متزعلش فى نصها

[walaa farouk]

وقفت عاجز قدام الكلام اللى كتبته ..
امير عايزة احكيلك حكايتى ..
ودى حكايتها ..

اتجوزت وهى صغيرة ..
وربنا ما بخلش عليها بالفرحة ..
يو ما عرفت انها حامل ..
كانت الدنيا مش سايعاها ..
9 شهور .. وهيصة وزغاريد ..
واد قمر .. وفرحة ماتتوصفش ..

عدى اول يوم ..
عياط وصراخ ومافيش اكل ..
اليوم تانى ..
لا كدة الموضوع زيادة ..
نزلوا بيه ع المستشفى ..
وهى فى البيت ..

شوية وسمعت كلاكس العربية ..
جريت ع السلم عشان تطمن ..

ووقفت مكانها ..
لما لأول مرة تشوف دموع جوزها ..
وتحس صوته خارج بوجع ..
وهو باصص لمامته ..

والجملة اللى خلت الدنيا تلف بيها ..
"ابنى مات يا ماما"

عرفت ساعتها ..
يعنى ايه اول مرة تتكسر فى حياتها
12 يوم وجع ودموع بعد الولادة القيصرية ..
شوية تعب تانى ..
حضرتك لازم تعملى الزايدة حالاً ..

وتعدى الايام .. وكمان 6 شهور ..
ايه دا .. انا حامل ..
ياما انت كريم يا رب ..

9 شهور .. وشرّف الواد القمر ..
وكأن الحزن اتمسح واتنسى ..
والفرحة رجعت تخبط على بابهم تانى ..

شوية تعب .. تانى؟؟؟؟؟؟؟؟؟
لأ مش هاستحمل يارب ..

راحوا بيه المستشفى ..
بلاش يارب .. مش هاقدر ..
اتحجز فى الحضّانة .. وهى فى البيت ..
5 ايام عدّوا كأنهم سنين ..

وكأن أخوه اللى سبقه بيندهه ..
ويقول ربنا الكلمة الاخيرة ..
وبسترد وديعته ..

كان نفسها بس تشوفه قبل ما يمشى
بس ماحدش رضى يوريهولها

الوجع بقى جواها جبل ..
والكسرة بقت تقيلة عليها قوى ..
حتى الحاجة الحلوة بقى طعمها مر ..

واتحولت لشبح انسان ..
وبعد ماكانت الضحكة عنوان كلامها ..
بقى السكوت هو اللغة الوحيدة اللى تعرفها ..

سنة ونص عدّوا ..
بتشوفهم وتتخيل بيهم ..
حتى احلامها .. بقوا هم ابطالها ..

وزاد وغطى .. نظرات اللى حواليها ..
اللى تخبى ولادها منها ..
صعبانة عليهم .. يمكن ..
اتشائموا منها .. جايز ..
ومع كل عزومة على سبوع بيبى جديد ..
يتفتح باب ذكربات مالهاش اخر ..

بس الجميل فى كل ده ..
انها حتى الوقت اللى نسيت فيه ربنا ..
ربنا مابينساش ..
شوية والدنيا هديت ..
ورجعت تانى تكلم ربنا ..

عدّى حوالى سنتين ..
وحست نفس الاحساس ..

ايه دا .. حامل ..
ولأول مرة يبقى الاحساس .. خوف
بس العشم فى ربنا كان كبير ..

9 شهور وتيجى بنوتة قمر
وتعدى سنين عمرها قدام عينيها
رضيت وقالت .. هى وبس

بس البنوتة كبرت وسألت ..
هو انا ليه ماعنديش اخوات ..
والسؤال عامل زى الجرس ..
كل شوية يرن ..
بس الخوف كان اكبر من الرغبة ..

بعد فترة ..
حصل حمل ..
ورجعت الفرحة تانى ..
اكيد ربنا باعته عشان بنتها ..
وهوب 7 شهور ونص .. وجات البنوته التانية
ورجعت تانى ..
اشعات وحضّانات وتحاليل ..

وفجأة عندها السكر
3 شهور ونص فى الحضانه

عارف يا امير
كان وشها منور وجميله
الدكاترة والممرضات كانوا مسميينها باربي

جالها ميكروب ..
وعمل مشاكل فى الكبد ..
وكانت اخر يوم يا حبيبتى .. بتجيب دم من بقها

كنت جايبالها جهاز سكر جديد
وجبتلها هدوم كتير ..

عشان قالولي يومين وتطلع
ومن يوم ماسافرت لاخواتها ..
بقالها سنه

وانا صورتها ماراحتش من بالي
حاسه انها عايشه لسه

اقولك ع حاجه مش عارفه هتفهمني ولا لا
بس احساس ان حته منك ..
اتدفنت تحت التراب ده احساس بيموتنى كل يوم ..

يعني ازاي التراب اترمي عليها
مش يمكن يدخل ف عنيها او حشرة تضايقها

دي اكتر بنت مش قادرة انساها
واكتر حد من ولادي وجعني
بحلم بيها ع طول

المشكلة ان اختها ..
مش قادرة تنساها ..
ودايما تبص للسما وتقول لي ..
اختي .. انا شايفاها ع شكل نجمه

لحد هنا ..
وقفت عاجز انى ارد عليها بأى كلمة ..
كل اللى كان على بالى ..
انتى ليه بحصل معاكى كدة ..
وإزاى قادرة تستحملى كل ده ..

