هو ربنا ممكن يسيبك ؟!
يعني ممكن يبعد عنك شويه ؟!
احب افاجئك واقولك : ايوه ممكن ..
ربنا أحيانآ بيغيب عنك وكأنه سابك ..
بتدور عليه ومتلاقيهوش .. بتتعب وروحك تحس بعجز ويأس وفشل ..
تنادي عليه وكأنه مش سامعك .. تلجأله وكأنه مخاصمك ..
بس ف غيابه حكمه .. وبعده عنك ليه سبب
زمان سأله داود وقاله : يَا رَبُّ، لِمَاذَا تَقِفُ بَعِيدًا؟ لِمَاذَا تَخْتَفِي فِي أَزْمِنَةِ الضِّيقِ؟!
ربنا مزعلش من داود وقاله انت ازاي بتكلمني كده ؟! ..
مغضبش عليه ولا عاقبه ..
ربنا كان عارف ان داود تعبان ومرهق نفسيآ ومحتاج معونه ورجاء ..
وداود كان عارف ان ربنا مهما اختفي هيبان .. ومهما بعد هيقرب
وعروس النشيد برضه قالت : في الليل علي فراشي، طلبت من تحبه نفسي. طلبته فما وجدته !
يمكن يكون ربنا سابك شويه علشان يوحشك وتحس بقيمته .. ويمكن يكون سابك علشان يقويك ..
_ايوه يقويك_
النسر لما بيحب يعلم ولاده الطيران .. بيرميهم من فوق ..
بيسيبهم علشان يتعودوا يطيروا لوحدهم وعضمهم ينشف ..
ولما يحس انهم ممكن يقعوا بيلحقهم قبل ما يضيعوا ويتكسروا ..
ويفضل وراهم لحد ما يفردوا جناحهم ويطيروا بين الجبال والسحاب ..
ربنا لما بيبعد بيفضل مراقبك من بعيد وعينه عليك من اول السنه لأخرها ..
ولما بيغيب بيرجع بتعويضات وافراح مالهاش نهايه
صدق انه مسيره يعود .. صدق انه هيرجعلك ولو ف الهزيع الرابع
صدق ان 2017 هتكون سنة البركه والتعويض والمراحم الالهيه ..
لو حسيت ف 2016 ب حزن ووحده ومشاعر سلبيه ..
لو قلبك زعلان من ربنا .. لو دورت في كل المدينه ومعرفتش تلاقيه ..
لو سألت الناس مع عروس النشيد : أَرَأَيْتُمْ مَنْ تُحِبُّهُ نَفْسِي ؟! ..
لو اشتقت من كتر الصبر .. استعد ف 2017 لمفاجأت ربنا ف حياتك ..
يسوع غيابه مبيطولش ! <3
لحيظه_تركتك_وبمراحم_عظيمه_سأجمعك
"مينا مجدي"
