أزمة إرتباط - الحلقة الخامسة (الهدوء)

[Rena Jesus]

أزمة إرتباط - الحلقة الخامسة- عنصر الخطورة!!

إتكلمنا فى الاربعة حلقات اللى فاتت فى ازمة ارتباط و العناصر اللى لازم تكون موجودة فى بداية العلاقة و هم بالترتيب : الجدية - النضوج - الفرصة - الوضوح
العنصر الخامس هنسمية ( الهدوء)!!!
ايه العنصر الغريب ده؟؟!!! يعنى ايه هدوء؟؟ طيب و هدوء لية؟؟

هقولك ... بص يا سيدي .. بصى يا ستى
اغلب الناس بعد ال 4 عناصر الاوليين دول ولما الناس بترتاح لبعض او بتلاقى الصفات اللى لقيتها فى الطرف التانى كويسة و مناسبة فا بتتسرع كما لو ان لاعب كره قدم انفرد بالجون و خلاص لازم يشوط

الهدوء هنا مش معناة انك اول ما تلاقى الصفات و الشخصية كويسين فا تقول زى صاحبنا نيوتين ( وجدتها وجدتها ) و انتى يا بنت انتى.. بلاش ال (هيييييييييييييح) دى دلوقتى ... مش وقتها.. استهدى بالله كدة لسة المشوار طويل شوية

الهدوء هنا معناها انى متسرعش ... اهدي بمشاعري .. واشغل مخي و اشوف الطرف التانى و اتكلم معاه اكتر.. .بالبلدى زى ما التجار بتقول (اشتري .. متبيعش)

جمع داتا.. جمع افكار... جمع انطباعات
علشان اوقات الانطباعات الاولى بتكون خادعة .. وفى المرحلة دي متديش قرار... نهااااائي .. متقرريش حاجة .. متقرر حاجة .. اهدي خالص وكمل تعارف بدون كلام عاطفى او مشاعر..

طيب لية اهدي؟
علشان الافكار دي لسة هنربطها بحاجة تانية مهمة اوى.. هى كلمة ربنا و الصلاة
ايووووه زى ما سمعت كدة
انت هتروح محضر ربنا
ما انت لازم تتكلم مع الطرف التانى و تتعرف علية وكل الكلام ده و بعدين تاخد كل الموقف و تروح بيها عند ربنا و تصلى و تقوله يا رب الموقف اهو .. بحطة قدامك... ساعدنى ارشدني .. افتح عينى اشوف مشيئتك..

طيب سؤال هنا
ناس كتير بتقولى : انت عايزنى اتكلم واتعرف و ناخد و ندي فى الكلام و بعدين اروح لربنا فى الاخر خالص؟؟ هو ده ينفع برضو ان ربنا يكون اخر حاجة؟؟
ههههههههه طيب معلش تعال او تعالى اقولك ايه الفكرة..
هو انت تعرف الشخص ده؟؟ لا.. طيب تعرفى اى حاجة عنه او عنها؟؟ لا
طيب عندك اى خلفية عنة؟؟ لا... طيب هتروح او تروحى لربنا تصلى بأية؟؟
طيب انتى او انت واخد بالك من الاية اللى بتقول ( اسئلوا تعطوا اطلبوا تجدوا اقرعوا يفتح لكم؟؟) هى الاية دى فيها 3 مستويات فى الصلاة ..
السؤال.. الطلب.. القرع او و الالحاح

هتصلى ازاى لربنا بدون تفاصيل؟؟ ما انت عندك امكانية الحصول على التفاصيل .. خد التفاصيل و روح بيها لربنا
صحيح فيه مواضيع تانية فى الحياة ملهاش تفاصيل فا بتروح بيها لربنا و هى غامضة كدة ملهاش تفسير و زى ما حصل لدانيال لما مكانش عارف تفسير رؤية الملك فصلى لربنا.. فا الكتاب بيقول الاية دى : حينئذ لدانيال كشف السر في رؤيا الليل.فبارك دانيال إله السموات.
يعنى الحاجات الغامضة نروح بيها لربنا و هو يكشف .. انما الحاجات التانية اللى انا اقدر اخد بيها تفاصيل .. اخد التفاصيل و اروح بيها لربنا وكمان ده هيكون عندى انطباع ارتياح او قبول او لا.. وممكن الموضوع نفسة ميكونش مقبول خالص فا ارفضة من بره بره

الخلاصة
لما نتعرف على حد و نعدى بال 4 مراحل الاولي
(الجدية - النضوج - الفرصة - الوضوح)
يبقى نهدي و منتسرعش علشان منتعلقش على الفاضي و الازمة تزيد .. اصبر و انتظر .. ليتشدد و ليتشجع قلبك و انتظر الرب

لو حابب تقرأ الحلقه اللى بعد كده من هنا


أزمة إرتباط - الحلقة السادسه (التحدى)


cpd

[Mary Naeem]

مشاركة جميلة جدا

ربنا يبارك حياتك

[marit jesus]

ربنا يبارك خدمتك الجميلة والمثمرة

[Rena Jesus]

ميرسى لمروركم الغالى

[MenA M.G]

دائماً مُشاركاتَكْ رائْعة
موضوعك مُمَيز
ربنا يبارك خدمتك

[walaa farouk]

ميرسي على مشاركتك الجميلة رينا

[Rena Jesus]

ميرسى لمروركم الغالى