خليك نسر.........

Rena Jesus · رقم المشاركة : ( 1 ) 12 - 09 - 2016, 12:24 PM

لما سمح بوجوده فى الدنيا ..
ماكانش بيعمل حاجة بمحض الصدفة ..
ولا اى حاجة من خليقته ..
اتخلقت صدفة ..

سنين كتير وهو عايش وسط ناس كتير بتراقبه ..
اللى يتكلم عن قوته ..
واللى يتكلم عن نظرته لقدام ..
اللى يتكلم عن اسلوب تربيته لولاده ..
واللى يتكلم عن جبروته بين اللى زيه ..

لحد ما جه واحد ..
فضل يراقبه فى حاجة تانى خالص ..
كان بيراقبه فى ضعفه ..
وايه اللى هيعمله .. لما يعجز ..
ومايبقاش قادر انه يعيش بنفس الطريقة ..
لدرجة انه مايبقاش حتى قادر يأكل نفسه ..

كان فاكره .. هييأس ..
ويقف مكانه .. يستنى موته ..
كان عارف انه لما يوصل سن العجز ..
لازم هيوصل لمرحلة اليأس من حياته ..

بس كانت المفاجأة ..
انه اختفى .. ايوة اختفى ..
راح فين .. مات؟ .. طب فين جثته؟ ..
اكيد ماماتش ..
راحت فين القوة والجبروت ..
فضل يدور عليه فى كل حتة ..
لغاية ما قالوله .. شفناه فى الغابة ..

راح وراه ع الغابة ..
فضلوا بنقلوه من مكان لمكان ..
وهو مصمم يعرف ايه اللى حصل ..
راح فين .. واختفى ليه طالما لسة عايش ..
اخر واحد قال له ..
انا شوفته فوق الجبل ..
طلع وراه لغاية ما لقاه ..
قعد بعيد عنه عشان يراقبه ..

وكانت المفاجأة التانية ..
شافه بيبهدل فى نفسه خالص ..
ايه ده ؟؟
هو بيموت نفسه بنفسه ولا ايه ..
ويوم يعدى ورا يوم تانى ..
ينزل يجيب اكل .. ويطلع يكمل مراقبه ..
وهو بيكتب كل اللى بيحصل ..
وشهر يسلم يشهر ..
وهو بيراقب وبيكتب ..

بس الغريب .. انه رغم بهدلته فى نفسه ..
لسة عايش ..
وكأنه بيقاوم حاجة .. مش شايفها ..
بس بيقاوم وخلاص ..

وعلى الشهر الرابع ..
لقى حاجة غريبة ..
دا شكله ابتدا يحلو ..
وفى ليلة فى الشهر الخامس ..
نام من التعب ..
وصحى فى الفجر على صوته ..
قام ودعك عينيه ولبس نضارته ..

وكانت المفاجأة ..
لقاه قدامه واقف بطل زى المارد ..
بص له نظرة كلها قوة واصرار ..
وكانت اول مرة عينيهم تيجى فى عينين بعض ..
وماعملش اى حاجة ..

غير انه ساب الجبل .. ونزل فى ثوانى ..
وسابه هو ماسك قلمه وعمال يكتب ..
نهاية الـ 5 شهور ..
لأ .. دى بداية الـ 30 سنة ..

وابتدا يقرا اللى كتبه ..
اول ما وصل سنه 40 سنة ..
لقى نفسه ضعيف ..
ولا ضوافر بتمسك ..
ولا منقار بيقطع ..
ولا ريش جناحات قادر يشيله ..

وكان القرار ..
انه يطلع لوحده للعش بتاعه فوق الجبل ..
ويقلع ضوافره من اللحم .. عشان يستنى الجديد ..
ويكسر منقاره اللى بقى متنى وطرى ..
ويقعد يستنى منقاره الجديد ..
اللى اول ما بيطلع ..
بينتف بيه ريشه التقيل اللى مقيده .. بينتفه بنفسه ..
ويستنى الريش الجديد الخفيف ..
وأول ما يطلع ..
يفرد جناحاته تانى .. ويطير ..

ينزل يقول للعالم .. انا جددت شبابى ..
انا ربنا خلقنى ..
وخلق فيا ارادة وقوة ..
وبمشيئته .. ممكن ازود فى عمرى اكتر من 30 سنة كمان ..

بس لو اخدت قرار .. التجديد .. ولاولادة من جديد ..
الكلام اللى فوق ده ..
عن المخلوق الوحيد ..
اللى اتمنبت اخد شرف انى اتصور معاه ..
النسر ..
النسر اللى علمنى .. اقف قدام شيبتى ..
النسر اللى علمنى .. انتف ريش الذكريات التقيلة ..
النسر اللى علمنى .. اقلع ضوافرى واستنى ضوافر جديدة
امسك بيها بقوة .. اى حد يحاول يؤذينى
النسر اللى علمنى .. احارب الحياة .. عشان افوز بالحياة ..
النسر اللى علمنى اضحك .. مهما كان اللى جوايا ..
ربنا ماخلقش حاجة صدفة ..
دور ورا خليقته ..
ولو لقيت نفسك كبرت والعجز بيقرب منك ..
واليأس بيحاول يملكك ..
والمشاكل عايزة تصطادك ..
ماتعملش غير حاجة واحدة ..
خليك نسر ..
انا عن نفسى باعمل كدة ..
والكلام ده حقيقى جدااا ...
أمير تادرس