ياللي ظلمتوا الحب

[walaa farouk]

كل سنة واحنا طيبين.. بس ايه رأيكم لو عيد الحب يبقى السنة دي مختلف؟.. قصدي نبقى احنا فيه مختلفين.. نبقى فاهمين مش متلخبطين.. فاهمين يعني ايه حب؟.. وقادرين نفصل بين مشاعر الحب ومشاعر التعلق!
- ايه الكلكعة دي بقى؟.. ليه الكلام الكبير في يوم مفترج زي دا!.. هو يعني ايه "تعلق" أصلا؟!
التعلق يعني التصاق.. يعني لزقة.. يعني انت حبيبي وروحي وحياتي وبابا وماما وأنور وجدي.. يعني انت شاحن موبايل قلبي اللي من غيره قلبي يقف ويقطع شحن.. يعني انت ملكي وانا ملكك.. ما افرحش غير لما تفرح.. ما ادخلش الحمام غير لما اقولك.. ولو اتأخرت جوه تقلق عليا وتيجي تخبط.
- مش هو دا اللي اسمه الحب؟
دا اسمه خنقة.. اسمه تعلق.. انما الحب حاجة تانية.. الحب يعني اتنين مستقلين عن بعض، قرروا يرتبطوا ببعض.. مش يربطوا بعض!.. الفرق كبير بين الحالتين.. ورغم كدة أوقات كتير بنتلخبط وندخل في علاقة على أساس اننا عايشين قصة حب.. لكن من غير ما نحس بنكون عايشين جوه مرض!.. مرض اسمه التعلق.
- وإيه اللي يخليني أدخل في علاقة من النوع دا من غير ما احس؟؟
الأسباب كتيرة.. يمكن اكون استعجلت عشان كل اصحابي بيجيلهم دباديب في عيد الحب، إلا أنا.. يمكن أكون ما استقبلتش حب واهتمام كفاية وانا صغير.. يمكن اكون فاضي من جوايا وما صدقت أتشعبط في حد يملا حياتي.. أو اني مليان زحمة ودوشة واكتئاب، فقررت - من غير ما احس- أهرب من نفسي والبس حياة حد تاني!.. لكن مهما كان السبب فالنتيجة دايما واحدة.. علاقة تبدأ بـ "الحياة بقى لونها بمبي" وتنتهي بـ "أكتبلك تعهد".. فجأة الحب والمشاعر اللطيفة والدباديب الحمرا يتحولوا لسجن وخنقة وليالي سودة.. وبعد فقرة الكلام المعسول ندخل في وصلة ردح من العيار التقيل.. نجرح في بعض ونخرج فطسانين.. فريق مننا بيقرر (بعد علاقة من النوع دا) انه يعتزل الغرام ويقول ع الحب قسية ويقول دا شجن ودموع.. والفريق التاني بيلاقي نفسه داخل بسرعة في علاقة جديدة عشان يداوي الجرح ويخدر أعراض الانسحاب!.. فجأة وبقدرة قادر يلاقي نفسه مسحول في نفس الدايرة من جديد.. وسواء كنت من الفريق الأول أو التاني فالأزمة هي هي.. الفريقين ظلموا الحب.. والأهم انهم ظلموا نفسهم وظلموا غيرهم معاهم.. الفريق الأول قرر يسجن قلبه بحجة ان الحب بهدلة.. والفريق التاني عاشها "خوازيق عاطفية" من غير ما يختبر حب حقيقي في حياته.. وهكذا ممكن نعيش عمرنا كله مجروحين من الحب وسيرته، واحنا مش دريانين ان الحب بريء وبعيد أوي عن علاقاتنا!
- لما اللي احنا فيه دا "تعلق" أومال الحب يبقى ايه؟؟
الحب حرية مش تكتيفة.. الحب قرار مش ورطة.. اتنين مش واحد.. تمام زي ما قال كاظم الساهر: "وإني أحبك.. ولكن أخاف التورط فيكي التعلق فيكي التوحد فيكي".. وكمان زي ما قالت أنغام: "ومعاك انا بابقى حرة.. ما بخافش من السنين"
محتاج قبل ما اقول "بحبك" أكون متأكد اني شايف الطرف التاني كإنسان مستقل ومنفصل عني.. انه مش حتة مني ولا روحي شابكة في روحه.. اني باكون مبسوط ومرتاح وانا معاه، لكن كمان باعرف انبسط وارتاح مع ناس تانية.. ومع نفسي قبل الكل.
محتاج اكون واعي ان حبي مش بياخد من حريتي ولا من حرية اللي بحبه.. محتاج اكون واثق من مشاعري تجاه الشخص دا تحديدا، وإنها مش تعويض عن حاجة ناقصاني هو مالوش علاقة بيها!
على فكرة.. الكلام دا يمشي على كل علاقاتنا القريبة.. مش بس الحب الرومانسي أبو دباديب.
على فكرة تاني.. الحب الرومانسي أبو دباديب مش لازم يكون سذاجة ونحنحة.. بس المهم يكون حب مش تعلق!
على فكرة تالت.. الورد ساعات كتير بيكون أهم من الكباب يا ابراهيم.. بس بارضو دا مايمنعش ان الكباب مهم يا يسرية.
آخر على فكرة.. كل سنة وانتو طيبين.

[Rena Jesus]

ميرسى ربنا يبارك تعب محبتك

[Mary Naeem]

ربنا يبارك حياتك

[walaa farouk]

ميرسى كتير على مروركم الغالى

[MenA M.G]

موضوعك مميز .. طرح رائع
ربنا يبارك خدمتك