اتصال كاد ينقذ مركب رشيد من الغرق.. (روايات لم تنشر من قبل عن الكارثة)
مأساة يعيشها أهالي قرية الجزيرة الخضراء التابعة لمركز مطوبس بمحافظة كفر الشيخ، عقب مصرع 10 من أبناءها غرقًا على متن مركب الموت الأربعاء الماضى، ورغم المأساة التى يعيشها الأهالي والحزن الذى يخيم عليهم، إلا أن اللواء السيد نصر، محافظ كفر الشيخ، لم يزر القرية حتى الآن أو يقدم التعازى لأهلها.
وقال ناصر حصان -أحد مواطنى قرية الجزيرة الخضراء التابعة لمركز مطوبس بمحافظة كفر الشيخ-، وأول من علم بغرق مركب الموت التى راح ضحيته أكثر من 170 شخصا حتى الآن، إن شقيق زوجته "نسيبه" اتصل به يوم الحادث الساعة 4 ونصف فجرًا وأكد له أنهم يتعرضون للغرق.
وأضاف حصان فى تصريح خاص لبوابة "الفجر": نسيبى كان على متن المركب وكلمنى وقالى إلحقنا احنا بنغرق فطلعت أنا وناس -بعض الأهالى اللى أولادهم على المركب من ضمنهم فايز حسان اللى ابنه كريم مات ومحمد رضا عبد الد ايم وكمال حسان-، وأرسلت مجموعة لقوات حرس الحدود بقرية مسطروه الواقعة على الطريق الدولى الساحلى مابين بلطيم ومطوبس، وذهبت أنا إلى قوات حرس الحدود الموجودة بقرية الجزيرة الخضراء.
"بداية التحرك وإبلاغ قوات حرس الحدود"
وأوضح: "بدأت اخبط على بابا قوات حرس الحدود بالجزيرة الخضراء لقيت العساكر طلعت أبلغتهم إن فى مركب على متنه 600 شخص بتغرق ولازم تنقذوهم مش هيخدوا ربع ساعة إنقاذ فى وش البوغاز ولا حياة لمن تنادى"، طلعلى ضابط اسمه محمد حكيتله على القصة وقولتله الناس بتموت، سألنى آخر مرة اتصلوا بيك امته قولتله من ربع ساعة، قالى أنت عاوز إيه وأنا اعمله قولتله تكلم أبو قير يبعتلنا اللنش الحربى يطلع الناس، وعندما حاولت أنا والضابط الاتصال "بنسيبى" وبعد المتواجدين على المركب للأسف لم نتمكن ودا دليل على إنهم بيغرقوا وفقدوا هواتفهم.
وتابع: "كان فى بعض الصيادين من برج رشيد معاهم مراكب صغيرة وطلبت منهم الخروج معايا لإنقاذ الناس لكن رفضوا فانا فقدت الأمل فى 600 بنى ادم بينهم أطفال ونساء وشباب وأسر كاملة من بينهم اكتر من 15 شخصا من قريتى، وربنا كرمنا ولقينا محمد عبده الحصرى معاه مركب من الجزيرة الخضراء وجاى بدرى على غير العادة فطلبت من الضابط انه يسمحله بالخروج معانا قالى ماشى أنا هعتبره لسة مجاش ومسجلش دخول وبعته معانا.
"الأهالي ينقذون 150شخصا"
وأضاف حصان: "اخدنا المركب وروحنا على مسطروه وقعدنا ندور كتير ملقناش حاجة رجعت أنا 20 كيلو مشى على رجلى لحد قوة الرادار علشان ابلغهم إن المركب اختفت ملهاش اثر، والقوات دورت بالرادار وقالوا احنا مش لاقين المركب ومركب الحصرى راجع من البحر كلمنى وقالى فى جثث تعالى فروحت وقعدنا نطلع فى الجثث وننقذ الناس احنا وبعض مراكب الاهالى اللى انضمت لينا لما الخبر انتشر، وأنقذنا 154شخصا أحياء وطلعنا بعض الجثث من البحر على مراكبنا الخاصة.
واستكمل: جرينا على الشواطئ لقوات حرس الحدود ومحدش عبرنا، ومحافظ كفر الشيخ من يوم الحادث مشوفنهوش وبلدنا اتوفى منها 10 أشخاص، وكلنا حزن وهو معبرش حد، والنواب جايين إمبارح يتصوروا ويخدوا اللقطة رغم اننا مشوفناش حد منهم، مختتما: لسة لينا جثث فى البحر ومحدش عارف حاجة ومفيش مسؤول سأل علينا.
هذا الخبر منقول من : جريده الفجر
