كاهن لمده أسبوع

[walaa farouk]

عزيزى ممكن تبقي
كاهن لمدة أسبوع واحد

*حاول تتحمل يوم يبدأ بصلوات القداس وتناول شعب كامل وتفضل تنزل (تميل) تناول الأطفال وبعدها تناول الكبار .

وبعدها احتمال تروح تناول المرضي
وبعد ما تخلص القداس غالبا مش هتلحق تفطر عشان هيطلعلك مليون حاجه مع الشعب .

* حاول تاخد اعترافات شعب كامل بجميع أعماره بكل مشاكله وخليك عارف يعني إيه مشاكل يعني ناس مش عايزه تتوب وأبونا يفضل معاهم طول عمرهم
ومشاكل الطلاق او المشاكل الزواج اللي بتفضل طول العمر ومش بتتحل بسهوله
أو مشاكل الحب بين الشباب او البنات والولاد اللي ممكن يتضحك عليهم باي شكل دماغك راحت ليه
او مشاكل الناس إللي مش لاقيه شغل وفاكره ان أبونا معاه خدمة وظايف مصر والسفر للخارج
فكر في اي مشكله وحطها في مكتب أبونا

* حاول تبعد عن بيتك ومراتك وعيالك يوم كامل او يمكن اسبوع او يمكن سنين مش بيعرفوا عنك حاجه غير يشوفوك بالصدفه او يشوفوك نايم فقط

*حاول تفكر ترضي كل الناس ودي حاجه مستحيله طبعا

* حاول تروح كل البيوت افتقاد تصليلهم وتشوف مشاكلهم وترضيهم وتقدم ليهم كل متطلباتهم

* حاول تصلي كل الصلوات الطقسيه من قنديل ل صلوات الاكليل لصلاة الطشت . ل صلوات الجناز

* حاول تشوف وتحضر كل خدمات الكنيسه او علي الاقل ترتبها مع الخدام او تشوف مشاكل الخدام والانقسامات اللي عندهم
او تشوف فكرة توزيع الخدمه
وخدمات الرحلات والمؤتمرات واي حاجه شبه كده وخليك فاكر ان اى حاجه بتحصل غلط أبونا هو اللي بيتسأل عليها مع انه أصلا يمكن مكنش معاهم

* حاول تشوف احتياجات خدمة إخوة الرب واحتياجاتهم اللي مش بتخلص

* حاول في وسط كل ده تدور علي خلاص نفسك او تريح دماغك شويه عشان أعصابك تهدأ من كل التوتر ده

* حاول تشوف العظات والمحاضرات اللي عليك جوه الكنيسه وبره الكنيسه

* حاول تشتغل كهربائي وبنا وحداد وبتاع ميديا وسباك واي حاجه وممكن تشتغلها عشان طبعا انت المسؤل عن الكنيسه واي خلل هيحصل الناس هتبدا تشتكي لك

*.٠ حاول تتماسك أعصابك دايماً ومفيش حاجه اسمها ان تفضفض او تشتكي او تسيب الكهنوت او مثلا تاخد اجازه بدون مرتب
انت أخرك تعترف وتشكي همك لربنا

* حاول تحبس نفسك في اي وقت فاضي عشان مفيش حاجة اسمها انك تخرج انت والمدام لأن الناس كلها مش هتسيبك
وكمان مراتك والاولاد لو خرجوا من غيرك مفروض عليهم قوانين صارمه من الناس في اللبس والأكل والكلام

* حاول متجبش او متشتريش اي حاجه لنفسك او حتي لبيتك بالفلوس اللي انت واخدها ومحوشها من مرتبك عشان في ناس كتير هتقول عليك واخدهم من فلوس الكنيسه

* حاول متعاملش مراتك ولا ولادك كويس ولا حتي تعاملهم زي ما بتعامل الناس عشان هيقولوا عليك بتفرق ولادك عن الناس

* حاول متتعبش ولا يجيلك اي مرض مع ان كل الكهنه غالبا بيجلهم السكر والضغط والقلب وغالبا بيجلهم جلطات واكيد عندهم انزلاق غضروفي في الفقرات
ده غير الحساسيه الدائمه للجهاز التنفسي بسبب البخور وطبعا الكوليسترول بيزيد هو كمان
وطبعا الخشونه اللي عمرها ما هتخف
غير شويه حاجات تانيه كتير
ومع ذلك
ممنوع الراحه لأن الشعب مش هيسيبك تستريح أبدأ
* حاول انك تشوف الناس إللى فى الشارع بيبصوا لك بقرف وممكن تتشتم و يتم البصاق عليك حتى وانت راكب عربيتك والأكثر ان تحتمل بفرح او تنزل تلقى عربيتك متجرحة فى كل حته أوفى مسمار فى الكوتش طولة 20سم و كل ده بس علشان انت كاهن

* حاول انك تكون رجل أمن علسان تتعامل مع أمن الدولة والداخلية او تكون حكيم علشان تتعامل مع السلفين والإخوان إللى اصلا بيكفروك ويحللون قتلك
اخيرا * حاول تقوم بافتقاد أسر وعمل قناديل لها وهى لا بتيجى الكنيسة ولا حتى بيفكروا يجوا ولو قابلوا حد يقولوا ابونا من زمان ما زرناش وانت ممكن تكون عندهم من شهر بس نسيوا انك زرتهم

( كل الكلام اللي أنا كتبته ده مجرد جزء من حياة الكهنه ممكن الواحد يكتب قدهم عشر مرات )
بس للاسف الكلام ده مش هيفرق غير مع الناس اللي قلبها نقى
اشكركم

حاول تصلي للكهنه ربنا يساعدهم علي اللي هما فيه

[Mary Naeem]

حاول تصلي للكهنه ربنا يساعدهم علي اللي هما فيه
ممكن تبقي كاهن لمدة أسبوع واحد