في مره جالنا ضيوف في البيت معاهم اطفال
البنوته طلعت الدور التاني في السرير وكانت هتقع وهي بترمي لعبه من اللعب
اخوها طلع يجري عليا وقالي طنط اللحقي هتبوظ لعبه فرح
فرح وقفت مصدومه وقالت له انت ازاي خايف علي اللعبه اكتر من اختك هي كانت هتقع
وقفت كتير اوي عند الكلمه دي
احنا ازاي ساعات بنخاف علي الحاجات اكتر منهم
بنخاف من الفشار اللي وقع منهم علي الارض اكتر من مشاعر الاحباط اللي حصلتلهم لما وقع منهم
يكبروا شويه
ونبتدي نخاف علي عمو اللي زعل انهم مش راضيين يبوسوه بالعافيه اكتر من مشاعرهم وهما بيتباسوا بالعافيه وبيتلاموا وينتقدوا علي استخدام حقهم في خصوصيه جسمهم
يكبروا اكتر ونبتدي نخاف علي مشاعر الكابتن اللي مش عارف يدربه ومش عارف يحتويه اكتر من مشاعرهم بالاحباط والفشل والقهر وهما معندهمش مساحه للرد ولا التواصل ولا الاعتراض ولا التعبير انهم ليهم حق زي ما هو ليه حق
ويكبروا ويتضربوا علي الواجب اللي أهم منهم
ويكبروا ويتعاقبوا علي الفلوس اللي ضيعوها
ويكبروا ويحسوا ان قيمتهم اقل
ومشاعرهم اقل
واحتياجاتهم اقل
وحياتهم ووقتهم ونفسهم ملهاش قيمه
ويعيدوا الدائره ويشوفوا ولادهم ملهمش قيمه وفي مهام وناس وحاجات اهم منهم
مع ان كان ينفع يبقي الاتنيين مهمين
مع ان كان ينفع اديله اللي ليه زي ما بقوله اللي عليه
مع ان كان ممكن اشوفه مهم فيصدق انه مهم وميرضاش علي نفسه الفشل والانحراف لانه مهم ومتقدر
علي فكره إنتوا كمان مهمين
ولو رجعتوا تدوا نفسكم قيمتها
هتقدروا بسهوله تدوا لأولادكم قيمتهم
إنتوا مهمين
مشاعركم مهمه
احتياجاتكم مهمه
مجهودكم مهم
إنجازاتكم مهمه
ارجعوا ادوا لنفسكم حقها عشان تقدروا تكملوا وانتوا وولادكم مهمين ومتقدرين
