رغبة شديدة في البعد عن كل الناس

Rena Jesus · رقم المشاركة : ( 1 ) 11 - 09 - 2016, 09:34 AM

الـ Mauerbauertraurigkeit
مصطلح غريب شوية بيوصف حالة إنسانية بيمر بيها بعض البشر
و هي ان تتملكهم رغبة شديدة في البعد عن كل الناس حتي الاصدقاء المقربين ..
و اللي بيشرحها الـ Dictionary of Obscure Sorrows
و يقول the inexplicable urge to push people away ...
فهي الرغبة الغير مفهومة في دفع الاخرين بعيدا ..

.. ساعتها الوحدة مش بتبقي مجرد حالة بيعشها الإنسان
إنما هي ملجأ بيحتمي بيه ...
فزحمة العالم كفيلة إنها تدي قيمة و وزن لأكتر سلعة كلنا بنخاف منها و هي الوحدة !!

و يبقي زي ما المقولة المشهورة
بتقول
The one who once tastes how comfortable being alone is .. would never return to people ..
فاللي داق مدي راحة الوحدة صعب يرجع تاني للناس .. و مع كدة برضة الإنسان مش بيرتاح في وحدته .. !

فمن اعظم الصراعات اللي بيمر بيها الإنسان طول فترة حياته
هي الوصول لنسبة التوازن الصح بين وحدته و حياته في العالم ,
الوصول لنسبة الألم القابل للمعايشة !! ....

فالوحدة مش وحشة و مش حلوة , و لا هي مرض و لا علاج ,
إنما ببساطة هي حالة نفسية مجردة بتكتسب حقيقتها و مدي عمقها من الظروف و الطبيعة اللي اتولدت منها ...

فمن الغباء التعامل مع الوحدة كوضع قائم بذاته من غير الإلتفات لدوافعه و أسبابه ..
او حتي وصم الشخص الراغب في الوحدة أنه شخص مريض
او حتي غير سوي ..
ففي النهاية الراحة عمرها ما كانت نابعة من الوحدة او حتي اللاوحدة ..
أو حتي بوجود الناس او غيابهم ..
إنما الراحة هي شعور وهمي مؤقت بيدعيه الإنسان لإقناع نفسه انه قدر يتنقل من حالة مؤلمة لحالة أقل ألما ....

مع إن في الحقيقة كل الطرق بتؤدي للألم ! ..
فالألم هو اللي كرهك في الوحدة و برضة الألم هو اللي خلاك ترجع لها ..
فالألم هو الثابت الوحيد في معادلة الحياة ..

كيرلس بهجت