لازم تعرف إن كل حاجة " أنت "
أنت اللي حواسك بتدي إشارة لعقلك
فتقرر أيه الصح وأيه الغلط
بس مش لازم تقررلي
حواسك مختلفة وطبيعة التقارير اللي بتوصلها لعقلك
مختلفة عن تقاريري الإختلاف معروف من بدء الخليقة
الفكرة كلها إنك لازم تتفهمه وتعرف كويس إننا مش شبه بعض كُلياً
حتي لو خواصنا متشابهة جزئياً
أنت ممكن تشوف مشهد من فيلم ويعجبك
وأنا أشوف المشهد نفسه ويعجبني
بس مش لنفس سبب إعجابك بيه
لسبب تاني ترجمة عقلي
وحتي لو أنا وأنت أتفقنا فممكن نتفق لأسباب مُختلفة
ممكن تكون بتدافع عن دين عشان تدخل الجنة
وحد تاني بيدافع عن دين عشان هو شايفه يستحق الدفاع
الأتنين بيشتركوا في الدفاع ولكن لأسباب تانيه خالص
فأرجوك تقبل الإختلاف وأفهم كويس
إن الصورة والرؤية اللي أنت شايفها قدام عينك دي
مش هي نفس الرؤية والصورة اللي غيرك شايفها
وحتي لو شاف جزء منها زيك.. مش هيشوف كل التفاصيل بعينك
فإرتاح وتقبل الأخر.. ده لو عايزه يتقبلك.
