انت متخلقتش علشان تستسلم

[Rena Jesus]

كنت باخد درس في مادة الكيمياء في ثانوية عامة ..
كان دايما المدرس ده محبط جدا بالنسبالي ودايما كلامه سلبي ..
في الاول اتعقدت من مادته وقرفت منه ومنها حرفيا ..
بس الكلام ده مستمرش كتير لقيت نفسي مش بعمل حاجة غير انى بذاكر المادة دى ليل نهار ولاول مرة اتحديت نفسي انى افهمها وحدى .. انى هحاول اعديها ..
انى مفيش حاجة صعبة هتوقفنى .. كنت كل ما افتكر احباطه ليا اذاكر اكتر واكتر ..

لحد ما امتحنت وظهرت النتيجة وجبت درجة حلوة جدا والمدرس ده لما شافنى انا فاكرة انه سألني بتهكم كده جبتي كام ..
ولحد دلوقتى فاكرة نفسي وكنت اد ايه فرحانه وانا بقوله النتيجة واد ايه هو اتصدم وسكت ومكملش كلام حتى ..

ناس كتير هتقولك مش هتقدر وناس كتير هتحاول تتعبك وناس كتير هتأثر عليك تأثير سلبي في حياتك ..
ممكن ميكونش ده عيب فيهم ممكن يكونوا هما كده مفيش حاجة بتعجبهم وممكن يكونوا عندهم نقص وبيطلعوه عليك وممكن تكون انت كده فعلا ..

الكلام ده في دراسه .. في شغل .. في موضوع ارتباط .. في اى حاجة .. بيحصل كتير
المهم انك متستسلمش .. متسيبش ودانك ليهم .. متخليش كلامهم يأثر عليك
لأ .. كل كلمة سلبية تسمعها خد قرار انك هتخلق منها حاجة حلوة ..هتنجح من خلالها ..
كأن ربنا سمح ان الكلمة دى توصلك علشان تستفيد منها مش العكس

انت متخلقتش علشان تستسلم .. انت بايديك تحقق نجاح خاص بيك الناس تتكلم عنه
مرة كنت قاعدة مع واحد قريبنا كبير في السن و خبرته مش قليله ..
قالى تشيلي من قاموسك 3 كلمات ترتاحي في حياتك
(معرفش_مقدرش_مستحيل)

وفي النهاية لو حسيت انه فاض بيك .. انك جبت آخرك .. و انك مش قادر وبتقع ..
حول نظرك لربنا وافتكر الآيه الجميلة اللى بتقول ..
"(تك 18: 14): هَلْ يَسْتَحِيلُ عَلَى الرَّبِّ شَيْءٌ؟ "

cpd

[walaa farouk]

ميرسي على مشاركتك الجميلة رينا

[Mary Naeem]

مشاركة جميلة جدا

ربنا يبارك حياتك

[Rena Jesus]

ميرسى لمروركم الغالى

[MenA M.G]

دائماً مُشاركاتَكْ رائْعة
موضوعك مُمَيز
ربنا يبارك خدمتك

[Rena Jesus]

ميرسى لمرورك الغالى