ماتبلعوش بعض!

walaa farouk · رقم المشاركة : ( 1 ) 05 - 11 - 2016, 10:22 PM

فيه نوع شهير من العلاقات الإنسانية اسمه (علاقة البلع)..
فى العلاقة دى فيه طرف بيخلى نفسه هو المصدر الوحيد لكل حاجة بالنسبة للطرف التانى.. مصدر الحب، والأمان، والحنان، والحماية، والعطف، وكل حاجة..

ممكن أم تبلع أولادها.. توصلهم طول الوقت إن المكان الوحيد الآمن فى الكون هو جنبها وبين ايديها.. الناس وحشة.. الأصحاب مش كويسين.. ماتخرجوش.. ماتسافروش.. خليكوا هنا معايا.. معايا وبس.. جوه أعمق نقطة فى حضنى.. وبيكون جواها رغبة نفسية دفينة انهم يرجعوا جوه بطنها/رحمها تانى..

ممكن زوجة تبلع جوزها.. أو زوج يبلع مراته.. محدش بيحبك غيرى.. محدش بيفهمك زيي.. قوللى على كل حاجة وكل شئ.. كل تفاصيل حياتك لازم تبقى عندى.. اوعى تتنفس.. اوعى حتى ترمش بعينك.. ماتسيبنيش لوحدى.. وأنا برضه مش هاسيبك لوحدك..

ممكن أصحاب يبلعوا بعض، وكل واحد فيهم يعمى نفسه عن الحياة ومايشوفش فيها غير صاحبه.. اللى لو بعد عنه.. الدنيا تتهد..

وطبعا كتير من علاقات الحب.. مليانة بلع..

النوع ده من العلاقات بيؤدى لنتيجة واحدة حتمية مالهاش احتمالات أخرى.. وهى إنها من ناحية بتوقف النمو.. بتمنع الكبران.. بتخلى الطرف الآخر دايما ضعيف وصغير وخايف وقليل الحيلة.. دايما محتاج الحماية والموافقة والاعتمادية.. عمره ما يحس بنفسه ولا اختلافه ولا تفرده.. عمره ما يبقى نفسه.. لأنه دايما هايبقى نسخة ممسوخة مبلوعة مشوهة من كائن تانى اتمسحت ملامحه..

ومن الناحية التانية بيتخلق غول بشرى ضخم جعان مش بيشبع من بلع البنى آدميين وجرهم إلى أفخاخه النفسية..

بالمناسبة.. ساعات ده بيكون المعنى النفسى (لأمنا الغولة).. و(للنداهة) اللى بتنده على ضحاياها فى كل مكان.. علشان تلتهمهم.. وتملا بيهم بطنها..

حافظوا على حدودكم النفسية من الاختراق والاقتحام والاختفاء..

قولوا (لأ) لأى حد يحاول يمسح وجودكم فى وجوده..

ماتسمحوش لحد يبلعكم..
ماتبلعوش حد..
وماتبلعوش بعض..