متصوتيش

[walaa farouk]

#متصوتيش
١) العيال بيوسخوا البيت عادى تقبلي الفكره سبيهم يلعبوا و نضفي بليل و#متصوتيش
٢) المواعين ممكن تستنى لكن ولادك هيكبروا و مش هيستنوكي اقضي معاهم وقت و#متصوتيش
٣) فكره ان الطفل التخين سليم و الرفيع عيان دي انتهت كفايه نفخ في العيال
٤) ابنك مش ابو تريكه انسوا الكره شويه و علموه رياضه مفيده " أحسن هييقى ألتراس في الاخر و هتلموه من الاقسام" ومتصوتيش
٥) عزيزي الاب مبروك عندك عيال يا ريت تتفضل معانا
٦) البنت زي الولد ماهيش كماله عدد نظريه اكوي قميص اخوكِ خلصت من الخمسينات "يعتمد على نفسه"
٧) ابنك بيرد عليك عشان اول حاجه اتعلمها تف على عمو يا حبيبي "بديهي" و#متصوتيش
٨) نظام التعليم فاشل فابنك لو الاول فهو اول الفاشلين بلاش جو المعتقلات في المذكره بالهداوه " وبرده #متصوتيش
٩) امك مش دكتوره "الا لو معاها كارنيه نقابه الاطباء"
١٠) ولادك احتمال يطلعوا لابوهم الي هو اختيارك اصلاً فبلاش نعايرهم كل شويه انهم زيه و#متصوتيش
١١) متضيعيش عمرك في خلطة الفراخ السريه الاطفال بتاكل اي حاجه لو كانوا سعداء و بيضحكوا وبرده #متصوتيش
١٢) المدرسين بياكلوا عيش كلامهم مش قرآن انت بس الي هتعرفي ابنك فاهم و لا وبرده متصوتيييييش
١٣) في اماكن تانيه على الارض غير بيت امك و حماتك يا ريت العيال تشوفها
١٤) المشاعر اهم من الطبيخ و الشغل واللبس
١٥) صحيان الصبح متعب لكل انت كمان بتكوني تعبانه فبلاش صويت في العيال هما مش سمعينك اصلاً وبرده متصوتيييييييييببيبش
١٦) ولادك بيتكلموا و نوعهم انسان يعني عنده مخ و يقدر ياخد قرار اديله فرصته و#متصوتيش
١٧) الحواديت حاجه مفيده مش هيافه
١٨) ابنك هيفضل رجل لو اتعلم موسيقى "عادي"
١٩) الوجبات السريعه مضره و تؤدي الى الامراض "مش شياكه اطلاقاً"
٢٠) المفروض الاستحمام للاسترخاء انما دعك المواعين دا افترى
٢١) صوتك العالي دليل على ضعف موقفك وبجد متصوتيش
٢٢) الرسم مش تضيع وقت دا ابداع و الحيطه بتتغسل عادي جداً
٢٣) الهدوم قابله للغسل و اخترعوها عشان تتوسخ متصوتيش
٢٤ ) الهدوم للراحه مش للمنظره
٢٥) ابنك عنده وجهه نظر يا ريت نسأله عن رأيه واصبرى متصوتيش
٢٦) بلطجه ابنك مش مصدر للفخر اطلاقاً دي مصيبه
٢٧) ابنك مش زي ابن اختك و مش هيكون زيه
٢٨) ولادك ممكن يصاحبوا ناس غير ولاد اصحابك عادي و يعيشوا
٢٩) اصحاب ولادك مش سبب مشاكلك ،الانحراف استعداد، عالجي ابنك بدل ما نعلق فشالنا على الناس
٣٠) التربيه حوار و الحوار هو انك تتكلم و تسمع مش انك تكر كلام وبس وبعد كده متصوتيييييش
٣١) الاطفال بيقلدوا الي بيشوفوه مش الي بيسمعوه
٣٢) اتفرج على الكرتون هتتصدم من الي ولادك بيشوفوه اقعد معاهم و وجهم ومتصوتيش
٣٣) عزيزي الاب تعاطفك لواحدوه مش كفايه
٣٤) الاطفال مش مزعجه الاطفال مكبوته
٣٥) الخطف بقى ظاهره ركزوا مع اولادكم في كل خطوه
٣٦) الفرق بين طفل و التاني اهتمام واستيعاب ومتصوتيش
٣٧) ابنك مواليد القرن ٢١ و انت من ٢٠ في فرق قرن يا ريت ننسى تربيتك و نتطور بقى ومتصوتيييش
٣٨) بلاش اساطير هعلقك و هطلع عينك خلي تهديدك واقعي
٣٩) النوم للراحه و الاحلام بلاش حفله تعذيب كل ليله ،شويه حواديت و اغاني هتكون اظرف
٤٠) عزيزي الاب منور ممكن انت تصوت معنا شوية

[Mary Naeem]

مشاركة جميلة جدا

ربنا يبارك حياتك

[walaa farouk]

ميرسي على مرورك الغالى مارى

[MenA M.G]

موضوع جميل جدا
شكراً للإفادة

[walaa farouk]

ميرسي على مرورك الغالى مينا