محاكمة يونان النبى

walaa farouk · رقم المشاركة : ( 1 ) 29 - 01 - 2017, 08:11 PM

الحاجب :محكمة (كلنا نقف ماعدا المجموعة الرابعة القضاة )قضية رقم 1 المتهم يونان ابن امتاى
المجموعة الرابعة (القضاة والمستشارين )تنادى : باسم ملك الملوك ورب الارباب نفتتح الجلسة
المجموعة الاولى (وكيل النيابة )
المتهم يونان وقع فى عدة اخطاء .ربنا طلب منه يقوم برسالة عظيمة اوى انه يروح لشعب نينوى المدينة العظيمة ويقول لهم لو ماتوبتوش بعد 40 يوم الله هايهلم المدينة كلها
اولا ياسيادة القاضى : انه قرر يهرب من وجه ربنا لترشيش ازاى يفكر انه يهرب من وجه ربنا هو فى مكان ربنا مش موجود فيه ؟
ثانيا : وهو فى السفينة ولا كانه هنا كل اللى فى المركب لما هاج البحر يصرخوا لالهمم ويونان مافكرش يصلى لالهه مع ان البحارة اصلا مايعرفوش من الاله الحقيقى لكن كل واحد نده على الهه
ثالثا . بعد مالحوت رماه على الشاطىء ربنا طلب منه يقوم بنفس الرسالة وبعد ماراح لهم فضل قاعد على باب المدينة ومستنى يشوف ربنا هايحرق البلد ولا لا .لان حضرته مش فارق معاه ان الناس تتوب وترجع لربنا كل اللى فارق معاه انه كلمته ماتنزلش الارض وان اللى قاله يتعمل بدل مايفرح بتوبة الناس ورجوعهم لربنا
رابعا .انه زعل وطلب الموت لنفسه لما الدودة كلت اليقطينة اللى ربنا حطها عشان تحميه من الشمس يعنى ده حتى اليقطينة والدودة والبحر والرياح الكل سمع لكلام ربنا مع انهم ماعندهمش عقل والانسان اللى ربنا ميزه بالعقل هو اللى مايرضاش يطيع كلام ربنا .يعنى هو زعلان على اليقطينة ومش زعلان على مدينة كبيرة فيها اكتر من 120 الف نفس غير البهايم اللى فيها
وعلشان على كل الاخطاء دى انا باطالب باقصى عقوبة للمتهم يونان
شكرا ياسيادة القاضى

المجموعة الثانية (محامى يونان )
انا حاضر مع المتهم يونان واحب ااقول ان يونان ماكانش متعمد خالص انه مايطيعش كلام ربنا ولا حتى انه يهرب
اولا .انه كان عارف انه ربنا رحيم ولا هايقلب المدينة ولا حاجة فقال لنفسه انه لو ربنا عايز يهلك المدينة طيب بيبعت يديهم انذار ليه ماهو ممكن يحرقها من غير مايقولهم اصلا
ثانيا :وليه ربنا هايستنى 40 يوم على حرق المدينة ده معناه انه ربنا مش عايز يعاقبهم ولا حاجة وفى الاخر هو حس انه هايبقى مش قد كلمته وهايقول كلام ومايحصلش
ثالثا :كمان حس ان الظروف كلها مهياة انه يسافر الفلوس ومعاه السفينة وليه مكان فيها غير انه ياسيادة القاضى ماتنساش الدور اللى عمله يونان فى انه عرف البحارة على يسوع لانهم اول مارموه فى البحر وهدى البحر .كل اللى فى السفينة امنوا بربنا وقدموا ندور ليه يعنى دى حاجة تحسب ليونان وكمان هو اللى قال للبحارة ارمونى فى البحر عشان يهدا
رابعا : غير انه وهو فى بطن الحوت فضل يصلى وقدم توبة وصلى صلاة حلوة اوى من كل قلبه هاتلاقوها فى سفر يونان فى العهد القديم
خامسا اما بقى سبب اعترضاه انه يروح نينيوى لانه هو يهودى وبيحب شعبه اوى يعنى بيحب الناس اللى زيه وشعب نينيوى دول امميين يعنى مايهموناش فى حاجة اصلا احنا مالنا بيهم دول مش شعب ربنا يعنى ربنا يرحمهم ليه اصلا
ساداسا واخيرا انه فضل ماشى 3 ايام على رجليه لحد ماوصل لنينوى وبلغهم بالرسالة وعلشان كل الاسباب دى انا باطلب من حضراتكوا براءة يونان او تخفيف العقوبة عنه شكرا

