ايه أكتر حاجه بتكرهيها ؟!
_ العشم .. مبحبش اتعشم ف حد .. ويخذلني
..
وايه أكتر حاجه بتحبيها ؟!
_ بحب ابقي لوحدي .. الوحده اهون مليون مره من العيشه وسط ناس مالهاش امان وممكن ف ثانيه تتغير
..
امتي حسيتي انك ضعيفه ؟!
_ يوم ما احتجت لحد وملقيتوش .. ساعتها بس حسيت ب طعم الضعف ومعناه .. وافتكرت دعوة ستي الله يرحمها .. ( ربنا ما يحوجك لحد .. )
..
مرتاحه ؟!
_ الراحه كلمه نسبيه .. ممكن ارتاح وانا لوحدي وغيري يرتاح وسط اللمه .. ممكن ارتاح وانا single وغيري يرتاح لما يحس انه بيحب ويتحب .. وانا علي ما أظن مرتاحه .. كفايه اني مش مسنوده علي حد غير ربنا
..
مين اقرب صاحب ليكي ؟!
_ انا .. ايوه انا .. بحكي لنفسي وبسمعني وياما قفلت علي روحي وعيطت .. دموعي اغلي من انها تبان قدام عيون الناس .. ومحدش هيحس بيا أدي
..
بتخافي ؟!
_ عمري ما خوفت غير م الخوف نفسه .. الخوف ف حد ذاته احساس مرعب .. ربنا يكفينا شره
..
نفسك ف ايه ؟!
_ ولا حاجه .. كل الايام بقيت تشبه بعض ف عينيا .. مفيهاش جديد .. ومفيهاش حاجه تخليني اتفاجئ .. اساسآ مبقاش شئ يوجعني ولا شئ يبسطني .. بقيت بتعامل مع المواقف والظروف من بعيد ل بعيد .. لأني اتأكدت ان كل حاجه بتعدي .. الحلوه بتعدي .. والوحشه برضه بتعدي .. وقلوبنا زي المحطات .. كل يوم تقابل ناس وتفارق ناس .. والكل ف الأخر بيمشي
..
انا اسفه .. شكلي عكيت الدنيا وقلبت عليكي المواجع
_ لا ولا يهمك .. بالعكس انتي خلتيني افضفض شويه .. مع ان الفضفضه مبقتش بتريح .. وانا اصلآ من زمان اتعودت اسكت .. اتعودت اعمل نفسي طايره من الفرح علشان ضعفي ميبانش ل الناس .. والناس مفيش ف ايديها حاجه غير كلمة _ معلش _
..
ان شاء الله هتبقي كويسه
_ انا كويسه .. وتمام جدآ .. انا بس محتاجه ل وقت وهقف علي رجليا من تاني .. شوية وقت مش أكتر !
