طفلي و.. الأفلام الكرتون والتلفزيون

[Rena Jesus]

"طفلي و.. الأفلام الكرتون والتلفزيون!"
-----------------------------------




في دراسات كتير في الموضوع ده، دراسات عن التلفزيون من ناحية، ودراسات عن الكرتون لوحده من ناحية تانية..
نلخص الدراسات دي في:

- مفيش حاجة اسمها تلفزيون يتفتح على اللاشيء والطفل يتساب قدامه،
ده خطأ فظيع بيجر وراه كذا خطأ تاني وبيطلع الطفل سيء التربية تمامًا.. التلفزيون طول ما هو مُقنن عظيم وجميل ومفيد ووسيلة تربية رائعة. يتساب بدون كنترول، هيخلقلك (لعنة) ف البيت..

الكرتون خصيصا ال بنجيبه ونسيب الطفل قدامه فاكرين إننا كنا عاملناه احسن معامله.. "ده كارتون.. هيعمله ايه يعني؟!"
أحب أقولك الكارتون هو المصيبة الكبرى :السم في العسل، حصان طراودة..
كرتون زي توم وجيري،
كل ثانيتين بيحملوا مشهد عنف : قتل، ضرب، كسر رأس، فقع عين، شج رأس، تهشيم أسنان، كسر عظام، حرق، سرقة، كذب. الدراسة بتقول إن 95% من محتوى الحلقة الكرتونية "عنف". يعني حلقة توم وجري عنف وشوية حاجات صغيرين فوق بعض




ابني هيشوف شاكوش فين وهو صغير؟! مش هيشوف، مش هيجي قدامه وهو ف البيت..
هيشوف الشاكوش ف الكرتون، وتوم ماسك المطرقة وبيجري بيها ورا جيري، لأول مرة ف حياته هيشوفها وهيتعرف عليها، وظيفتها ان توم القط يجري بيها ورا جيري ويرفعها وبووووم على دماغ جيري الفار، وجيري يهرب، فتيجي على الأرض، ثم توم يرفع تاني ويجري تالت ويضرب جيري على رأسه بالمطرقة عاشر.. واول المطرقة ما تروح ف ايد جيري ، هيرفعها وينزل بيها على صباع توم يخليه يصوت وينط وعاااااااااااااااااااااااااا..

الطفل بيتبسط من ال too much emotions ال هيشوفها،
هيجيله شعور ايجابي هيرتبط بالضرب بالشاكوش، الدراسة بتقول إن الطفل معندوش نقطة، إن ده لهو وخيال، وان في واقع، ده مش موجود. لسه موصلش للمرحلة دي

ابني أول مرة هيشوف فيها الشاكوش أو أي حاجة شبيهة ليه، برة نطاق التلفزيون في الحقيقة، سواء لعبة بلاستيك على شكل مطرقة جايبها وسط مجموعة ادوات لعمل أي حاجة، أو شاكوش حقيقي أنا بتستخدمه قدامه فمرة بصلح حاجة، كل الصورة المتكونة فدماغة عن الأداة دي هتكون إنه عايز يضربك بيها على دماغك، او على صباع رجلك..
ونرجع نتساءل: ابني عنيف ليه انا مش فاهم!

كمان.. توم لما بيعدي من قدام بيت الكلب والكلب يطارده عشان بيعمل دوشة، (مع ان المفروض ان الدوشة وحشة) بس توم اول ما بيتمكن من الكلب بيضربه بماسورة على بقه فيكسرله صفين سنانة في مشهد واضح الصوت والصورة وتكسير السنان.
أي حاجة مدورة شبه الماسورة ابني هيشوفها، مش عايز اول حاجة تيجي فباله ان وظيفتها تكسير سنان اللى قدامه




الفار الحرامي، اللى بيفتح التلاجة ويسرق منها الحاجات وهو مبسوط وسعيد ، لما توم بيجري وراه بالجاروف عشان يدعسه ف مشاهد كلها نط وصريخ واحتقان والوان كتيرة وموسيقى عظيمة، اول ما الفار بيطلع على السفرة، القط بيمسك السكينة اللى على السفره وبينزل بيها على الفار طااااخ طاااااخ طااااااخ في محاولات مستمرة لتقطيع جيري بالنص بالسكينة، بس كل مرة بتفلت تنزل ع السفرة تكسر حاجة. لغاية ما القط بيقطع ديله هو نفسه بالسكينة عن طريق الخطأ..
سكاكين الأكل عندنا ع السفرة كتير، والسكينة ف ايد الأم دايما وهي ف المطبخ والطفل هنا او هناك او متشال شايف، السكينة للأكل، مش وظيفتها طااااخ طااااخ على دماغ ال بيجري لغاية ما أقطعة شرايح!