المجموعة الثالثة : الشهود (الملاحون –البحر والرياح – الحوت – اهل نينيوى – اليقطينة – الدودة )
الملاحون : احنا ياسيادة القاضى ماكناش عايزين نرمى يونان فى البحر خالص بس لما البحر هاج اوى حاولنا بكل الطرق نرمى كل الشنط اللى معانا عشان نخفف الحمولة عشان السفينة ماتغرقش لحد مايونان هو اللى قال لنا ارمونى عشان ماتهلكوش .لكن احنا امنا بالرب يسوع وقدمنا ليه الندور وبنششكره انه الاله الحقيقى وانه ماسمحش اننا نهلك فى البحر
البحر والرياح : احنا زعلنا من يونان شفناه وهو بيهرب من ربنا وبيعصى كلامه احنا سمعنا كلام ربنا لما امرنا نهدا من تانى لان هو اللى عملنا ازاى نخالفه بكلمة واحدة بنطيعه
الحوت : الصراحة يونان وهو جوايا انا شايفه عمال يصلى صلاة جميلة خالص وبالرغم من انى مابخليش حاجة ماكلهاش لكن سمعت ربنا وحافظت على يونان وبلعته بس جوايا ولما ربنا طلب منى ارميه على الشط نفذت فورا ماهو اللى خلقنى لازم اطيعه
اهل نينوى : احنا بصراحة اول ماجه يونان وبلغنا برسالة ربنا احنا حسينا بغلطنا قد ايه وقولنا لازم نقدم توبة عن كل الشر بتاعنا لدرجة انه الملك طلب من كل الشعب يصلى ويصوم ويتوب ومافيش اى حد ياكل من اكبر حد لاصغر حد فى المدينة حتى البهايم والحيونات منعناها عن الاكل والشرب .والملك لبس المسوح وقلع اللبس الملوكى بتاعه لاننا قدمنا توبة ولان برده ربنا اله رحيم وبيغفر الخطايا ربنا حلو اوى اوى ازاى ضيعنا وقت كبير كده من غير مانعيش معاه وازاى شوفنا انه ربنا مش بيحب الناس تموت وهى فى الخطية بالعكس كل الناس تتوب وترجع له وتفرح بالعيشة معاه وبحبه
الدودة واليقطينة : احنا شفنا يونان وهو قاعد تحت اليقطينة وشفنا قد ايه زعل لما ربنا طلب منى انا الدودة انى اكل اليقطينة اللى بنت يوم وليلة ولكن احنا لازم نسمع كلام ربنا فى كل اللى قاله لينا ماهو اللى خالقنا شكرا ياسيادة القاضى انك سمعتنا

المجموعة االرابعة: القضاه والمستشارين
بعد ماسمعنا وكيل النيابة والمحامى والشهود قررت المحكمة الاتى :
اولا : توجيه الشكر للاخ يونان اللى عرفنا قد ايه حب ربنا وغفرانه وطول اناته على كل الخطاه
ثانيا توجيه كل الشكر لربنا لمحبته لانه بيستخدم ناس فى ضعفنا زى يونان وزينا وانه عرفنا انه كلنا معرضين نغلط حتى يونان بالرغم من انه نبى للكن وقع فى خطا وده لان كلنا بشر بنغلط وانه ربنا بالرغم من انه ممكن يقوم بالمهمة دى لوحده بسهولة الا انه استخدم يونان وعلمه حاجات كتيرة
ثالثا توجيه الشكر لاهل نينوى المدينة العظيمة انهم سمعوا رسالة ربنا وقدموا توبة بسرعة وماحبوش يسيبوا ربنا زعلان وعرفنا ازاى ربنا يقدر يغير شعب خاطى وبلد كاملة كلها زى نينوى يعنى مافيش حاجة اسمها دول ناس خاطية ومافيش امل دايما نقدر نقدم توبة وربنا بيفرح بالتوبة وبيقلبها
رابعا توجيه الشكر للاخ يونان انه اعترف بلغطلته قدام البحارة وكان سبب فى معرفته بربنا واستعداده يموت عشان كل اللى فى السفينة مايموتوش بسببه
خامسا : كل الشكر لربنا انه ورانا انه زى ماكان يونان فى بطن الحوت 3 ايام و3 ليالى ربنا يسوع قعد فى القبر 3 ايام وبعدها قام من الموت
واخيرا نحب نقول لينا ولكل الحاضرين اننا نتعلم من يونان ونطيع كلام ربنا مش عشان خايفين منه لكن عشان بنحبه لانه هو اصلا بيحبنا من قبل مايخلق كل واحد فينا ومهما نغلط ربنا برده بيفضل يحبنا وفاتح قلبه وحضنه لينا كل اللى علينا مش اننا مانغلطش لكن لما نقع فى الغلط نجرى ونقدم توبة لربنا يسوع ونرجع لحضن ربنا
ولكل الاسباب دى حكمت المحكمة حضوريا ببراءة المتهم يونان من كل التهم الموجهه اليه .رفعت الجلسة