رساله هامه جدا الي كل أم :

Rena Jesus · رقم المشاركة : ( 1 ) 30 - 10 - 2016, 10:27 AM

رساله هامه جدا الي كل أم :

ابوس ايديك علمي ابنك مفهوم الرجوله صح علشان ما يبهدلش بنات الناس ، وحضرتك اكيد عندك بنت برضو ونفسك تلاقي ليها راجل حقيقي يصونها ويخاف عليها ،

علشان كده ارجوكي علميه الأتي :
١- الرجوله جدعنه مش هز كتاف
يعني يحميها بقوته مش يضربها ، ويصرف عليها بفلوسه مش يبخل او يصرف علي غيرها ،

٢- شغل البيت وغسيل المواعين مش شغله ستات
دي تطوع للقادر ، يعني ينفع يعملها احيانا لو هي تعبانه او زهقانه او مشغوله طالما عنده وقت ، زي ماهي ممكن تساعده في مصروف البيت لو بتشتغل او قادره ، دي ادوار وكل واحد بيعمل اللي يقدر عليه بحب ، علشان كده خليه احيانا يساعد اخته في شغل البيت ، مش تقولي لبنتك قومي يابت هاتي كوبايه ميه لاخوكى !!!!
انتي كده بترسخي لمفهوم صناعه سي السيد وامينه .

٣- لما تقلبي الدنيا علشان بنتك اتعرفت بشاب من وراكي ده صح جدا ، بس يبقي غلط جدا لما بنتك تشوفك بتضحكي معاه وبتقوليله ياشقي ازاي مصاحب كل البنات دي ، وخصوصا انه بيرجع البيت كل يوم وش الصبح وهى متلقحه طول الاسبوع في البيت !!!
كده يافندم بنتك هايجيلها شلل رباعي وممكن خماسي وتدخل بيهم اولومبيات معوقين .

٤- لازم تعودي ابنك ان سلطته علي اخته من باب الحب والخوف عليها ، مش من باب انه راجل وهي ست ولازم يشكمها ويربيها ويراقبها علشان ماتجبلكمش العار ،سلطته عليها اخويه وصداقه ، يعني يبقي الصاحب اللي يسمع ويغفر ويقدر مشاعرها وظروفها ويحس بيها ، علشان يعمل كده مع مراته ف المستقبل،
طب تخيلو انا جالي مره شاب بيعيط ويقولي اختي داخله ع الاربعين وماتجوزتش وانا ٣٠ سنه ومش عايز اتجوز علشان ماتحسش بالوحده لاني صديقها الوحيد ، اهو ده الاخ ولا بلاش .

٥- ماينفعش تعتبري تأخر ابنك في الجواز شئ طبيعي وتفرحي لانه جنبك وبيسليكي ومش عايزه واحده تخطفه منك ، وفي نفس الوقت تشوفي ان تأخر بنتك ف الجواز كارثه وبتحلمي بأي شنب يأخدها ويغوروا علشان تخلصي منها وتستريحي من همها ، ياحاجه ركزي ، دي هى اللي بتسليكي وتخدمك .

٦- لما تروحي تخطبي لأبنك بلاش تبيعي وتشتري في بنات الناس ( دي قصيره ودي طويله ودي امها اللي بتتكلم ودي قاعده متنحه )، ده علي اساس انك جايبلهم كاظم حسني ، يافندم ركزي لان ابنك فيه كل العيوب اللي قولتيه دي وزياده ، والناس ساكته ومحترماكي

٧- لو بنتك عيانه خلي أخوها هو اللي يوديهم للدكتور او علي الاقل يروح معاكم علشان يتعود يشيل مسئوليه غيره .

٨- لازم ابنك يشتغل في الاجازه حتي ولو ببلاش حتي ولو صبي عجلاتي علشان يتعلم يجيب فلوس ويبطل دلع ، وحاربي علشان يشتغل بعد الجامعه ومايقعدش علي القهوه حتي ولو اضطريتي تنكدي عليه عيشته وتكرهيه ف البيت وتحجمي خروجه في نفس الوقت ، كمان لازم تخدي اي جزء من مرتبه كمساعده في البيت حتي ولو مش محتاجه ،وياريت تعوديه يجيب اي حاجه من مرتبه لاخواته وتخليهم يشكروه جدا وبحسسوه برجوته .

٩- لازم تعودي ابنك من صغره علي حريه الاختيار واستقلال القرار ،،'يعني يختار هدومه حتي ولو مش عجباكي ، يختار قصه شعره واصدقائه وكليته ، لأن حضرتك انتي وابوه دوركم استشاري ارشادي تنصحوا بحب فقط وهو يجرب ويخوض وينجح ويخطأ ويتنيل علي عينه علشان مايبقاش قاعد جنبك وجنب العروسه يوم فرحه وبيوشوشك ( لو سمحتي يا ماما البسها الشبكه ولا اتقل عليها شويه ) .

١٠- سيبي ابنك وخطيبته يختاروا شبكتهم وبيتهم وعفشهم ومكان شهر العسل ، لأن دي بدايه خطوات تحوله من شاب اهله كان متحملين مسئوليته لرجل هايتحمل مسئوليه بيت وزوجه واولاد ، وارجوكي لما تزوريه بعد الجواز بلاش تنتقدي مراته وطريقه توضيبها لبيتها ومطبخها، انتي مالك !!