اسكت ..ابكم

[sama smsma]

تنويعات علي اوتار انجيل مرقس
نغمة ١٧ تتمة اصحاح ٤
اسكت ..ابكم
وَقَالَ لَهُمْ فِي ذلِكَ الْيَوْمِ لَمَّا كَانَ الْمَسَاءُ: «لِنَجْتَزْ إِلَى الْعَبْرِ».
36 فَصَرَفُوا الْجَمْعَ وَأَخَذُوهُ كَمَا كَانَ فِي السَّفِينَةِ. وَكَانَتْ مَعَهُ أَيْضًا سُفُنٌ أُخْرَى صَغِيرَةٌ.
37 فَحَدَثَ نَوْءُ رِيحٍ عَظِيمٌ، فَكَانَتِ الأَمْوَاجُ تَضْرِبُ إِلَى السَّفِينَةِ حَتَّى صَارَتْ تَمْتَلِئُ.
38 وَكَانَ هُوَ فِي الْمُؤَخَّرِ عَلَى وِسَادَةٍ نَائِمًا. فَأَيْقَظُوهُ وَقَالُوا لَهُ: «يَا مُعَلِّمُ، أَمَا يَهُمُّكَ أَنَّنَا نَهْلِكُ؟»
39 فَقَامَ وَانْتَهَرَ الرِّيحَ، وَقَالَ لِلْبَحْرِ: «اسْكُتْ! اِبْكَمْ!». فَسَكَنَتِ الرِّيحُ وَصَارَ هُدُوءٌ عَظِيمٌ.
40 وَقَالَ لَهُمْ: «مَا بَالُكُمْ خَائِفِينَ هكَذَا؟ كَيْفَ لاَ إِيمَانَ لَكُمْ؟»
41 فَخَافُوا خَوْفًا عَظِيمًا، وَقَالُوا بَعْضُهُمْ لِبَعْضٍ: «مَنْ هُوَ هذَا؟ فَإِنَّ الرِّيحَ أَيْضًا وَالْبَحْرَ يُطِيعَانِهِ!».
الحدث ده كلنا عارفينه بس خلينا نشاور علي كام حاجة...
وَكَانَ هُوَ فِي الْمُؤَخَّرِ عَلَى وِسَادَةٍ نَائِمًا....الكتاب قال نايم علي وسادة ...يعني مخدة ...تفتكر يعني الموضوع مستاهل أنه يقول نايم علي مخدة ...عادي ما كل الناس بتنام علي مخدة ..ليه يذكرها؟! لانها في الحقيقة للمسيح مش عادي ..كأنها حدث طاريء ..لان ابن الانسان ما كنش عنده مكان يسند فيه راسه..ديما يجول يصنع خيرا و بعدين يطلع يصلي في الجبل و يخطف ساعات نوم قليلة ..
الحاجة التانية ...ليه التلاميذ اول ما البحر هاج ما راحوش يصحوه ..؟! كأنهم نسيوا أنه الخالق و المعجزات .. و اعتمدوا علي خبراتهم ماهم بحارة و صيادين ..اخر واحد نروحله ربنا ..نحاول و نجاهد و معارف و واسطة و تدابير و لما نفشل نروحله و نقول ربنا يتصرف بقة احنا تعبنا ...!!! طب من الاول ...لا.. نسيبه في مؤخر المركب ..في مؤخر حياتنا .. و آخر المتمة نعاتبه ..و هو سايبنا ليه ..تعبنا ..اتخنقنا ...طب من الاول ..و طالما المسيح قال إن ليس لهم ايمان يبقي فعلا كانوا مش مصدقين أنه يقدر ...كتير نقول أيوة بس بالعقل كده يعني ربنا حيحلها ازااااي؟! ..بالعقل ..؟!! لا ربنا فوق العقل و فوق المنطق ..ربنا يشق في البحر طريق ...ربنا يقدر يشبع ألوف و لو كانوا ملايين برضه كان شبعهم بالخمس خبزات و سمكتين ...اطلب و عمق طلبك ..ربنا يقدر يشتغل في تفاصيل حياتنا و يهتم باللي نتصور أنه مش مهم ...تتصور لما بطرس اتسجن و بعتله ملاك يخرجه يقول للملاك خد بالك لما تصحيه قول له البس شبشبك ...و ده وقته !!! هو كده ربنا يدلل أولاده ...يصعب عليا لما ابقي ماشي معايا بنتي و تقولي خايفة ارد بمنتهي الحسم بابا معاكي و خايفة..؟!يسوع يقدر ..خد بالك بكلمة قالها للبحر و الريح ..كاروك بالعبرية أو ابكم أو اخرس ..بس كده ..ااه لو فيه رياح و موج في البيت و لا الشغل و لا بين أصحاب و لا بين زوجين و طلع واحد منهم ناصح و جري علي المذبح و صحاه بدموعه و صلاته و قاله الحقنا المركب حيغرق و امتلىء.. و قبل ما نتفذلك و ده يقول أنا حعلمها الادب و دي تقول حنكد عليه عيشته و لا ابن ينفض و يضيع و لا بنت تترمي في عاطفة مش مظبوطة ..يستيقظ و يقول كلمة واحدة ..ابكم ...ربنا يقدر يقول للغلاء ابكم ..ربنا يقدر يقول لقلة الشغل ابكم ..ربنا يقدر يقول للخطية و لا عادة و لا شهوة مجننة الواحد و كسراه ابكم ..حطوا ربنا في مقدمة السفينة و خلوه ربان الرحلة مش بالفهلوة و الخبرة حتمشي ...
خدت بالك من السفن الصغيرة اللي طلعت جنب سفينة المسيح ..اهم دول ما حسبوهاش..مشيوا وراه و خلاص ..اكيد نالهم من الريح و الموج اكتر من سفينة المسيح بس تتصور حصلت لهم نفس النجاة ..طول ما انت في الدايرة فرصة انقاذك قائمة ..مش عارف تبقي في سفينة المسيح خليك جنبه ...قريب منه ..و إن لم تعرفي اخرجي علي اثار الغنم ..
ساعات لما نفسي تكتئب و اخويا يقولي وصلنا للسن ده و لسه ما عملناش حاجة و لا شوية فلوس نركنها..يرجع تاني و يقول نشكر ربنا شايلنا و مغطينا ...الاحسن نعمل حاجة نركنها و نتسند عليها و هو يبقي في مؤخر السفينة و لا نلقي عليه اتعابنا و بكلمة منه يعطي الحل و المنفذ ... باسم يسوع تقدر تقول للشيطان ابكم ...باسم يسوع ليك نجاة حتي لو زي حالاتي اتمليت و علي وشك الغرق من خطايا و شهوات و اوجاع ...
دورنا بس نصحيه..هذا الذي لا ينعس و لا ينام ..اللي نام بالجسد لكن لاهوته لا ينام ...كل ما تقفل خالص و تتملي بص علي مؤخر السفينة و اجري عليه اوقظه ....
اللذيذ في ربنا ..يحل المشكلة و بعدين يعاتب..مش زينا ياويله اللي يقع تحت ايدينا ..نذله و نعايره قبل ما نساعده ...تقع في ايدك يارب و لا اقعش في ايد بشر
لالهنا كل المجد


نبيل شحاتة

[Mary Naeem]

نذله و نعايره قبل ما نساعده ...تقع في ايدك يارب و لا اقعش في ايد بشر
لالهنا كل المجد