قلت لها انتى اكيد ربنا شايل لك حاجات حلوة عنده ..

وبعد حوالى شهر ..
بالظبط يوم 15 نوفمبر 2015

وانا قاعد باتابع رسايل الصفحة ..
جاتلى رسالتين فى نفس الوقت ..
عشان ربنا يرد على اسئلة كتير مش فاهمها ..

لقيت رسالة من نفس الام ..

امير كنت عايزة اقولك على حاجه
انا حامل فى توأم
بس امبارح تعبت وروحت للدكتور ..
قال لي فيه بيبي اتوفي
والتاني نشكر الله كويس ..
وقال لي انه ولد ..
بس انا خايفه اوي

وبفكر انزله وكنت محتاجه رأيك

تنزلى مين مش فاهم

البيبي

معلش انهى بيبى .. اللى اتوفى؟
هو انتى حامل فى الشهر الكام

لا االلي موجود

انا حامل فى الخامس

مش الدكتور قالك انه كويس.. عايزة تنزليه ليه؟

مالمرة اللي فاتت قال لي كويس برضوا
انا مش هقدر استحمل اللي حصل ده يحصل تاني ..
وفى نفس الوقت خايفة ربنا يزعل مني لو نزلته

سيبى ربنا يعمل اللى هو عايزه ..
ماتتدخليش فى قراراته واقبليها بشكر
دا الخير اللى بجد ..
اشكريه انه اداكى اتنين .. واخد واحد ..
يبقى اكيد التانى كان هيسبب مشاكل ..
ربنا شايف اللى احنا مش شايفينه
سيبه يعمل .. وانتى راقبى من بعيد
واكيد هتفهمى ..

دخلت اقرا الرسالة التانية ..
من حد ماعرفهوش شخصياً ..

واحدة بتقول لى ..
النهاردة عيد ميلاد وﻻدى 3 اوﻻد تؤام ..
جبتهم بعد انتظار خمس سنين ..
وﻷن عندى مشكلة تمنع الحمل ..
وﻻنى وسط عشر حاﻻت ..
عملنا حقن مجهرى في يوم واحد ..
وانا الوحيدة اللي ربنا اراد انى اجيب ..
اوﻻد فاقدر اقول وبكل ثقة انها معجزة بمعنى الكلمة
مش هاقول انهم جم نوروا حياتى ..
وﻻ انى بقيت اسعد حد لان ده طبيعى ..
لكن هاقول ان وجودهم ..
هو سبب وجودى وان حياتى اصبح ليها معنى

بس الموضوع مش بالسهولة دى ..
اصعب قرار مر عليا في حياتى ..
يوم ماعرفت انى حامل فى 3
يومها الدكتور قال لي ..
الحمل مش هيكمل .. خطر عليكى وعليهم ..
ﻻزم نسحب منهم ..
قولتله اوكى نسحب واحد ونسيب اتنين ..
قال لي للاسف حالتك نادرة ..
في اتنين في كيس واحد ..
لو فضلوا هيموتوا بعض ﻻزم نسحبهم ونسيب واحد ..
وبرضه ممكن مايكملش ..
وكان ﻻزم ارد عليه تانى يوم الصبح إما اسيب التلاتة ..
او اسحب اتنين ..
وكان اصعب قرار ..
بس الكلمة الاخيرة ..
قالها اللى بإيده الامر ..
كن فيكون ..
وانهاردة عيد ميلادهم الرابع ..

مش صدفة ابداً ..
انى اقرا الرسالتين فى نفس الدقيقة
حسيت ربنا بيقول لى ..
انت موصّلاتى ..
وصل الرسالة دى ..
للى مش عارفة تعمل ايه فى البيبى اللى فى بطنها ..

استأذنت صاحبة الرسالة ..
ووافقت ..

ممكن ابعت لك رسالة لسة جاية لى ..
وبعتها فعلا للأم اللى ولادها بيموتوا ..

وده كان ردّها ..

الف شكر ..
حطيت جوايا أمل ..
وخليت بكرة احلى

قفلت معاهم الاتنين ..
وانا على وشى ابتسامة ..

هو انت ازاى يارب كدة ..
ازاى بتاخد بالك من كل واحد ..
وكأنك ماخلقتش غيره ..

صحيح ..
اللى يصبر لنهاية الحكاية ..
هيستغرب ازاى فى نصها زعل ..
ولا اتضايق ..
ولا فهم ان ربنا سايبه ..

اوعى تقول إزاى وليه ..
دا ربنا ياعم ..
وهو عارف هو بيعمل ايه ..

والكلام ده حقيقى جدااا ...

أمير تادرس

[Rena Jesus]

ميرسى ربنا يبارك تعب محبتك

[Mary Naeem]

مشاركة جميلة جدا

ربنا يبارك حياتك

[walaa farouk]

رينا
مارى
ميرسي كتير على مروركم الغالى

[MenA M.G]

دائماً مُشاركاتَكْ رائْعة
موضوعك مُمَيز
ربنا يبارك خدمتك