الدكتور أمل ياسر وتحذير خطير كارثة المضادات الحيوية

[Mary Naeem]

الدكتور أمل ياسر وتحذير خطير كارثة المضادات الحيوية

تنشر دكتوره الاطفال أمل ياسر كارثة المضادات الحيوية
قابلت فئتين من الاهالي :
الفئة الاولي :
ناس بتدي لولادها مضاد حيوي عمال علي بطال واي نوع واي حد يوصفلها مضاد تديه لولادها ، عايزة اقولكم شوية قواعد :
1-المضاد لازم دكتور يكتبه لأن لكل بكتيريا نوع مناسب من المضاد الدكتور هو اللي عارفه ، مش معني ان ابنك خف المرة اللي فاتت علي مضاد يبقي ده اللي بيريحه ، حتي لو عنده نفس الاعراض مش شرط يبقي نفس نوع البكتيريا او نفس الدور ، ممنوع تكرري المضاد ،
لأن الدور بيختلف والجرعة بتختلف حسب وزن ابنك.
2-المضاد مش علاج لكل الامراض ، كتير بتدي ابنك مضاد وهو مش محتاجه ودي مصيبة لأن البكتيريا بعد كده هتبقي مقاومة لكل انواع المضادات اللي هو اخدها ومفيش مضاد هيجيب نتيجة معاه بعد كده وده ممكن يؤدي للوفاة لا قدر الله.
3-المضاد مش لعبة اي واحدة تقولك المضاد ده جاب نتيجة مع ابني تروحي تديه لابنك ، ولا اي حد يوصفلك اي مضاد بأي جرعة ، حتي لو دكتور ماينفعش يوصف مضاد او حتي اي دواء من غير مايفحص الطفل ، لازم يكشف علي الطفل ويفحصه كويس عشان التشخيص يبقي مظبوط ويكتب المضاد المناسب ( ده لو محتاج مضاد ) والجرعة المناسبة حسب وزن طفلك وحسب حالته المرضية.
4-مش معني ان الطفل حرارته عليت يبقي محتاج مضاد ، لأن في امراض كتير سببها فيروس وبيعلي الحرارة جامد جدا كمان ولمدة طويلة والفيروس مش علاجه مضاد خالص ، والحرارة علاجها خافض مش مضاد والدكتور بيقدر يحدد اذا كان بكتيريا ولا فيروس بالكشف علي الطفل.
5-ياريت ابنك لما يتعب توديه لدكتور ده هيبقي افضله واوفرلك صدقيني ، مش لازم تديله كل الادوية والوصفات اللي تتوصفلك وتسألي في الصيدلية ويدوكي ادوية وحقن مش مناسبة وفي الاخر هتروحي لدكتور وتجيبي ادوية جديدة بعد مايكون ابنك اتهد من كتر الادوية ومناعته ادمرت ، ارحموا ولادكم.
6-مفيش حاجة اسمها نوقف المضاد لما الاعراض تخف ، لازم تستمري علي المضاد المدة اللي الدكتور محددها حتي لو الاعراض خفت.
7-مفيش حاجة اسمها ادي جرعة او تركيز اقل كل 6 ساعات بدل كل 12 ساعة ، ده عك لأن كل مضاد ليه مدي بيشتغل فيه الدكتور هو اللي عارفه غير كده مالوش لازمة ، او واحدة يصعب عليها ابنها وتديله الجرعة كل 24 ساعة بدل كل 12 ساعة ، انتي كده بتضريه مش بتفيديه لأن المضاد مش هيجيب نتيجة وهيضعفه علي الفاضي وهيحتاج مضاد تاني.
الفئة التانية :
ناس عندها فوبيا من المضاد ومش عايزة تدي للطفل اي مضاد كأنه سم وعايزة الطفل يقاوم بمناعته زي الدول المتقدمة،
احب اقولكم احنا في مصر يعني الميكروب واخد علي كل المضادات الحيوية وبيقاومها كمان والجو مليان ميكروبات والعدوي سهلة جدا، مش معني كده اني بشجع علي المضاد بالعكس زي ماقلت كتير بيبقي الطفل مش محتاج لمضاد حيوي.
لكن في بعض الأحيان بيبقي لازم ياخد مضاد وهو ده العلاج المناسب والضروري فبلاش الخوف الشديد من المضاد بشرط ان يكون
1-دكتور كشف عليه وشخصه
2-كتب النوع المناسب للبكتيريا
3- كتب الجرعة المناسبة للحالة والوزن والتركيز المناسب
4-كتب المدة المناسبة اللي هيستمر فيها علي المضاد
الخلاصة
المضاد الحيوي سلاح ذو حدين مفيد وضروري جدا لبعض الحالات ،
ومضر جدا لو اساءنا استخدامه.
د / أمل ياسر حنا
اخصائية طب الاطفال وحديثي الولادة
والحميات وتغذية الأطفال ومتابعة النمو
فيجب ان نحترس من ذلك والحفاظ على اطفالنا