- كل الصور اللى اتكونت عن وحدات الحياة حوالية، اللى شافها ع الطبيعة واللى لسه مشافهاش، ليهم استخدام وحيد بس قدام عينه علطول بيشوفه مرارا وتكرار ف الكرتون.. الضرب والقتل والتقطيع والتهشيم والعنف ضد الآخر
سبب أساسي في إن كل لعب الأطفال الذكور في مراحل التلت سنين والاربعة الخ، مسدسات ورشاشات وعساكر وأدوات حربية وطاخ دش بوم،

ومينفعش نقول دي الفطرة لان الذكر بتعلمه العنف بيسعى لتعلم المهارات الأولى ال تخص كونه ذكر ف علم النفس التطوري والخ..
الفطرة هي إني اعلمه العطاء، يدي سندوتشه لغيره لما يلاقيه جعان ومش معاه، المسامحة، يسامح عن رِضى أخوه ال ضربه.. التفاهم، يعبر عن ال عايزه وميبقاش طفل أهبل..

وفي وسائل البقاء، معلموش المسدس والشاكوش طاخ طاخ.. أعلمه المدافعة عن حقة ورأيه، لو عايز حاجة يتناقش، ياخد ويدي بدل المرة عشرة، ويبقى ليه خطوات يقدر ياخدها في حال رفض ال قدامه طلبه ده، خطوات يعبر بيها عن رفضة واستياءه بدون أذى وإزعاج، تعلمه ميطلعش خانع ويائس ومحطم.. ميبقاش أليف. لازم يعافر.. ده تعليم البقاء كغريزة، مش الرشاش والطلق الخرز.

- هل في بدائل عن الكرتون؟ هنوريله ايه لو مش هيشوف توم وجري وبطوط وهو بيتقل السناجب ويعجنهم ويفرمهم ويولع الشجرة بيهم؟
طب قولي.. أنا ليه أفرج ابني على جيري وهو طالع بيتسحب على وش توم وهو نايم ويقوم رافع جفنة، وهوووووووووب بالشلوت ف نيني عينه، ما أفرجه على صابرين وهي بتسال الكتكوت الصغير: "واما اديك الحاجة الحلوة؟ أديها لصحابي الفقرا، صقفوله صقفوله غنو لشاطر وقولوله".. مالها أنا أبريق الشاي، بوزي كده، أصب الشاي وأرجع كده.

أي تلفزيون دلوقتي فيه usb وأي فلاشة ب 10 جنيه، وداون لوود قوائم كاملة من اليوتيوب فيها ناس مجهزالك الأغاني الحلوة دي مع بعضها، والكرتون غير العنيف كذلك..

وتذكر.. توم وجيري كرتون للكبار وغير مخصص للأطفال..
الكرتون العنيف خليه أما يكبر شويتين ويدرك الفرق بين الواقع والخيال، خلونا ف البدايات (تحت سنتين) نعمل داون لود لل يعجبنا ونزل ع الفلاشة وشغل ف التلفزيون وكله يشتغل ورا بعضه تلقائي، وقعد الطفل في الساعات المخصصة ليه قدام التلفزيون يشوف الحاجات ال انت مخترهاله نقاوه.. بقلظ وماما نجوى، اشارة المرور بتقولنا انتباه، جوايز للشطار. البنات البنات ألطف الكائنات

- المواكبة بقى وعشان ابنك ميبقاش عايش سنة 1980 عندك قنوات (علمية) مخصصة للطفل على الدش، القنوات دي مبتهزرش.. اللى معاه يشترك فيها لولاده .. واللى مش معاه، يحمل فيديوهاتها من اليوتيوب، وع الفلاشة والتلفزيون يشغل ورا بعضه برضوا..
كل اللى بيتعرض ف القنوات التعليمية المخصصة للاطفال، بينزل ع اليوتيوب كامل.. شوية مجهود بسيط ف الداون لود وهتربي صح..
ولو قابلت كرتون حديث مفيهوش قتل وكذب وسرقة وضرب وحرق وقطع أطراف، هاته من النت، وضيفه لقائمة مختاراتك لابنك..

[Mary Naeem]

مشاركة جميلة جدا

ربنا يبارك حياتك

[Rena Jesus]

ميرسى لمرورك الغالى

[walaa farouk]

ميرسي على مشاركتك الجميلة رينا

[MenA M.G]

دائماً مُشاركاتَكْ رائْعة
موضوعك مُمَيز
ربنا يبارك خدمتك

[Rena Jesus]

ميرسى لمروركم الغالى