وصفات لأكلات سريعه التحضير ادخلى وشوفي

[Marina Greiss]

اول حاجه البطاطس بالبيض


احنا اربع افراد ف اول حاجه بجيب ست او سبعه قطع بطاطس ( بالبلدي 7 بطسايات )
وخمس بيضات

وهنسلق البطاطس والبيض

ولما يتسلقوا هنقشر البطاطس عادي ونهرسها حلو اوي

ونقشر البيض ونقطعه حتت صغيره

ونجيب حله ونحط شويه زيت وزبده او سمنه لو عايزين ونسيبهم يسخنوا

ونروح حاطين البيض ونقلب لحد ما يصفر كده ونحط التوابل الملح والفلفل والكمون والشطه

ونروح حاطين البطاطس ونفضل نقلب نقلب لحد ما تصفر ويبقي لونها دهبي وحلو كده وبس كده وبالهنا والشفا ومش بتاخد حاجه ............









تاني حاجه البيض بالانشون

احنا كلنا عارفين البيض بالبسطرمه بس البسطرمه غاليه ومكلفه ف شوفوا طريقتي انا بقي

هتجيبي البيض وتكسريه عادي وتضربيه مع الملح والفلفل

وتجيبي طاسه تيفال وتحطي الزيت بس قليل

وتجيبي لانشون وتقطعيه حتت صغيره

ولما الزيت يسخن حطي الانشون اول ما هتلاقيه بدأ يحمر حوطي البيض وقلبي لحد ما يتعمل خالص وبالهنا والشفا







تالت حاجه البيض بالتومه

نفس النظام هتجيبي البيض وتكسريه وتضربيه مع الملح والفلفل

وتجيبي توم وتقطعيه

وتسخني الزيت ولما يقدح حوطي التوم وحمريه وحطي البيض وقلبي وغطيه دقيقه عشان يستوي وبسسس

رابعه بقي

الشكشوكه

اربع بيضات و3طماطم صغيره و2 فلفل اخضر وملح وفلفل

هنكسر البيض ونضربه مع الملح والفلفل

ونغسل الطماطم ونقطعها مكعبات ونقطع الفلفل

ونجيب الطاسه ونشوح الطماطم لحد ما تنزل مايتها مع الفلفل بردو

ونكون قلبنا البيض حلو ونحطه مع الفلفل والطماطم ونقلب بقي لحد ما البيض يبقي حلو ومش ني وريحه الطماطم تطلع وبالهنا والشفا...........