ماتخليش كرة الثلج تكبر

Rena Jesus · رقم المشاركة : ( 1 ) 06 - 03 - 2017, 04:16 PM

بين اي اتنين مخطوبين او متزوجين.
كتير بيحصل خلافات بينهم. واحيان كتيييير للاسف الخلافات دي بتتحول لمشاكل.
واوقات كتير المشاكل بتتحول ل إنهيار في العلاقة.

الخلافات شيئ طبيعي نتيجة اختلاف افكارنا وتقديرنا للامور
ومافيش اتنين على وجه الارض مش بيختلفو. وده مش عيب.
لكن اللي لازم نكون متأكدين منه. ان احنا اللي في ايدينا سعادتنا.

⬅ تأكد ان هايحصل خلافات بينك وبين زوجتك. فلازم تحط القواعد اللي هاتمشو عليها في حالة حدوث الخلافات. ولازم تتعامل معاها بعقل.

⬅ ربنا اداك ميزه. فانت العامل الاساسي وانت المسؤول ادام ربنا.

⬅ لما تلاقي فيه خلافات باستمرار مع زوجتك.
يبقي تأكد ان غالبا غالبا غالبا العيب عندك انت لانك انت الراجل. وانت الاكثر نضجا منها.

⬅ اكيد في بعض الاحيان بتكون الست هي اللي عندها الخلل.
بس في غاااااااااااااااااالب الأحيان بيكون الخلل عندك انت.

⬅ حتي لو في بعض المواقف هي اللي غلطانه. فتأكد ان ده نتيجة خلل عندك انت.
ولو انت متجوز من سنتين وفيه مشاكل. يبقي انت ماوضعتش القواعد الصحيحه للعلاقة من الأول. ويبقي اللوم عليك انت برده.

⬅ بكل تأكيد لكل قاعده شواذ. بس 99.9 % حياتك من ضمن القاعده العامه.
ف ماتضحكش على نفسك وتقول انا حالتي من شواذ القاعده.

⬅ فيه مثل أجنبي بيقول ( أخطاء الأبناء تدل على فشل الآباء ).
وانا بقول ( أخطاء الزوجات تدل على فشل الأزواج ).

⬅ تأكد انك قادر على انك تحل مشاكلك بنفسك. وعارف ليه محدش بينام معاكم في بيتكم.
لان انتم اقرب لبعض من اي حد تاني. وعشان كده ماينفعش حد يتدخل في حياتكم وخلافاتكم. مهما كان مهما كان.

⬅ الخلل الحالي من الزوجه. لو فتشت على اصله هاتلاقي الاصل خلل من الزوج.
واللي حاصل من الزوجه ده. نتيجة لخلل الزوج.

من البديهيات انك تبقي عارف انك لازم تحسسها
( بالحب والأمان والعطف والمودة............ )
وعشان دي بديهيات فانا مش هاتكلم عنها.

⬅الشفافية هي الركيزة الأساسية في العلاقة. واهم عامل للنجاح.
الشفافية درجة اعلى من الصدق.مثال: اتاخرت هي في تجهيز الأكل.

1. تقوم تزعق زي ال.... ولو حد عاتبك على صوتك العالى تقوله ماهي اللي بتتاخر في الاكل.
وتبقي فرحان زي الاهبل عشان محدش هايلومك. وده المستوي المتدني في الرجاله
2. انك بعد ماتاكل. تروح تصالحها وتقولها معلش. انا لما ببقي جعان ببقي عصبي.
وده مستوي راقي.
3. الشفافيه بقي. انك تقولها يا ست الحُسْن.
انتي عارفه اني كنت فقير زمان وعشت حياة صعبه. واحساس الجوع ده ياما عانيت منه.
ومش عاوز اعاني منه تاني. ارجوكي ماتتاخريش في الاكل لما اجي من بره.
وده أرقي المستويات. طبعا ده مجرد مثال للتقريب. وانت كَيِّفْ مواقفك بقي.

⬅ماتخليش ( كرة الثلج تكبر ). زعلان من حاجه هي بتعملها؟
طب ليه تكتم جواك لحد ما قلبك يتغير واسلوبك يتغير معاها.
لا. خليك شفاف معاها. ومن ثالث مره هي كررت الخطأ قولها اللي جواك بشفافية مطلقه.
قولها وانت مبتسم وبصوت هادئ انا مش عاوز ( قَشَه ) تكون في قلبي تأثر على حبي ليكي.

⬅قاعدة مهمه: عند أي مشكلة تحصل. صوتك واسلوبك بيكون عالى لانك غضبان.
يبقي تعمل ايه ؟ تخليك طبيعي ؟
لا غلط.ماتبقاش طبيعي. لازم تتحكم في نفسك وتبقي اقل من الطبيعي
لان العتاب والنقاش في حد ذاته بيعمل ضغط على الانسان.
فانت لازم تقلل الضغط ده بإنك تكون هادي قدر المستطاع.

⬅احترامك الشديد لأهلها. أول الطريق لقلبها.

⬅انت ك راجل بتحتاج اللي يسمعك وتفضفض معاه. مابالك بقي بالست
( وهم اصلا رغايين ماتخليش كرة الثلج تكبر

فلازم تدفع ضريبة الاستماع دي.

⬅احساس انك مرغوب فيك. وان حد بيجري وراك عشان يرضيك.
احساس حلو وبيشبع غرور الانسان. ودي فطرة في الانسان سواء كان
ذكر او انثي. ف خد بالك⬅ ( ماتتقلش اوي على الرز ل يشيط ).

⬅انك تتقمص عمال على بطال عشان هي تصالحك. ده شغل عيال مش ناس عاقله
(احيانا يُقْبَل من البنات كده. لكنها في الشباب مينفعش).

⬅احتواء عيوبها من اجمل الصفات. يعني انت عارف ان هي بتحب تروح عند صاحبتها فلانه كل اسبوع. وانت مش مبسوط بكده.
بس مافيش ضرر واقع علي بيتك. خلاص يا أخي. خللي قدرها عندك يسمح لك انها تعمل حاجه وانت مش حاببها اوي.

⬅انت عارف انها مش زعلانه بس عامله زعلانه عشان تشوف غلاوتها عندك.
وماله. اعمل عبيط واقعد صالحها وراضيها. خليك سابقها بخطوة.

⬅خليك فاهم كل حاجه وفاهمها اكتر من نفسها.
واعمل لها اللي هي عاوزاه ويكأنها ضحكت عليك تكسبها في لحظة.

⬅لو اتعلمت تحتويها وقت غضبها. تبقي وصلت يامعلم.