جمله بتلخص كل سنين حياتي اللي فاتت .. طفل اتولد بشلل دماغي اثر علي رجليه وطريقته في المشي و ثقته في نفسه في التعامل مع الناس بشكل خاص و التعامل مع الحياه بشكل عام .. انا لحد النهارده بحتاج حد يساعدني و انا بمشي او و انا بطلع السلم او و انا حتي بلبس الجزمه .. مبعرفش اشيل حاجه و مبعرفش اقف في طابور و مبعرفش اطلع اكتر من دورين لواحدي .. كانت امي واختي هما ايدي ورجلي في الدنيا .. لحد ما كبرت و بقيت مضطر اعتمد علي نفسي شويه بشويه لحد ما ربنا رزقني باللي تشيلني و تشيل عني من غير ما تحسسني اني عبئ او حمل او ضغط نفسي في حياتها .. وقفت جنبي وورايا و استحملت دماغي الناشفه وكلاكيعي النفسيه و علمتني احب نفسي زي ما هي و اتعامل مع مشاكلي الصحيه بسلام نفسي .. مهما كانا درجة نجاحي او تأثيري علي الجيل اللي انا بنتمي ليه بكتابتي و بشعري ده ومتابعيني اللي بالملايين في مصر و الوطن العربي .. ده مكانش هيغنيني ابدا عن وجودها .. خصوصا اني لما قابلتها كنت حرفيا مدغدغ و معنديش اي استعداد اني افتح صفحه جديده مع الدنيا .. و مش هبالغ لو قولت انها حرفيا انقذت حياتي و عملت من الطفل الصغير ودوشته وتراكماته و اكتآبه بني آدم .. انا مش مكسوف من اللي بقوله لان ابسط حقوقها هي الشكر و الامتنان و العرفان بالجميل اللي عملته .. لان ايه مش حبيبتي و مراتي و عكازي بس .. هي حلم حياتي اللي عشت بدور عليه علي مدار عمري كله .. كفايه انها صدقتني .. صدقت اني ممكن ابقي حاجه و انجح و اوصل للي بحلم بيه و ان سجن الاعاقه اللي حبست فيه نفسي السنين اللي فاتت كان سجن من هوا .. و كأنها جمله لمنير و هو بيقول " ياللي انتي حبك حريه " .. او جمله لأم كلثوم وهي بتقول " سامحت بيك ايامي .. صالحت بيك الزمن " .. الحب حلو طول ما هو دافع .. طول ما هو بيدي امل و بيخلينا نكمل ونقف علي رجلينا .. حتي لو قابلتنا فترات اكتئاب او زهق او حتي كتفنا الروتين و اني زي مالابنودي قال " جيت الدنيا من غير ورث وخدت منابي فيكي " .. و ان اخيرا ربنا تمم علي خير و جبر بخاطري و استجاب لدعوة امي و حقق حلم ابويا انه يطمن عليا .. وحقيقي فعلا ورا النجاح و الشهره و الدواوين اللي تصدرت قايمة المبيعات ٤ سنين متتاليه و الكتاب اللي خد احسن كتاب في ٢٠١٦ .. بني آدم هش .. قايل للسقوط كان ومازال وهيفضل محتاج لواحده تقف في ضهره عشان يعرف يكمل .. النجاح حلو بس الاستقرار احلي .. دلوقتي اقدر اقول فعلا اني بعرف اعدي .. للحدوته باقي ❤️
للشاعر محمد ابراهيم
07 - 08 - 2017, 10:36 PM
رد: مبعرفش اعدى
العرض العادي
