حقائق عن خريج كلية الطب:

Rena Jesus · رقم المشاركة : ( 1 ) 27 - 01 - 2017, 06:23 PM

حقائق عن خريج كلية الطب:

1- التخرج بيكون هو بعد حوالي 7 سنين ميلادية بواقع 6 سنين دراسية - so احنا مش بنبالغ لو قولنا الطب 7 سنين، والنص سنة دي كرم اخلاقكم يعني عدوها
..

2- بيتخرج اسمه الرسمي "طبيب تدريب" او امتياز - لمدة سنة واحدة، وفي اقوال اخرى بيدلعوه يا ميزو.. تعالي يا ميزو..روح يا ميزو
..

3- بعد سنة واحدة بياخد رخصة مزاولة مهنة، ويبقى اسمه ممارس عام، وهو طبيب كامل الاهلية طلاق تلاتة ومش ناقصة ايد ولا رجل وبيقدر يكشف على معظم الحالات، ولأ مش لازم يتخصص عشان يبقى دكتور، هو كده خلاص بقى دكتور رسمي نظمي فهمي الحمدلله.
..

4- التخصص بياخد حوالي 4-5 سنين وبيبقى بناءًا على المجموع والنيابة والتسجيل وحاجة كده منتهى قلة الادب، فبوراحه وحياة عيالكم ووحياة اغلى حاجة عندكم، متستعجلوش هنتخصص هنتخصص، بس ايه وامتى دي في علم الغيب او اسألوا الحجة ام خديجة المغربية
..

5- مش عيب لما اعملك تحويل للاخصائي عشان معرفتش اشتغل على حالتك، ولهذا خلق الله التخصصات المتعددة، عشان مافتيش، وانت كبني آدم محترم المفروض تحترم الدكتور اللي عايز مصلحتك اكتر من الدكتور الفتايّ.. بس انت بومة نقول ايه بقى.
..

6- الاخصائي بيعرف اكتر من الممارس العام في تخصصه وده شئ بديهي، فمتجيش تختبرني وتسألني عن حاجة معينة وانت سائل اكتر من اخصائي وهارس الموضوع 100 مرة، عشان دي قلة أدب بيور.
..

7- اه احنا بنفضل طول عمرنا نذاكر.. استريحتي؟ هديتي؟ اتبطيتي؟
..

8- الدكتور بيخرج ويشوف اصحابه وبيسافر وعنده حياته الاجتماعية كل ده وسط ضغط شغله ونباطشياته وحاجاته الكتيرة، لكنه مش مُلزم يعمل showing-off لكل حدث وكل خروجه في حياته، إذن الصورة النمطية عن الطبيب انه اجتماعيًا زيرو، عاطفيًا زيرو، ماديًا زيرو، دي صورة مشوهة وغبية، بالعكس الدكتور بيعرف يـهندل كل ده مع بعضه.
..

9- شكله ملوش علاقه بسنه وخبرته...شكله ملوش علاقة بسنه وخبرته.. اقولها ولا اعيدها ولا ايه؟!.. مش مشكلتي إنك شايف الدكتور اللي قدامك شكله صغير فبتعامله انه حد صغير مش فاهم حاجة ومش هيعرف يعالجك، لأ يبقى انت اللي عديم النظر لمؤخذة.
..

10- اللبس الرسمي للدكاترة في النبطشيات هو "الاسكرب" ايوة الترنج العجيب ده الازرق او الاسود او اللبني ده او اي لون تاني.. وطبيعي مش هيقدر يقعد 24 ساعة بالجذمة، فبيلبس كروكس، فمفيش داعي للاستظراف على اللبس ده، اكيد مش هنقعد لابسين فورمال وفيونكات وفساتين ومستنين على باب الاستقبال