الحقوها

[walaa farouk]

من جواه كان زعلان ..
وهو شايفها بتلم شنطها ..
بس كان جواه احساس تانى ..
انه عايزها تمشى ..
من كتر ما تعب منها ..
او زى ما كان بيقول ..
بسببها ..
بصت له ..
هو انت متضايق انى هامشى ؟ ..
عايزة الصراحة ..
انا صعبان عليا انك ماشية ..
بس كل ما افتكر التعب اللى تعبته معاكى ..
اقول لنفسى ..
اكيد هانبسط اكتر لما تمشى ..
حبست دموعها ..
ومالقيتش كلام ترد بيه ..
وزى ما يكون جواه بركان وانفجر ..
القلق اللى عشته ..
والزعل اللى كان ملازمنى ..
كل ده كنتى انتى السبب فيه ..
نشفت دموعها بايديها ..
وبصت له ..
هو انت ليه بتتكلم كدة؟ ..
هو انت مافرحتش معايا خالص ؟
كل الايام اللى عشناها سوا ..
زعل وقلق بس ..
مافرحتش خالص ؟؟؟ ..
طب ماحنا احتفلنا سوا بعيد ميلادك ..
مافرحتش فيه؟
ويوم طلوعك من المستشفى بخير ..
مافرحتش فيه؟
ولما قابلت البنت اللى خطبتها ..
مافرحتش؟
ولما سبت شغلك ..
ولقيت ناس كتير واقفة جنبك ..
مافرحتش ؟
طب فاكر لما ...
استنى استنى .. معاكى حق ..
انا اسف ..
مش قصدى انكر كل اللى عشناه سوا ..
بس مش عارف ليه ..
فجأة قفلت منك وعايزك تمشى ..
بصت له بسخرية ..
وضحكت وهى بتكمل تحضير شنطتها ..
نفس اللى بتعمله مع كل واحدة ..
زى ما اللى قبلى مشيت وانا جيت ..
اللى هتيجى مكانى برضه هتقعد شوية وتمشى ..
وانت هتفضل تقول نفس الكلام ..
صدقنى العيب فيك
اقولك على حاجة ..
انت مستنى الفرح ييجيلك من برة ..
وانت اللى معاك بذرته ..
ومش راضى تزرعها ..
لو عايز اللى هتيجى مكانى تفرّحك
كنت حطيت بذرة الفرح معايا ..
لو عايز اللى هتيجى مكانى تريحك
كنت حطيت بذرة الراحة وانت معايا ..
انا ماليش ذنب فى اللى بيحصل لك
انا اللى عليا باعمله ..
باديلك كل اللى عندى ..
مش بابخل عليك بأى دقيقة حتى ..
بس انت كل مرة تفضل تضيع وقت
وادينى اهو ماشية ..
وانت عمّال تقسى عليا بكلامك
عموماً .. اللى حصل حصل ..
خلاص مافيش وقت
بس ليا طلب عندك
اللى هتيجى مكانى ..
مالهاش ذنب فى اللى حصل معايا
ماتعاملهاش بنفس الطريقة ..
جرّب تغير الطريقة ..
ماتقعدش تفتكر الوحش اللى حصل معايا ..
وتحكيهولها ..
سيبها تجيب لك اللى عندها ..
من غير ماتحس انها المفروض تعالج اخطاء مش بتاعتها ..
حبها ..
هتلاقيها مالية الدنيا حواليك حب
اضحك لها ..
هتلاقيها بتضحك فى وشك علطول
لما خلصت كلامها ..
كان واقف قدامها مش لاقى رد ..
كل كلامها صح ..
جرى عليها وقال لها ..
انا عارف ان الاسف ..
مش هيرجع الايام اللى فاتت
بس اوعدك انى هاسمع كلامك بالحرف
فضلوا يتكلموا لحد الساعة ما قربت على 12 بالليل
وكان هو فى سابع نومة
قامت شالت شنطتها وراحت ناحية سريره
وشوشته فى ودنه وقالت له
انا ماشية خلاص .. ومش راجعة تانى
هتصحى تلاقى واحدة تانية مكانى
زى ماتفقنا بقى ..
وابتدت الساعة تدق 12
ومع اخر دقة .. كانت هى اختفت
صحى من نومه لقاها بتضحك له
قالت له اعرفك بنفسى ..
انا 2018
جايبة لك معايا ..
365 يوم تعمل فيهم اللى انت عايزه
ضحك لها وقال لها ..
وانا مش هاضيع يوم ..
من غير ماعمل حاجة تفرحنى وتفرحك
وابتدوا مع بعض قصة ..
لسة مش عارفين احداثها
والقصة دى هتبدأ معاك انت كمان ..
احنا فى اخر شهور فى السنة ..
خد قرارك من دلوقتى ..
وارمى البذور اللى هتقدر عليها ..
حاسب نفسك على كل اللى حصل ..
وكأنك بتقفل دفاتر السنة اللى فاتت ..
شوف انت كسبت ايه ..
وخسرت مين ..
شوف انت فرحت امتى ..
واتسببت فى زعل مين ..
شوف انت نجحت فى ايه ..
وأحبطت مين ..
م الاخر ..
شوف نفسك على حقيقتها ..
ساعتها هتعرف ..
فين البذور اللى محتاج تزرعها ..
وفين الزرع اللى محتاج تقلعه من حياتك ..
2017 لسة موجودة ..
الحقوها ..
كل سنة وانتو طيبين مقدماً ..

[Mary Naeem]

وفين الزرع اللى محتاج تقلعه من حياتك ..
2017 لسة موجودة ..
الحقوها ..
كل سنة وانتو طيبين مقدماً ..

[walaa farouk]

ميرسى على مرورك الغالى