هل الله يؤلمني

[Ramez5]

هل الله يؤلمني ؟

الله هو ضابط الكل . صح ؟! و هو خالق الكون و الوجود كله مضبوط ؟ تمام
يعني كل اللي بيحصل في الكون هو عارفه و وتحت سيطرته صح ؟! أيوه
يبقي أكيد ربنا مسئول عن تفاصيل كل اللي بيدور في الكون ، واللي بيحصل معانا ده مسئوليته و هو اللي بيأمر بيه و كمان هو قاصده.
أفكار كتير بتدور جوانا و إحنا واخدنها مسلمات و نبني عليها إستنتجات و أفكار مرات كتير بتودينا في ....
تلاقينا في وسط الألم و الحزن وزنقة الحياة جوانا أسئلة كثيرة مكتومة، و مرات توصل للوم و عتاب حتي لو مكتوم و محبوس جوانا و لسان حالنا:
هو ليه ربنا بـيعمل معانا كده ؟ هو إحنا عملنا إيه غلط ؟!
هو ليه بيحطنا في تجارب فوق أحتمالنا !
و أنا النهاردة عايز أقولك على شوية حقائق مهمة أوى
أولاً : الله غير مجَرَب بالشرور و هو لا يجرِّب أحد ( يع1: 13 )
ثانياً : و هو لا يدعنا نجرب فوق ما نحتمل (1كو1 :10-13 )
ثالثاً : فكرة أنه مسئول عن تفاصيل كل ما يدور في الكون حقيقة بس خذ بالك من حاجة مهمة أوي إن ربنا غيرنا إحنا البشر ، فلما الواحد مننا بيحط قانون بقي عارف إنه فوقيه و إنه هتطبق على الكل الإ عليه ". معركش شفت ضابط مرور رابط الحزام مثلاً " ممكن تحصل بس المعتاد و إننا كبشرلما نحط قانون إحنا أول ناس بنكسره ، بس ربنا مش كدة خالص ، هو لما بيحط قانون و بيقول كلمة بيمشيها على نفسه أول واحد .
و أكبر دليل عندنا على كده إنه لما قال إن أجرة الخطية موت ، لما حب يرفع عننا موت الخطية جه بنفسه متجسداً في صورة إنسان عشان يموت بدلنا لانه بيحترم القانون اللي حطه و مش بيكسره أبداً ، إذ وجد في الهيئة كإنسان وضع نفسه و أطاع حتي الموت موت الصليب في (2: 8 )
وإللي نفسى أقولهولك إن ربنا فعلاً ضابط الكل و متحكم في كل الأمور بس هو واضع قوانين العلاقات و هو معطي الحرية للإنسان و الحقيقة إنه يحترم هذه الحرية و لا يكسر هذه القوانين.
و لو نظرت معي نظرة موضوعية لأسباب الألم و الحزن التي نعبر فيها ستجد جزء منها بسبب كسر القوانين الطبيعية و جزء آخر بسبب كسر قوانين العلاقات وغالباً ده كله ناتج عن سوء إستخدام الحريات و عشان كده غالباً ما بيكون الألم ناتج عن جني ثمار ما زرعناه في حياتنا ، بس خذ بالك ده ما بيلغيش حاجتين مهمين أوي
الأولي :
إن ربنا في مرات بيقصد يحطنا في تجارب لمتحان و تقوية الإيمان ( زي أبونا إبراهيم مثلاً )
الثانية :
احترامه لقوانين الطبيعية و الحريات ما بيلغيش دوره فهو مش واقف بعيد بيتفرج علينا و بس لكن إيده معانا بيسندنا و يحمينا و عينه دايماً علينا و لما بنطلبه و نطلب مساعدته بيجينا و بحبه بيشملنا و يراعينا و بيبقي حقيقي سند لينا.
لكن بيديك قوة و قدرة فوقية ( زي ما بطرس مشي علي المية ) مت 14: 25-33
هي دي قوته و هي دي محبته و نعمته و قدرته و احترامه للإنسان و لكل مخلوقاته الجميلة لأنه الله الكامل المتنزة عن الخطأ المحب .. العادل .. الذي لا يستطيع أن ينكر نفسه و لا يتخلي عنا أبداً

[walaa farouk]

لما حب يرفع عننا موت الخطية جه بنفسه متجسداً في صورة إنسان عشان يموت بدلنا لانه بيحترم القانون اللي حطه و مش بيكسره أبداً ، إذ وجد في الهيئة كإنسان وضع نفسه و أطاع حتي الموت موت الصليب في (2: 8 )

موضوع جميل
ربنا يفرح قلبك رامز

[Mary Naeem]

هي دي قوته و هي دي محبته و نعمته و قدرته و احترامه للإنسان و لكل مخلوقاته الجميلة لأنه الله الكامل المتنزة عن الخطأ المحب .. العادل .. الذي لا يستطيع أن ينكر نفسه و لا يتخلي عنا أبداً
ربنا يبارك حياتك

[emy gogo]

موضوع رائع
ربنا يبارك خدمتك

[shery jesus]

كمان ربنا جرب الالم ..يعنى اكتر حد هيحس بينا ..يقول الكتاب رجل اوجاع مختبر الحزن ..ربنا عارف وشايف وحاسس بكل تعب فينا ..ومحبته لاولاده كبيرة اووووى ..ميرسى مستر رامز للموضوع الجميل دة