نصائح لطالب الثانوية العامة

[walaa farouk]

١- اول حاجه ماتخفش ، لان الخوف كفيل ينسيك اي معلومة انت مذاكرها وحافظها ، حاول تسيطر على نفسك وتثق فيها طالما عملت اللي عليك وذاكرت ، واتفائل دايما بالخير
٢- اليوم اللي قبل الامتحان بيكون للمراجعه مش للمذاكرة ، وانت بتراجع حاول تعلم على الحاجات اللي انت شايفها مهمة ، والنقط اللي دايما بتتكرر في الامتحانات ، والحاجات اللي هتعلم عليها دي ، هي اللي هتقراها تاني بسرعه قبل ماتروح الامتحان بساعه زمن " زيادة تأكيد "
٣- اول ماتدخل اللجنه بلاش تتخيل انك بتسقط وبتنهار والناس بتشمت فيك وابوك بيهينك ومستقبلك بيضيع
صلي وقوله يارب انت عارف انا تعبت قد ايه وعلى قد تعبي اديني
وبالنسبة لو انت حاسس انك ماتعبتش بالدرجة الكافية بلاش تقولة " على قد تعبي اديني "
٤- اول ماتدخل اللجنه وتمسك ورقة الاسئلة اقراها بالكامل نقطة نقطة
علشان تطمن ان الامتحان مقدور عليه ، وعلشان تعرف تحدد وقتك علشان ماتضيعوش في اجابة نقطة وتظلم باقي النقط في الوقت
٥- بلاش تتفلسف في اجاباتك وتظهر انك فاهم وتبعد عن المضمون
جاوب الاجابة اللي السؤال طالبها ، لان للاسف فيه مراقبين معندهمش ضمير ولما يقروا اول سطرين ويلاقوك لسه مادخلتش في الاجابة المطلوبة بيفهم انك بتتفلسف ومعندكش اجابة السؤال
٦- راجع مرة واتنين وعشرة وبلاش تخرج في نص الوقت حتى ان كنت مخلص ومراجع
احيانا كتير في المراجعه بتكتشف نقط مكنتش فاكرها في اول الامتحان نظراً لشوية التوتر اللي كنت فيهم
٧- وضح خطك وبلاش فكرة كل لما خطي يبقى وحش مش هيعرف يقراه وهيديني الدرجة على طول
ويستحسن تجاوب كل سؤال في ورقة ، علشان وانت بتراجع تقدر تكتب في باقي الورقة النقط اللي كنت ناسيها
٨- ياريت بلاش تراجع بعد الامتحان علشان صدقني اللي اتحل اتحل ، جايز تفتكر نقطة تعكنن عليك وتأثر على المادة اللي بعدها
وماتستناش اصحابك تطمن عليهم ، لان في الغالب الكل بينزل يقول محلتش علشان العين ، وفي الاخر بتكتشف انك انت اللي غلبان
٩- بعد امتحانك ارجع على البيت لان الوقت مابين المواد يادوبك على قده ، وكل ساعه محسوبة عليك ، نام كويس واصحى على مذاكرة المادة اللي عليها الدور ، واعمل حسابك ان اليوم اللي قبل الامتحان ده للمراجعه فقط
١٠- دي بقى اهم نقطة ، الثانوية مش كابوس ولا بوع بوع ، سنة زي اي سنة ممكن تتفوق فيها ، لكن الخوف هو اللي بيدمر كل تعبك
فخليك هادي ، واتعود تصلي قبل ماتروح الامتحان ، وقبل توزيع ورقة الاسئلة
وربنا يوفقكم جميعاً ، انتوا امل بلدنا

[Mary Naeem]

فخليك هادي ، واتعود تصلي قبل ماتروح الامتحان ، وقبل توزيع ورقة الاسئلة
وربنا يوفقكم جميعاً ، انتوا امل بلدنا

[walaa farouk]

ميرسى على مرورك الغالى مرمر