انا مارينا رؤوف .. كنا في مصر عشان اجازة عيد الميلاد .. و خلصت اجازتنا يوم8/1/2017 .. يوم السفر لمينا كل الشنط و الحاجة بتاعتنا من البيت و نزلنا علي بيت اهلي عشان نسلم عليهم قبل مانسافر و احنا هناك سألت زوجي هي فين جوازات السفر قالي برة علي السفرة ..وجة معاد النزول من البيت عشان نروح المطار .. و ابتدت من هنا المشكله ان الجوازات مش موجودة في البيت فقولنا يمكن نكون نسينها في العربية .. نزلنا ندور و نقلب العربية من فوق لتحت من كل حتة فيها و بردو مش موجودة ساعتها قولنا اكيد بقي نسينها في البيت و اتقسمنا جزئين. . بابا و عمي راحوا المطار و انا و زوجي و اخويا و زوج اختي روحنا البيت نجيب الجوازات .. طلع زوجي البيت و دور كتير بس للأسف ملقش الجوازات و من هنا طلبنا القديس ونس صاحب الأشياء المفقودة .. كلمت بابا و عمي في التليفون و قلتلهم افتحوا الشنط و دوروا فيها يمكن نكون حطناهم و ماخدناش بالنا و بردو كلمنا ماما و اختي يدوروا في البيت عندهم .. المهم احنا روحنا المطار و قلبنا الشنط كلها في الشارع و للأسف بردوا مالقناش حاجة .. روحنا رجعنا للعربية تاني و دورنا في كل حتة فيها و نزلنا كل حاجة في شنطة العربية حتي عربية بنت اختي الصغيرة و مالقناش اي حاجة .. و كل الوقت دة كل واحد في العيلة كان بيطلب القديس ونس .. سلمنا امرنا لربنا و قلنا منعرفش الخير فين .. اكيد ربنا مرتب حاجة وبجد كل الناس الي كانوا معنا كانوا مستغربين الهدوء الي انا كنت فيه .. و دخل زوجي مكتب الطيران و دفع رسوم تأجيل تذاكر السفر .. و قلنا نطلع علي القسم و نعمل محضر فقدان جوازات سفر في الطريق ابدا اخويا و جوز اختي يقولوا ان اكيد ربنا هيتصرف و اكيد القديس ونس هيجيب الجوازات .. سعتها الشيطان لعب في دماغي و حسيت ان الدنيا قفلت في وشي و قلتلهم مفيش حاجة اسمها كدة و دة مش هيحصل عشان هما مش موجودين .. و دخل زوجي و اخويا القسم لعمل المحضر لكن قالولهم المحضر بكرة الصبح من الساعة 8.30 .. طبعآ مكنش قدمنا اي حل تاني غير اننا نرجع البيت و نستنا الصبح يطلع عشان نعمل المحضر و نقدر نطلع جوازات جديدة .. و احنا تحت البيت فتحنا شنطة العربية عشان اخد الشنطة الصغيرة و معرفش لية لقيت نفسي بقول لزوجي و جوز اختي ممكن طيب تحطوا ايدكوا جوة عربية البيبي بتاعت بنت اختي رد عليا اخويا و قالي مااحنا شفناها قبل كدة ماكنش في حاجة .. و كانت المفاجأة أنهم فعلا لقوا الشنطة الي كان فيها الجوازات و كمان لقوا الإقامة و رخصة العربية و كل حاجة .. مع العلم أننا فعلا قلبنا العربية و دورنا في كل حتة فيها قبل كدة بس بجد ساعتها حسيت اني ضعيفة الإيمان اوي و ان القديس ونس دة فعلا شفيع عظيم و انا وعدتة اني هكتب المعجزة و اعملها شير في كل حتة.
شكرآ بجد للقديس العظيم القديس ونس صاحب الأشياء المفقودة.
#القديس_ونس
#شفيع_الاشياء_المفقودة
#القديس_ونس_الاقصري
11 - 01 - 2017, 12:20 PM
قد تكون مهتم بالمواضيع التالية ايضاً
العرض العادي
