‏افتكر اني قولتلك بلاش

Rena Jesus · رقم المشاركة : ( 1 ) 03 - 08 - 2016, 07:02 AM

لو مراتك مش راضية عن حاجة..اوعي تعملها..
يا جماعة في ستات سرها باتع..ما بتهزرش..
هي نيتها مش وحشة خالص بس نفسها تكون معاك علطول..
يعني هي مش مقتنعة انت ليه عايز تسافر مع صحابك الساحل مع انها موجودة..
حتي لو كنتوا لسه مسافرين سوا و راجعين بس هتلاقيها من جوه مش مظبطة..

في واحدة عدم رضاها يقلب معاك بتخييشة عربية و انت لسه بتمسك الطريق فا كده اتنكد عليك بدري بدري..
او الكاوتش ينام منك ننة هوووووووه فجأة..
او انك تروح شرم ما تلاقيش فيها صريخ ابن يومين..و لا كإنك روحت صحرا..
تحس كده ان الطبيعة و العربيات و التكاتك و الجو و الزحمة و القطط و كل الكائنات متعاطفة معاها و بتعمل معاك الواجب..

الدنيا تمطر فجأة و انت رايح تلعب كورة فا تروح البيت جري مع ان الشمس كانت طالعة طول اليوم و زي الفل..

تقرر تخرج مع صحابك فا عصفورة تعمل معاك السليمة علي التي شيرت فا تروح تغيره و بعدها الخروجة تتكنسل..
يعني صحابك اتلطوا معاك هما كمان عشان المدام مش مبسوطة..

هتلاقي عكوسات بتحصل كده ملهاش اي تفسير..
زرار القميص وقع..
البنطلون اتنتش جامد..
الآي فون وقع علي الشاشة بتاعته مع انه كان في جيبك زي كل مرة..
نسيت المحفظة و معاكش و لا مليم..

تحس ان في لعنة في الموضوع...
او اي نكد و تكدير و السلام..

فا لو قولت لمراتك مسافر و حسيتها متضررة و لو 0.001%... كنسلللللللل...اسمع مني..
بدل ما تتبهدل علي الفاضي.. خدها من قصيرها و كنسل..

لو لاقيتها مش راضية عن موبايل هتجيبه يا اما ما تجيبوش يا تجيب ابو ضمان مدي الحياة ده مش ابو سنة و اقلب...
او اشتري نفسك و هاتلها زيها زيك و ريح دماغك..

قلبة الستات وحشة اوي..
تقدر تقول عندهم قدرات خارقة..
و ساعات بتحسهم مخاويين...
اه مخاويين بس متخافش اوي كده.. خليك في السليم و مش هيجرالك حاجة..

و ده ملوش اي علاقة ان عينهم وحشة.
دي قدراااات...
فا أحسنلك تنول رضا المدام عشان ربنا يفتحها ف وشك..
ارضيها عشان الست دي بركة و ليها كرامات...
#‏افتكر_اني_قولتلك_بلاش