خدع خزعبلية .. خرجهم من دماغك و متخليش حد يضحك عليك!
خلّي عينيك و دماغك مفتوحين
انا و انت محاطين بكم كبير من الخدع اللغوية و الفكرية اللي بتنتشر في خلايا الحياة زي الفيروس و بتلوث الجو و بتخنق!
من أخطر انواع الخدع دي الخدع المعتادة المكررة اللي من كتر ما بتتقال حوالينا بنتعامل معاها من غير تحليل ولا مراجعة ..
و أخطرها على الإطلاق إللي إحنا بنقولها لنفسنا بوعي أو بدون وعي ..
و ادي ياعم أمثلة ..
١- "انت ده آخرك.. خلّي تفكيرك واقعي"
في كل مره حتحلم حتلاقي حد ابن حلال بيستعمل كلمة "واقعي" في جملة مفيدة و مدمرة بهدف انها تحبطك و تخليك ماشي مع القطيع..
راجع كده حتلاقي كل انجاز او نجاح مهم في الدنيا بدأ بحلم كان أبعد ما يكون عن الواقع وقت ما بدأ.. إحلم و اكتب أهداف و خطط و إبدأ..
حتى لو موصلتش بالظبط للي انت عايزه على الأقل حتكون عشت حياة ليها معنى و عملت قصة تتحكي.
٢- "مافيش حد بيتغير"
القاعدة الغلط دي اخترعها عقل مريض و غالباً كمان طلعت في يوم و ظروف مغيمة و ضلمة، بس من مكرها طلعت بلغة سهلة و قصيرة و بتدي إيحاء بإنها صح ..
الحقيقة إن إحنا بنتغير كل يوم و الحياة كلها في حالة تغير و تحول من حالة لحالة كل لحظة. أكيد الإنسان ممكن يتغير لو عنده حافز و عارف طريقة للتغيير..
غير وجهة نظرك قاطع وجهات النظر المستهلكة اللي ماليه السوق و دور على وجهات نظر فريش و جديدة حتلاقي سكك للتغيير
٣- "لما توصل ل ...... حتبقى سعيد"
السعادة و الرضا بالعلم و الدراسة و التجربة لا تمت بأي صلة مباشرة لأي حاجة مادية بنوصلها..
السعادة و الرضا إسلوب حياة و طريقة تفكير و وجهة نظر و معنى بنديه بنفسنا لمكونات حياتنا .. ما تفرطش في حقك انك تحس كويس و تبيع الوقت اللي انت فيه عشان تشتري بضاعة مؤجلة معاها وعد مزيف بالسعادة ...
اتصرف مع دماغك و اتبسط و ارضى دلوقتي ..
و لما توصل استعمل الوقت اللي انت حاسس فيه بسعادة ده في عمل الخير و اسعاد الناس فاحساسك يزيد و يكبر و ينتشر و يتوغل و يستمر
