مشكله صعبه جدا لسيده مطلقه
انا عايزه اتكلم لاني بجد تعبت امثل اني قويه .. انا مطلقه بقالي شهرين ونص وبتعالج عند طبيب نفسي من بعد الطلاق .. انا اتجوزت جواز صالونات وقولت اخيرا اتقدملي شخص مناسب كان في الخطوبه شخص كويس قوي وكلامه مفيش اجمل منه وبدانا نجهز مامته قالت ان لسا شب في بداية حياته وباباه متوفي فا اهلي جابو اغلب الجهاز لحد العربيه البتنقل العفش والشيالين كان بيحاسب بابا عليها وقت كتابه القايمه مرضيوش اننا نكتب الشبكه ولا الاجهزه الكهربائيه ولا الرفايع قولنا ماشي .. وقت اختيار الفستان والهيعملي الميكب حماتي اعترضت علي الفستان ونزلت معايا علشان تختارلي الفستان والمكان الهعمل فيه الميكب نزلت معاها مفيش حاجه عجبتني اعترضت وهو اتخانق معايا علشان مامته زعلت وقولتلو كل واحد يروح لحالو اتصل قال لبابا انه بيحبني بس هيعمل ايه هو معهوش فلوس ومامته الهتدفع بابا قالو خلاص انا هشيل الفستان والكوافير وانت ادفع تمن التصوير .. وجيه يوم الفرح اللي كان اسوء يوم في حياتي كان سيبني قاعدة في الكوشه لوحدي وهو قاعد جمب اهلو والدي جي يفضل ينادي عليه كنت برقص لوحدي مع قريبي وفجاءه لقيته شطب الفرح بدري وروحت وفجاءه اكتشف ان انا مراته وبعد الجواز بااسبوعين وداني بالضرب علشان نروح نقعد مع مامته طيب مقولتليش ليه كده قبل الجواز انا جوزك وتقولي حاضر .. روحت وكان كل يوم ينزل يروح الشغل هو ومامته ويرجع يتغدا وينزل لاصحابه ويرجع ينام .. ومامته ابتدت تقول المفروض الست تساعد جوزها لو مش بتشتغل اهلها يساعدوها ولما بنتها تيجي تزورها يفضلوا هما اتنين يتكلمو قد ايه الكان خطبها قبلي كانت جميله ومن عليه كبيره وخريجه كليه قمه ومعاهم فلوس متتعدش وانهم قد ايه لحد دلوقتي بيحبوها .. وقد ايه كان نفسها تجوزو بنت زميلتها الصيدلنيه اللي كانت هتجيبلو شقه وتفرشها ولما ابن اختها خطب قاعدت هي وبنتها تقول دي خطيبته بباها مليونير وتقوم بنتها تقول مليونير ايه يا ماما انتي عارفه عاندو كام مصنع وكام شركه قولي ملياردير تقوم قايله اه وشوفتي ذي القمر ازاي مش نقصها حاجه ماهي حظوظ مش حظ ابني ..اتخنقت بقيت بروح لاهلي وانا راجعه كانو يدوني لحوم وفراخ وفلوس وهو كان ياخد مني الفلوس ومكنش بيصرف عليا جنيه كنت كل مااروح لاهلي يجيبولي كل احتيجاتي حتي شحن الموبيل .. واكتشفت ان مامته معاه فلوس وعندها شقق كتير وباباه كان شغال في الخليج كنت مستغربه طيب ليه كانت بتدعي الفقر وقت الجهاز والشقه الجهزناها مخلونيش اوضبها بحجه ان مفيش فلوس وانا الجايبه ٣/٤ الجهاز .. والصادمه الاكبر لما عرفت انه بيحب بنت خالته الاول كان بيتكلم عنها بطريقه غريبه كنت فاكره انهم صحاب او حاجه برغم انه اكبر منها ب ٩ سنين ومش قريب كده من اختها الكبيره كان بيخلي اخته تكلمها كتير تطمن عليها ولو عرف انها عيانه كان بيبقي هيتجنن ولو عرف انها متخانقه مع جوزها يزعف لخالتو ويقولها انتي سيباها في الغربه معاه .. هي بصراحه تستاهل تتحب انا لما شوفتها لقيتها جميله جدا حاجه جدا اجنبيه وجمال المليكه ومتفوقه وذكيه وطيبه قوووي هي قاعدة في بلد اوروبيه مع جوزها وبتنزل لمامتها ٦شهور مقدرتش اكرها كنت كل ماشوف نظراته ليها كنت بتقطع .. كنت كل مااتصل بيه الاقيه عند خالته وجوزي المبيحبش الخروج كان بيخرجنا علشان يعملها اي حاجه تسعدها وكنت اسمعه بيكلمها علشان تيجي تبات معانا وكان يقولي اتصلي اتحيلي عليها .. في مره كانت حضنه ابنها قام رايح حضن ابنها وهي حضناه كانه كان عايز يحضنها وكل دا قدامي .. دخلت عيطت في الحمام كنت بموت في اليوم ١٠٠ مره طلبت منه نروح لدكتور علشان نفسي يكون عندنا ولاد كان يقولي مش عايز ولاد دلوقتي ولما قولتلو بس انا عايزه كان يتخانق معايا والخناقه تخلص بضربي واروح لاهلي واقعد بالكذا شهر من غير ماهو او اهلو يسالو فيا ولما كان يجي ياخدني كان يقولي متقولش قدام ماما ان انا الجبتك .. كنت بحس نفسي غريبه وسطهم ودخلت عليهم وهما بيتكلمو يسكتو مكنتش اعرف عنه اي حاجه كنت بموت في اليوم ١٠٠ مره كان بيغير علي اخته حتي مامته كان بيغير عليها وانا كانه مش شايفني .. كنت اقولو عايزه اتكلم معاك يقولي انا مصدع وهنام وادخل عليه الاوضه الاقيه ماسك الموبيل واول ما يشوفني يخبيه .. لحد اخر مشكله بردو اضربت وروحت لاهلي قعدت ٥ شهور وحصل الطلاق وانا كنت بجيب حاجتي خدو كل حاجه مش مكتوبه في القايمه لحد الدبله واتشتمت انا واهلي منه ومن خلانو ومامته كانت حاطه رجل علي رجل وبتضحك وقت الطلاق كان الماذون عايز يصلح قام طليقي راح يسال مامته قالتله لا غورها .. انا كنت بموت في اليوم ١٠٠ مره واتزليت وكانو طول الوقت بيقللو مني ودخلت في حالت اكتئاب خسيت ٢٥ كيلو وبيقو يقولو لكل الناس ان عندي توحد واهلي ضحكو عليهم وجوزوني ابنهم .. انا مش قادرة انسي الكلام ولا المواقف وحاسه اني قليله قوي .
03 - 03 - 2017, 01:58 PM
رد: مشكله صعبه جدا لسيده مطلقه
العرض العادي
