جليا

[sama smsma]

تنويعات علي اوتار انجيل مرقس
اصحاح ٨
نغمة ٣١ ..
جليا



وَجَاءَ إِلَى بَيْتِ صَيْدَا، فَقَدَّمُوا إِلَيْهِ أَعْمَى وَطَلَبُوا إِلَيْهِ أَنْ يَلْمِسَهُ،
23 فَأَخَذَ بِيَدِ الأَعْمَى وَأَخْرَجَهُ إِلَى خَارِجِ الْقَرْيَةِ، وَتَفَلَ فِي عَيْنَيْهِ، وَوَضَعَ يَدَيْهِ عَلَيْهِ وَسَأَلَهُ: هَلْ أَبْصَرَ شَيْئًا؟
24 فَتَطَلَّعَ وَقَالَ: «أُبْصِرُ النَّاسَ كَأَشْجَارٍ يَمْشُونَ».
25 ثُمَّ وَضَعَ يَدَيْهِ أَيْضًا عَلَى عَيْنَيْهِ، وَجَعَلَهُ يَتَطَلَّعُ. فَعَادَ صَحِيحًا وَأَبْصَرَ كُلَّ إِنْسَانٍ جَلِيًّا.
26 فَأَرْسَلَهُ إِلَى بَيْتِهِ قَائِلاً: «لاَ تَدْخُلِ الْقَرْيَةَ، وَلاَ تَقُلْ لأَحَدٍ فِي الْقَرْيَةِ».
هذا الاعمي يرمز للقلب المبتعد عن الله و يحيا في ظلمة الجسد ..قرية صيدا كانت في عبادة الأوثان إشارة إلي سيطرة ابليس بشهواته ...فيه حاجات كتير بتعمينا و تخلينا نمشي متخبطين ...اختيارات ..عاطفة ...شهوات ..
اول طريق للشفاء أن تسلم نفسك المسيح من غير تجمل و لا عناد ..بعماى كده اروحله ..و اسيبه ياخد بايدي و يبعدني عن القرية ...لازم نبعد عن دائرة الشر اولا ..كل خطية و كل شهوة و كل عادات جنسية أو ادمان مصدرها اننا بنفضل في دائرة الشر ..في القرية ... بحتفظ بصور علاقة قديمة و رسائل بعتهالي علي الواتساب او صورة مغرية سابتهالي أو صحبة شر يعلم بيها ربنا أو مكان منحرف متعود اني اسهر فيه .. بفضل في دائرة الأسباب اللي ديما بتضعف إرادتنا علشان كده اول حاجة ربنا عملها خده بره القرية ..
يبدأ ربنا في العلاج ..مد أيده و تفل و قولنا التفل أو استخدام اللعاب كان أمر متعارف عليه وقتها طبيا و لم يكن نوع من الفعل الذي يثير الاشمئزاز ربما حاليا ...
اللي يثير تعجبك و استفسار ازاي ما شافش علي طول و ايه التدرج ده ؟! هو المسيح ما يقدرش يشفي علي طول ... ؟! ممكن يكون قلة ايمان من الرجل ..ممكن يكون لأنه اعمي مخه لم يخزن صورا من الحياة يقدر يستدعيها لما شاف لأول مرة فافتكر الناس اشجار أو شافهم بطريقة غير كاملة الوضوح ...ساعات تبدأ علاقة مع ربنا و يبدأ الشفاء في حياتنا بس لسه الأمور بتبقي من غير تمييز ..علشان كده تحتاج عمل ايد يسوع تاني و مزيد من النعمة و الاستنارة ..علي فكرة يسوع لما سأله هل ابصر شيئا مش لان يسوع مش عارف لكن من أجل دفعه لمزيد من الايمان و الثقة اللي بيهم باخد شفاء كامل ..زي ما سال ادم اين انت مكنش مش عارف هو فين بس بيحثه علي الاعتراف و التوبة ..أو يسأل ايليا ما بالك ههنا يا ايليا علشان يخش مع ايليا في حوار عن حقيقة مشكلة ايليا أنه خاف و احبط ..ساعات تكتسب ثقة في الدكتور لما يحط أيده علي الوجع و يقولك حاسس هنا بايه فتفهم أنه عرف الداء أو لو بتعمل نضارة و تلاقي الدكتور بيزود عدسة أو بيعدل وضعها و يقولك ..كده انت شايف احسن ...أو يسالك ايه الاخبار .. أو انت كده شايف أوضح ...!!!
احنا عاوزين الاستنارة بتاعة المسيح لنري كل انسان جليا ...جليا معناها بوضوح اوي .. ساعات تبقي شايفة جوزك بس مش جليا شايفة مناطق ضعفه و تشوهاته بس لكن مش شايفة الجانب الحلو اللي فيه ..كده انت مش شايفاه جليا ..ساعات تشوف كل ضعف في مراتك و تخنت و مش واحدة بالها من البيت و عصبية مع الأولاد بس مش شايف فيها طيبتها و قناعتها و محبتها ليك و تحملها معاك أعباء الحياة يبقي مش شايفها جليا محتاج ايد يسوع ...ساعات تشوف ابنك فاشل لمجرد أنه مش محقق درجات حلوة او بنتك منفلتة و مش مؤدبة علشان بترد بكلمات يمكن مش بتعرف تختارها لكن حقانية او مش بيعجبك لبسها ..كده مش شايفه و لا شايفاها جليا ..محتاج لمسة يسوع تشوف باقي قدراته و مواهبه و تشوفي انها خدومة اد ايه و محبة و مجتهدة ...قبل ما تتسرع في الحكم ..محتاجين نشوف جليا ..
لا تدخل القرية ...ما ترجعيش تاني لدايرة الضلمة و الخطية و ما تقولش لحد في القرية لأنهم تحت تأثير الوثن و الخطية ممكن يشككوك في النعمة اللي خدتها ...يعني ممكن كانوا ساعتها يقولوا له أنه سحر مش شفاء كمان النعمة حلو انها تبقي جوانا في علاقة خاصة بربنا ..
لالهنا كل المجد و الكرامة


نبيل شحاتة

[Mary Naeem]

يعني ممكن كانوا ساعتها يقولوا له أنه سحر مش شفاء كمان النعمة حلو انها تبقي جوانا في علاقة خاصة بربنا ..
لالهنا كل المجد و الكرامة

[walaa farouk]

..ما ترجعيش تاني لدايرة الضلمة و الخطية و ما تقولش لحد في القرية لأنهم تحت تأثير الوثن و الخطية ممكن يشككوك في النعمة اللي خدتها ...يعني ممكن كانوا ساعتها يقولوا له أنه سحر مش شفاء كمان النعمة حلو انها تبقي جوانا في علاقة خاصة بربنا ..

ربنا يبارك خدمتك الجميلة