نظرة واحدة

walaa farouk · رقم المشاركة : ( 1 ) 22 - 11 - 2017, 05:56 PM

حلموا بيك ..
وبشكلك ولبسك ..
تخيلوا صوتك ولعبك ..
وضبوا لك اوضتك ..
وجهزوا لك مشط وفرشة لشعرك ..

ولما جيت ..
شالوك وضحكوا فى وشك ..
وبقوا يبدلوك من ايد لايد ..
من كتر مانت فى عينيهم حاجة حلوة ..

ولما ضحكت اول مرة ..
اتنططوا من الفرحة ..
وبقوا يصوروك ..
شوية فيديو وشوية صور ..

اول سِنّة ظهرت فى بقك ..
واول خطوة مشيتها ..
اول كلمة نطقتها ..
واول حاجة مسكتها بايدك وشلتها ..

ومع كل حركة جديدة ..
بوسة وحضن ..
وأحلى كلام تسمعه ..
وانت مش فاهم منه ولا كلمة ..
بس حاسس بيه ..

مافيش تفصيلة ماعاشوهاش معاك ..
كنت انت اللى بتتحكم فى مودهم ..

زعلك بيتعبهم ..
فرحتك بتريحهم ..
اكلك ونومك بيطمنهم ..

بس خلاص بقى ..
فوق من حلمك ..
واعمل حسابك ..
الصورة اللى انت عايش فيها ..
مش هتكمل معاك ..

وماتسألنيش ليه ..
هو كدة الحال لازم يتبدل ..

ولا عادت ضحكتك بتفرق ..
ولا زعلك ..

مانت كبرت ..

ولا عادت تصرفاتك ليها اهمية ..
الا فى حالتين ..
لو اتصرفت كويس ..
تبقى فخر ونتكلم عنك ..
ولو اتصرفت غلط ..
تسمع لوم وكأنك انت اللى بتربى نفسك ..

مانت كبرت ..

ترجع تشتاق للبوسة والحضن بتوع زمان ..
ماتلاقيهمش ..

مانت كبرت ..

بس هو كويس ..
انك لسة لحد دلوقتى ..
بتتحكم فى مودهم ..
بس مش لصالحك .. لصالحهم ..

يعنى لو شايلين هموم الدنيا ..
ينفجروا فيك ..
والحجة .. معلش اصلى مضغوط ..
طب اشمعنى انا ..

مانت كبرت ..

نظرة الشر فى عينيهم ..
لما ييجوا يوبخوك ..
بترعبك .. وهم عارفين ..
ومكملين ..

مانت كبرت ..

الفاظ التهديد والوعيد ..
والحرمان والعقاب ..
بتدمر نفسيتك .. وهم عارفين ..
ومكملين ..

مانت كبرت ..

تشيل اخطاء مش بتاعتك ..
وتتحمل سوء اختيارهم ..
يلاعبوا بعض بيك ..
عشان يكسبوا جولات ..
بيقطعوك .. وهم عارفين ..
ومكملين ..

مانت كبرت ..

وياسلام لو غلطت ..
وصورتهم اتهزت ..
مافيش مانع ابدا ..
تترزع على الكرسى مكانك ..
وتبقى مضطر تسمع اعلى صوت ..
واقسى كلام ..
ومافيش مانع تتلطش ..
ولو فكرت تفتح بقك ..
نظرة الاستنكار هتوقفك ..
هو انت كمان عايز ترد ..
لا تسكت وتستحمل ..

مانت كبرت ..

زمان ماكنتش بتفهم كلامهم ..
كنت صغير .. بس كنت بتحس بيه ..
دلوقتى من نظرة بيتنقل لك احساسهم ..
ورغم انك بقيت بتفهم ..
بس خلاص .. الكلام الحلو راحت عليه ..

مانت كبرت ..

وسط كل ده ..
انت ماعندكش غير نظرة واحدة ..

بتحط فيها خوفك ورعبك ..
حزنك على اللى كان زمان بيلاعبك ..
ودلوقتى مش داريان برعشة قلبك ..

نظرة واحدة بتحط فيها قلقك ..
من اللى كان بيحميك من كل شئ قالقك ..
ودلوقتى مش حاسس بيك ولا حتى سامعك ..

نظرة واحدة بتقول فيها اللى جواك ..
اصل كل واحد فيهم نسى يوم ما اتمناك ..
ودلوقتى مش فارق معاهم لو فيه حاجة واجعاك ..

وضبوا لك اوضتك من صغرك ..
ونسيوا يوضبوا نفوسهم عشان خاطرك ..

جهزوا لك شنط وملوها بلعبك ..
ونسيوا يجيبوا لك شنط ترمى فيها تعبك ..

عملوا كل اللى يعجبهم هم .. لاستقبالك ..
ونسيوا يحجزوا لنفسهم مكان جواك وفى خيالك ..

مافيش حاجة تسوى نظرة الخوف ..
اللى بتتزرع فى عينين ولادنا ..
بسبب عجزنا وفشلنا ..
اللى هم مضطرين يشيلوا اسبابه ..

اسف لو كلامى جه على الوجع ..
بس وجع كلامى مايسواش حاجة ..
قدام كل ملاك من دول اتوجع ..

سؤال ربنا عن ولادنا ..
سؤال مرعب .

Mary Naeem · 23 - 11 - 2017, 01:45 PM

اسف لو كلامى جه على الوجع ..
بس وجع كلامى مايسواش حاجة ..
قدام كل ملاك من دول اتوجع ..

walaa farouk · 23 - 11 - 2017, 09:02 PM

ميرسى على مرورك الغالى نظرة واحدة