسب المسيح، ماتقالش عنه كلام كتير في الكتاب المقدس، عمل حاجات حلوة وكان شهم مع يوسف أخوه..
لكن الغلط اللي وقع فيه بسبب إنه موفاش بوعده لثامار امرأة ابنه اللي مات، خلاه يقع في خطية كبيرة معاها وولدت ثامار منه ولدين توأم اسمهم: فارص وزارح



بوعز



من الشخصيات المشهورة المهمة في سلسة النسب، كان غني وعنده ثروة كبيرة ورضي إن واحدة غريبة تيجي تاكل من المحصول بتاعه وهي حتى ماتعرفوش ولا هو يعرفها،بس لما سمع عنها وعن قصتها مع حماتها اختار انها تكون مراته واتجوزها ومن نسله جه داود الملك ومن نسل داود جه المسيح



رحبعام



مع إنه ابن سليمان أحكم رجل في المملكة إلا إنه مكانش حكيم بالمرة، مشي عكس الطريق اللي أبوه مشي فيه، واختار إنه يسمع كلام أصحابه اللي بعد مشورتهم الضالة المملكة اتقسمت سبطين "يهوذا وبنيامين" واسمهم مملكة يهوذا والعشرة أسباط التانيين "اسمهم مملكة إسرائيل" ومن بعدها الشعب راح في سكة شر رهيبة وبسببها عاقبهم الله بالسبي.



حزقيا



ابن آحاز الملك واشترك هو وأبوه في الحكم وبما إن آحاز كان عاجز عن إنه يحكم وياخد قرارت فعلية، فاضطر حزقيا هو اللي يبقى الملك الفعلي للبلد، واتقال إنه ابتدا الحكم وهو عنده 25 سنة ومن وقتها وهو كرّس حياته لله وأول حاجة عملها رمم الهيكل وطهره وشال التماثيل اللي اتعودوا يعبدوها وشالوا عينيهم من على الله



منسى




ابن حزقيا الملك ومع إن أبوه كان رجل تقي ورجع الشعب في عصره يقرب من ربنا تاني، إلا إن ابنه كان عكسه تماماً وأول ما مسك العرش أضل الشعب وبقى يعلمهم تعاليم مختلفة عن كلام الله وخلاهم يقدموا تقدِمات وذبائح لكل جند السماء، وابتدا يبعد الشعب عن عبادة الله

يوسف




الشخص الأمين اللي الله بنفسه استأمنه على القديسة العذراء مريم وإنه يهتم بالطفل يسوع، كان يهودي تقي ومن بداية ذكر اسمه في قصة الميلاد اتقال إنه لما عرف إن خطيبته حامل مرضيش يفضحها واختار إنه يسيبها في هدوء، شخصية زي دي قليل نلاقيها دلوقتي، قلبه حقيقي كان كامل قدام الله

وفي النهاية كل الشخصيات دي اتكتب عنها بالتفصيل لأن الله عايز يوصل رسالة مهمة، مهما كانت حالتك الله يقدر يغيرك ويستخدمك وليك فرصة تانية علشان تختبر الميلاد في حياتك

[Mary Naeem]

مهما كانت حالتك الله يقدر يغيرك

ويستخدمك وليك فرصة تانية

علشان تختبر الميلاد في حياتك

ربنا يبارك حياتك