مبقدرش أخبي عليه حاجة

[walaa farouk]

كلنا نفسنا يكون عندنا الشخص ده في حياتنا، حقيقي الصاحب ده كنز !!


الأصحاب القريبين من بعض أوي مبيقدروش فعلاً يخبوا على بعض حاجة، وأوقات كتير ( ودي حصلت معايا كتير أوي بصراحة) مع العِشرة الطويلة بيحسوا ببعض حتى من غير ما يتكلموا، وممكن من صوتهم في التليفون يقدروا يفهموا إذا كانوا متضايقين أو فرحانين، كلنا نفسنا أو نتمنى يكون عندنا الشخص ده في حياتنا، أنا مش عارف كام حد عرف يلاقيه، بس حقيقي الصاحب اللي زي كده كنز..

كلنا عارفين إبراهيم وسمعنا عنه كتير، لكن دائمًا بقف عند الجملة اللي الله قالها هل أخفي عن عبدي ابراهيم ما أنا فاعل؟، وابتدت هنا العلاقة ما بين الله وابراهيم تاخد مسار تاني، الأصحاب بحق، الله بيحب ابراهيم لدرجة أنه مش قادر يخبي عليه حاجة هيعملها ( أن جاز التعبير )، ولو هفكر فيها دي علاقة عميقة وأكيد ابراهيم موصلش للحتة دي بسهولة.

الجملة المميزة أوي اللي الله علشانها قال الله أنه مش عايز يخبي عليه حاجة هي “لِأَنِّي عَرَفْتُهُ” ومعناها ” لأني اخترته”، ولو هتسأل اشمعنا الله اختاره هو؟، يعني الله هيميز حد عن حد؟ هقولك لأ طبعاً الله مش بيميز لكن الفكرة لغاية فين أنت فاتح نفسك على الله وقادر تفهمه وتتواصل معاه صح، اللي عدى فيه ابراهيم علشان يوصل للمرحلة دي مكانش سهل، اختبارات رهيبة وصعبة، ولأن الله عارف أنه هيقدر يعدي فيها فضل مكمل معاه، ولما انفصل لوط عن ابراهيم وأختار الأرض الواسعة الكبيرة، ساعتها ابراهيم أختار المكان اللي عايزه الله، كانت دايمًا ودانه مفتوحة على صوت الله وقادر يميزه، الله اختار ابراهيم لأن قلبه وصفاته وتصرفاته بقت شبه الله ، صحيح ابراهيم غلط في مواقف كتير لأنه بطبيعته بشر لكن إتجاه قلبه العام بيحب الله من كل قلبه

هل من ابراهيم:-

هل صعب أن الله يلاقي النهاردة شخص مريح يقدر يتواصل معاه ويقوله على اللي عايزه زي ابراهيم، لو عايز تكون زيه وعاجبك شكل العلاقة دي مع الله ابدأ بنفسك، اتعلم تقعد كل يوم شوية مع ربنا، اتكلم معاه، هتلاقيه بيرد عليك، يمكن يكلمك بشكل واضح في قصة تسمعها، أو في ترنيمة أو في كتاب تقراه وأكيد هيكلمك من خلال الكتاب المقدس، صلي كل يوم وقوله يا رب أنا عايز وداني وقلبي يكونوا مفتوحين وأقدر أميز صوتك

[Mary Naeem]

يا رب أنا عايز وداني وقلبي يكونوا مفتوحين وأقدر أميز صوتك
ربنا يفرح قلبك

[walaa farouk]

ميرسى كتير على مرورك الغالى