أزمة ارتباط.. الحلقة الثالثة - (الفرصة)

[Rena Jesus]

أزمة ارتباط.. الحلقة الثالثة - العنصر الاخطر

اتكلمنا الحلقة الاولى من ازمة ارتباط عن ( الجدية ) كأهم عنصر فى بداية التعارف و اللى من غيرة كل التعارف هيقف ..
و فى الحلقة التانية اتكلمنا عن النضوج و ازاى ان من غير النضوج فا الطرف الاخر مش هيحس بملئ و شبع فى شخصية الطرف التانى انه هيكون جدير بالطرف التانى او يقدر يكون قادر يشبع الاحتياجات النفسية و العقلية و العاطفية للطرف التانى
العنصر التالت اللى معانا دلوقتى هو ( الفرصة )

عارفين الكارثة الكبري هنا فى العنصر التالت و الخطير هي الفرصة
الفرصة اللى ناس كتير ضيعتها.. او بتضيعها
طيب هديكم مثال:
طلعتى مؤتمر مثلا او انشاله حتى جالك عريس صالونات اى كان
و لقيتى عنصر الجدية و الشخص باين علية انه جد .. و كمان لقيتى و لمحتى فى كلامة انه ناضج.. طبعا الكلام هنا للولد او البنت و غيروا صيغة الكلام للمذكر و المؤنث.
لقيناه جاد و ناضج... ها خلص الموضوع كده؟؟ لااااا
لازم نديلو فرصة بقى . مش نقفلها فى وشة يا بنات ..سامعينى.. نديلة فرصة
و انت كمان لقيت البنت مهتمة بيك وفى نفس الوقت انت ميال ليها وعاجباك ... اديها فرصة بقي .. .متسدش فى وشها السكك وانتى متقفليش فى وشة السكة وتعملى حركات المصريين البشعة و المريعة و المرعبة..

عارفين ايه هى الحركات دى؟؟
اولا : الدلال ... ايوه الدلال .. قال يعنى لما تتدللى عليه هيتمسك بيكى اكتر .. كل الناس بتفهم الدلال كده ممكن يحسك مغرورة او دلوعة و مايصة و هو جاد و ناضج وعايزك تخاطبى عقلة على مستوى العقل ..
( يعنى نأجل موضوع الدلع دلوقتى هنتكلم فيه بعدين)

ثانيا : التقل ... اهالينا زمان قالولنا ان التقل صنعة.!!هههههههههههه الكلمة دى خربت بيت نص بنات مصر مثلا... تقل ايه؟؟ يعنى واحد يقدم السبت و الحد وانتى مش معبراه؟؟!!
يا سلاااام طيب اسئلوا كده البنات اللى تقلت و ساقت فى التقل لحد ما الولد اتقفل منها و طار ؟؟ و يقولك كلام يا اخى يحرق الدم زى مثلا : اتقلى على الرز!!
ههههههه رز ايه اللى اتقل عليه!!! بطلوا تسمعوا الكلام ده انسووووه

لقيتى الولد جاد و ناضج و عايز يفتح سكك كلام و مواضيع .. فا اهلا بيه طالما جاد و ناضج ... الجاد والناضج ده مش داخل يتسلى ..اصلا معندهوش وقت لده
البنات و الولاد اللى سدوا السكك فى وش بعض مفهمتش يعنى !! عايزين ترتبطوا ازاى و انتوا مش عايزين تدوا فرصة للطرف التانى يتعرف عليكى او عليك!!!

عارفين الكارثة السودا اللى بعض البنات بتعملها هى الصد .. الصد هو عكس اعطاء الفرصة .. يعنى تلاقى نفسك فى مؤتمر او رحلة و ولد محترم او باين علية كويس و بيقولك هاى ازيك انا هانى مثلا.. عارفين فى مرة واحد محترم اوى فى مؤتمر وراح قال لبنت هاى انا فلان ازيك قالتلة : اعملك ايه انا يعنى!! وسابتة و مشيت!!!!

عايزين والولاد تاخد المبادرة فى التعارف عليكى ازااااى و انتى بتصدى؟؟! صدقونى اللى اتصد مرة ما هيكررها تانى فا هيبعتلك حد وسيط .. بنت صاحبتك مثلا او انشالة خادمة معاكى فى الكنيسة ... وقتها بقى هتقولى : نوووو لا لا تؤتؤ مبحبش الطريقة دى ؟؟ طيب الراجل يعمل ايه يعنى ما هو بيتصد و اتصد من اللى قبلك !!

الخلاصة
الفرصة مهمة اوى علشان الطرف التانى يقدر يوصلك ويعبر عن نفسة ليكى .. متقفليش الباب فى وش حد .. طيب نقفل الباب امتى؟؟ لما يكون الشخص جاد و ناضج و اخد الفرصة و لقيتى انكم مش مناسبين لبعض .. وقتها بس ممكن تقفلى الموضوع بشياكة.

يا رب نعقل و ندى فرصة للناس انها تقرب مننا بحدود علشان يكتشفونا و نكتشفهم اكتر عن قرب



لو حابب تقرأ الحلقه اللى بعد كده من هنا

ازمة إرتباط - الحلقة الرابعة (الوضوح)

cpd

[Mary Naeem]

مشاركة جميلة جدا

ربنا يبارك حياتك

[marit jesus]

ربنا يبارك خدمتك الجميلة والمثمرة

[Rena Jesus]

ميرسى لمروركم الغالى

[MenA M.G]

دائماً مُشاركاتَكْ رائْعة
موضوعك مُمَيز
ربنا يبارك خدمتك

[walaa farouk]

ميرسي على مشاركتك الجميلة

[Rena Jesus]

ميرسى لمروركم الغالى