أية في اشعياء ٢٦
12 يَا رَبُّ، تَجْعَلُ لَنَا سَلاَمًا لأَنَّكَ كُلَّ أَعْمَالِنَا صَنَعْتَهَا لَنَا....
كل اعمالنا صنعتها لنا ...يعني بالبلدي كده ما بعرفش اعمل حاجة ... كل اعمالنا انت اللي بتعملها.. انت بتعمل كل حاجة ..انت قلت تكون زي الاطفال.. و انا رغم شيبتي طفل ...بس مش طفل في قلبه و نقاوته لا ...طفل في شقاوته و بهدلته ...طفل ... حتاخد منه ايه يارب غير مصايب و لخبطة و يوسخ نفسه و يكسر ... و أمه و أبوه يصلحوا و ينضفوا ...ده حتي لو ضجرت الام و نسيت رضيعها انت ما بتنساش ... كل اعمالنا صنعتها لنا ....باظت مني حياتي ...حتي لو باظت مع بناتي معرفتش اربيهم كويس و لا مع مراتي و اتخرب البيت و لا في خدمتي ديما مقصر و لا في شهوتي ساقط و متممرغ ...ميت واحد يقول انت السبب ..ماشي انا السبب و باظت ...خلاص كده ؟! ...لا ...يَا رَبُّ، تَجْعَلُ لَنَا سَلاَمًا لأَنَّكَ كُلَّ أَعْمَالِنَا صَنَعْتَهَا لَنَا
مستني ايه من لعازر اللي انتن حيقوم يفك نفسه و يرجع حياته ....مستني ايه من مفلوج مالهوش حد يسنده و لا يزقه ...وحيد و خطيته سبب بلوته ..باظت ...ماشي ...حيعمل ايه ..يموت نفسه ..؟! يَا رَبُّ، تَجْعَلُ لَنَا سَلاَمًا لأَنَّكَ كُلَّ أَعْمَالِنَا صَنَعْتَهَا لَنَا
مستني ايه من مجدلية و لا سامرية ..مستني ايه من شمشون و هو في حضن دليلة .. ؟!
يَا رَبُّ، تَجْعَلُ لَنَا سَلاَمًا لأَنَّكَ كُلَّ أَعْمَالِنَا صَنَعْتَهَا لَنَا
بص يارب انا جربت نفسي و فهمت إن ما فيش حاجة بالنسبة لي حتنفع ...صلاة و صليت ..جهاد روحي عملت علي قدي ...بحاول مع نفسي...شغل بجتهد اني اغير و أوسع رزقي ...بحاول في كل اتجاهات حياتي بس صدقني فشلت ..مش عارف اعدلها ....ايه خلاص كده ..خلصت ...طب اللي انت كتبته ده ايه ...وهم !!! كلام نسكن بيه نفوسنا المجروحة و لا حقيقة ...انا متمسك بالآية دي ...يَا رَبُّ، تَجْعَلُ لَنَا سَلاَمًا لأَنَّكَ كُلَّ أَعْمَالِنَا صَنَعْتَهَا لَنَا....اعمالنا صنعتها لنا ...ياللا صلح اللي اتخرب و اللي انكسر و اللي انجرح و اللي اتشوه ...طفل و باظت منه ...أبوه حيعمل عقله بعقله و لا حيعمله الصح و يعلمه ...شوف يارب ما تستناش مني حتي الفلسين ...انا بتاع الخنازير ...انا الاعمي اللي ع الطريق ...حيعمل عينين لنفسه ؟! يَا رَبُّ، تَجْعَلُ لَنَا سَلاَمًا لأَنَّكَ كُلَّ أَعْمَالِنَا صَنَعْتَهَالَنَا
بهذا اصلي و علي هذه اتكلم و اتكل و انتظر
نبيل شحاتة
