المحطة الجاية

[walaa farouk]

الجواز عمره ما كان غاية ولا نهاية مطاف.. وعمره ما كان ختم الكمال ولا علامة الجودة.. الجواز قيراط من 24 قيراط ...
- البنت للجواز
- مش هنفرح بيكي؟
- ربنا يعدلهالِك
كلام كتير كبرنا واتربينا عليه من غير ما نفكر في معناه ولا نتأمل احساسنا تجاهه.. وخصوصا البنات.. كل بنت مصرية "أصيلة" كبرت وهي محصورة جوه مثلث الرعب: انتظار العَدَل.. الخوف من الجنس.. والرعب من العنوسة!
قد ايه صعب ومحير لما البنوتة اللي عندها 12 ولا 13 سنة يبدأ جسمها يعبر عن أنوثتها.. وفجأة لبس المايوه يبقى ممنوع عشان هي كبرت خلاص.. وفي نفس الوقت يبقى الماكياج والكعب العالي ممنوع عشان هي لسة صغيرة!.. ولما تكبر كمان شوية تبقى مش محترمة لو اتكلمت مع ولد غريب.. وفي ذات نفس الوقت تبقى خايبة وعبيطة لو ماعرفتش تطلع بعريس من الجامعة أو النادي!.. وآه يا ويلها لو عدت الخمسة وعشرين وهي لسة في بيت أبوها.. ومهما كانت ناجحة في دراستها ومهما حققت ذاتها في شغلها، برضو هيفضل ناقصها أهم حاجة.. العَدَل وفرحة العمر اللي هتخليها زي كل البنات!.. وفجأة حياتها تتحول لمحطة انتظار.. انتظار ابن الحلال اللي هييجي ينقذها من لقب "عانس"، ومن همهمة الناس ومصمصة الشفايف.
يا ترى كام بنت اتجوزت واحد ما بتحبوش، لمجرد انها خافت تعنس؟!.. يا ترى كام شاب اتجوز عشان عاوز يمارس الجنس في إطار شرعي؟!.. أصل زي ما البنت اتربت على ان جوازها يعني قيمتها والغاية والهدف من حياتها.. الولد اتربى على إن الجواز هو وسيلة الراحة والمتعة وفرض السيطرة.. وعشان كدة شباب كتير بيتجوز عشان يعيش دور راجل البيت اللي يؤمر، وينهي، ويعوض عقد النقص اللى اتربى بيها.. طبعا مفيش تعميم.. لكن هنبقى بنضحك على نفسنا لو قلنا إن الغالبية (شباب \ بنات) بيتجوزوا عشان هما عاوزين يتجوزوا!
تحية لكل بنت مش خايفة من لقب "عانس"، ومش هتورط نفسها في جوازة فاشلة عشان تبقى كاملة في نظر الناس، ومقبولة اجتماعيا.
تحية لكل شاب مش عايز يتجوز إلا لما يبقى واعي باحتياجه لإنسانة تشاركه حياته.. ويكون اختارها بقلبه وعقله.
تحية لكل انسان فاهم ان الجواز مش روتين إجباري.. وإنه قرار واعي مبني على قدسية ومسئولية.
الجواز علاقة بين اتنين عاوزين يكملوا حياة بعض.. من غير ما حد فيهم يقضي على استقلالية التاني وحريته.
الجواز عمره ما كان غاية ولا نهاية مطاف.. وعمره ما كان ختم الكمال ولا علامة الجودة.. الجواز قيراط من 24 قيراط .. محطة ضمن محطات كتير بيعدي عليها قطر حياتنا، أو ما يعديش!.. ومفيش رحلة بتقف على محطة.. القطر بيكمل، والمحطات ما بتخلصش.. طول ما في العمر بقية.
إذا كان الخوف من لقب "عانس" ممكن يجبر البنت في مجتمعنا على أي جوازة والسلام..
هل ممكن البنت تتجوز لمجرد احتياجها لضل راجل؟!..

[Rena Jesus]

ميرسى ربنا يفرح قلبك
المحطة الجاية....