مصيده فارس الاحلام

[Rena Jesus]

مصيده فارس الاحلام




قابلتي مره واحد ( نسميه مثلا مرعي ) ولقيتي نفسك مشدوده له بدون مبرر ،
حاجه جواكي اتحركت ولقيتي نفسك بتقولي ايوه هو ده ؟
او العكس بالنسبه للولد

جالك مره عريس ( نسميه مثلا كعور ) ولقيتي نفسك من اول قاعده بتقولي لااا مش هو ده خاااالص ؟
طب ايه اللي حصل مع مرعي وايه اللي حصل مع كعور ؟

بصى ياستى وانت كمان ياسيدى

اللي حصل مع مرعي انه فارس احلامك، لكن كعور فارس احلام خالتك .

طب ازاي بيتشكل جواكي فارس الاحلام ؟

عن طريق 3 حاجات :

1- الخلفيه الذهنيه :

من زماااااااااان ايام الطفوله او المراهقه كنتي معجبه بواحد وليكن مدرس الفرنساوي باللدغه اللي في لسانه
(وارد تكوني فاكراه ووارد يكون مستخبي جوا عقلك الباطن ) حبيتي شكله او تصرفاته او نبره مميزه في صوته ،
اللي حصل مع مرعي واللي انتي مخدتيش بالك منه
انه فيه حاجه او حاجات من مدرس الفرنساوي ( شكل او تصرف ) ، فحبتيه فورا ،

لكن اللي حصل مع كعور انه مافيهوش اي حاجه منه ،
لكن وارد يكون فيه حاجه من مدرس العربي اللي ماكنتيش طايقاه وانتي صغيره

2- احتياج مرحلي :

هنا مافيش خلفيه ذهنيه ،
لكن فيه تصرف عمله مرعي ( باحتراف او بتلقائيه )
تصرف انتي بتحبيه ومحتاجاه الفتره دي من حياتك نتيجه احتياج خاص بتركيبتك
او نتيجه خروجك من ازمه نفسيه مثلا ،
يعني مثلا عجله التوكتوك بتاعك نامت فوقف بعربيته وساعدك (وبالذات لو عربيته بي ام ، او موبايله بخطين )

او مثلا شاف حد بيعاكسك فضربه ( ويكون هو اللي مسلطه اساسا)
او اتعرف عليكي وابتدي يتصل بيكي ويحاصرك علي مدار شهور ويمكن سنين
وانتي بغباوتك فاكره ان ده الاهتمام والحب وانه هايفضل كده بعد الجواز ،

فابتديني تحسي ان ده الشخص اللي انتي محتاجاه في حياتك ، لكن بعد الجواز هاتبقي مراته !!!!
يعني تقدري تسألي اي زوجه جوزها بيرد عليها ازاي لو قالتله فرده التوكتوك نامت ،
وكام مره بيهتم ويتصل بيها في اليوم علشان يتطمن عليها .

3- تاثير الغير :

صاحبتك او اختك او أمك طول النهار تكلمك عن صفات او شكل هي اللي معجبه بيه مش انتي ،
وليكن مثلا بتحكيلك يوميا عن مميزات الراجل القصير ، ازاي بيبقي مخلص ،
ازاي ممكن تخديه معاكي في الشنطه وانتي نازله ، ازاي بيوفر في الأكل والكهرباء،
ازاي مطيع ومستحيل يطولك لو قرر يلطشك بالقلم ،

من هنا بتتشكل جواكي صفات مش حقيقه لفارس احلام مش بتاعك اصلا ،
ولما تتجوزيه تكتشفي ان القصر مش ميزه ، بالعكس ده ممكن يكعبلك وانتي ماشيه .


ارجوكي افهمي :

فارس الاحلام مش لازم يشبه ذكري جواكي ، ولاشرط يعمل تصرفات تشدك ، ولا مهم انه يعجب امك او انتيمتك ،
فارس الاحلام مش هو اللي هايخطفك علي حصان ابيض ويحققلك المستحيل ،
فارس احلامك لازم يكون راجل بجد ، ناضج وعاقل وواعي ،
كل صفاته تطمنك علي بكره معاه ، مش شرط وسيم ولاغني ولا محترف ،
بس يكون طموح ومجتهد و طيب وبيتقي ربنا فيكي .


cpd

[MenA M.G]

موضوع مميز .. مشاركة رائعة
ربنا يبارك خدمتك

[Mary Naeem]

مشاركة جميلة جدا

ربنا يبارك حياتك

[walaa farouk]

ميرسي على مشاركتك الجميلة رينا

[ميرو]

ﺍﺭﺟﻮﻛﻲ ﺍﻓﻬﻤﻲ :
ﻓﺎﺭﺱ ﺍﻻﺣﻼﻡ ﻣﺶ ﻻﺯﻡ ﻳﺸﺒﻪ ﺫﻛﺮﻱ ﺟﻮﺍﻛﻲ ، ﻭﻻﺷﺮﻁ ﻳﻌﻤﻞ ﺗﺼﺮﻓﺎﺕ ﺗﺸﺪﻙ ، ﻭﻻ ﻣﻬﻢ ﺍﻧﻪ ﻳﻌﺠﺐ ﺍﻣﻚ ﺍﻭ ﺍﻧﺘﻴﻤﺘﻚ ،
ﻓﺎﺭﺱ ﺍﻻﺣﻼﻡ ﻣﺶ ﻫﻮ ﺍﻟﻠﻲ ﻫﺎﻳﺨﻄﻔﻚ ﻋﻠﻲ ﺣﺼﺎﻥ ﺍﺑﻴﺾ ﻭﻳﺤﻘﻘﻠﻚ ﺍﻟﻤﺴﺘﺤﻴﻞ ،
ﻓﺎﺭﺱ ﺍﺣﻼﻣﻚ ﻻﺯﻡ ﻳﻜﻮﻥ ﺭﺍﺟﻞ ﺑﺠﺪ ، ﻧﺎﺿﺞ ﻭﻋﺎﻗﻞ ﻭﻭﺍﻋﻲ ،
ﻛﻞ ﺻﻔﺎﺗﻪ ﺗﻄﻤﻨﻚ ﻠﻲ ﺑﻜﺮﻩ ﻣﻌﺎﻩ ، ﻣﺶ ﺷﺮﻁ ﻭﺳﻴﻢ ﻭﻻﻏﻨﻲ ﻭﻻ ﻣﺤﺘﺮﻑ ،
ﺑﺲ ﻳﻜﻮﻥ ﻃﻤﻮﺡ ﻣﺠﺘﻬﺪ ﻭ ﻃﻴﺐ ﻭﺑﻴﺘﻘﻲ ﺭﺑﻨﺎ ﻓﻴﻜﻲ .

[Rena Jesus]

ميرسى لمروركم الغالى

[Kerolos_Faik]

ربنا يبارك تعب محبتك

[Rena Jesus]

ميرسى لمرورك الغالى

[marit jesus]

ربنا يعوض تعب محبتك

[Rena Jesus]

ميرسى لمرورك الغالى