ليه زوجتك بتحب الخروج

[walaa farouk]

حضرتك بتروح شغلك كل يوم ..8 ساعات يوميا ...و ترجع البيت وعايز ترتاح و هذا حقك

تخيل حضرتك شغلك طلب منك تشتغلوا 16 ساعة يوميا اجبارى على كل العاملين يا إما يرفدك

طب تخيل لو طلب 24 ساعة يوميا !!

ـ زوجتك بأة البيت دا هو مقر شغلها ..هو الشغل بتاعها
طول النهار و طول ماهى فى البيت غسيل و طبيخ و تنظيف و ترتيب و تلبية طلباتك و طلبات الأولاد ..و لو فيه رعاية طفل رضيع من أكل و غيار و لعب ..
ولما يكبر شوية مذاكرة وواجبات و حل مشكلات ...
ولو فيه عدة أطفال يبقى كل دول مع بعض فى وقت واحد .
و ياسلام لو بتشتغل كمان ...

البيت عزيزى بالنسبة ليها مش مكان للراحة زى حضرتك
هى طول ماهي موجودة فى البيت و هى بتشتغل 16 ساعة
و لو عندها طفل رضيع يعنى بتشتغل 24ساعة

وحتى لو ارتاحت و قعدت أدام التليفزيون شوية و لا مسكت التليفون
و لا قعدت على الفيس ...هى تحت الطلب

يعنى زى بالظبط ماحضرتك قاعد فى البيت بس ممكن يطلبوك فى أى وقت من ليل أو نهار ...زى الدكاترة كدة ..تحت الطلب فى أى وقت

دى حاجة مجهدة جدا نفسيا ..إن مفيش وقت للراحة ..
هى محتاجة وقت تحس فيه إنها غير مسئولة ...
إنها ليست تحت الطلب ..حتى لو خرجت بالأولاد بتكون مسئولة عنهم ..

.علشان كدة حاول تخرجها من غير الأولاد ...
و أعتقد إن ساعة أو ساعتين أسبوعيا مش هتخرب البيت .

لو الأولاد صغيرين ..و صعب تسيبهم عند حد ..عارف لو ناموا بالليل و نزلت نص ساعة بس شربتها عصير ...و لا جبت لها شيكولاته ولا آيس كريم و رجعتوا دى حاجة هتبسطها أوى .

طب بلاش ..أخرجوا في البلكونة أو اطلعوا سطح البيت في وقت يناسبكم .بس ماتقولهاش اعملى ترمس شاى و ساندوتشات و فين الترمس و اللب و السودانى لزوم القاعدة..

طلبات طلبات ...ارفع عنها المسئولية شوية ..

إديها فرصة إنها ترتاح نفسيا من حمل المسئولية و الطلبات .

عارف مشكلتك إنك حاسس إن البيت مكان الراحة بالنسبة ليك
و إنها المسئولة عن البيت إزاى تسيبه و تنزل

طب و بعدين ...ماهى لازم ترتاح من الحمل شوية ..

هى مش كومبيوتر ممكن يشتغل 24 ساعة ...دا حتى الكومبيوتر بيهنج
و بيحتاج يتعمل له ريستارت .

احرص عزيزى إنك تعملها ريستارت كل شوية ..بدل ما تهنج ..

و بعدين تشتكى إنها نكدية !!!!!!!

[Rena Jesus]

ميرسى ربنا يبارك تعب محبتك
ليه زوجتك بتحب الخروج